ആൽക്കഹോളിക്‌ മനോരോഗങ്ങള്‍

അനിയന്ത്രിതമായ മദ്യാസക്തിയെയും അതുമൂലമുള്ള അമിതമദ്യപാനത്തെയും പൊതുവായി പറയുന്ന പേരാണ്‌ "ആൽക്കഹോളിസം'. മദ്യത്തിന്റെ അമിതമായ ഉപയോഗം ഒരു വ്യക്തിയുടെ ശാരീരിക-മാനസിക-സാമൂഹിക ജീവിതത്തിൽ തകരാറുകള്‍ ഉണ്ടാക്കുമ്പോഴാണ്‌ ആൽക്കഹോളിസം ഒരു രോഗാവസ്ഥയായി മാറുന്നത്‌. ലോകാരോഗ്യ സംഘടന ഈ അവസ്ഥയെ ആൽക്കഹോള്‍ ഡിപെന്‍ഡന്‍സ്‌ സിന്‍ഡ്രാം (Alcohol Dependence Syndrome) എന്നാണ്‌ നിർവചിച്ചിരിക്കുന്നത്‌. ശാരീരികവും മാനസികവുമായ ഉത്തേജനം ലഭിക്കുന്നതിനു വേണ്ടിയോ, മദ്യത്തിന്റെ അഭാവം മൂലമുള്ള ബുദ്ധിമുട്ടുകള്‍ കുറയ്‌ക്കുന്നതിനു വേണ്ടിയോ, സ്വയം നിർബന്ധിതനായി, ഇടവിട്ടോ തുടർച്ചയായോ മദ്യം ഉപയോഗിക്കുന്ന അവസ്ഥ എന്നാണ്‌ ഇതുകൊണ്ട്‌ ഉദ്ദേശിക്കുന്നത്‌. പ്രധാനമായും രണ്ട്‌ തരത്തിലുള്ള തകരാറുകളാണ്‌ ഇത്‌ മൂലമുണ്ടാകുന്നത്‌.

അക്യൂട്ട്‌ ഇന്റോക്‌സിക്കേഷന്‍ (Acute Intoxication).

അമിത മദ്യപാനത്തിലൂടെയുള്ള ചുരുങ്ങിയ സമയത്തെ ഉത്തേജിതാവസ്ഥയ്‌ക്കു ശേഷം, ശാരീരികവും മാനസികവുമായ പ്രവർത്തനങ്ങളിലുണ്ടാകുന്ന മന്ദതയാണ്‌ ഇവിടെ കാണുന്നത്‌. വ്യക്തി സ്വയം നിയന്ത്രണം നഷ്‌ടപ്പെട്ട രീതിയിൽ പ്രവർത്തിക്കും. അപൂർവമായി ഗുരുതരമായ ഓർമ്മതകരാറുകളും കണ്ടുവരുന്നു. രക്തത്തിലെ മദ്യത്തിന്റെ അളവും രോഗാവസ്ഥയുടെ തീവ്രതയും ബന്ധപ്പെട്ടിരിക്കുന്നു.

വിത്‌ഡ്രാവൽ സിന്‍ഡ്രാം (Withdrawal syndrome).

മദ്യത്തിന്റെ തുടർച്ചയായ ഉപയോഗത്തിനുശേഷം പൊടുന്നനെ നിർത്തുമ്പോഴുണ്ടാകുന്ന ശാരീരിക ലക്ഷണങ്ങളാണിവ. കൈകാൽ വിറയൽ, ബലക്കുറവ്‌, ഛർദ്ദി, ഓക്കാനം, ഉറക്കക്കുറവ്‌, ആകാംഷ എന്നിവയാണ്‌ പൊതുവേ കാണുന്നത്‌. ചുരുക്കം ചില അവസരങ്ങളിൽ തലച്ചോറിന്റെ പ്രവർത്തനത്തെയും ബാധിക്കും. ഇവയെ നാലു വിഭാഗങ്ങളായി തിരിച്ചിരിക്കുന്നു.

(1) ഡെലീറിയം ട്രമന്‍സ്‌ (Delirium Tremens)

(2) ആൽക്കഹോളിക്‌ ഹാലൂസിനോസിസ്‌ (Alcholic Hallusinosis)

(3) കോർസാക്കോഫ്‌സ്‌ ഉന്മാദം (Korsakoff's Psychosis)

(4) ആൽക്കഹോളിക്‌ പാരനോയിയ (Alcoholic Paranoia)

അമിതമദ്യപാനികളായ 10 ശ.മാ. രോഗികളിൽ മദ്യോപയോഗത്തിനുശേഷം 12 മുതൽ 48 വരെ മണിക്കൂറിനകമുണ്ടാകുന്ന സന്നി രോഗാവസ്ഥയാണ്‌ ആൽക്കഹോളിക്‌ സീഷർ (Alcholic seezure).

മദ്യത്തിന്റെ അമിതമായ ഉപയോഗം മൂലമുണ്ടാകുന്ന ഗുരുതരമായ മനോരോഗാവസ്ഥയാണ്‌ ആൽക്കഹോള്‍ ഇന്‍ഡ്യൂസ്‌ഡ്‌ സൈക്കോട്ടിക്ക്‌ ഡിസ്‌ഓർഡർ. അസാധാരണമായ ശബ്‌ദങ്ങളോ, കാഴ്‌ചകളോ അനുഭവിക്കുന്ന രീതിയിൽ രോഗി പ്രതികരിച്ചേക്കാം. ദീർഘനാളായി മദ്യം ഉപയോഗിക്കുന്നവരിലാണ്‌ ഈ അവസ്ഥ കൂടുതലും കണ്ടുവരുന്നത്‌. മദ്യപാനിയായ രോഗിയുടെ മാനസികാവസ്ഥയിലുണ്ടാകുന്ന ഏറ്റക്കുറച്ചിലുകളാണ്‌ ആൽക്കഹോള്‍ ഇന്‍ഡ്യൂസ്‌ഡ്‌ മൂഡ്‌ ഡിസ്‌ ഓർഡർ. വളരെയധികം സന്തോഷവാനായോ തീരെ ദുഃഖിതനായോ, രണ്ടും ചേർന്ന അവസ്ഥയിലോ വ്യക്തി പ്രതികരിക്കാം. ആങ്ങഹത്യ ഉള്‍പ്പെടെയുള്ള അപകടങ്ങളിലേക്ക്‌ രോഗി ഈ അവസ്ഥയിൽ നീങ്ങാന്‍ സാധ്യതയുണ്ട്‌. അസുഖം കൃത്യമായി നിർണയിച്ചശേഷം പ്രധാനമായും മൂന്ന്‌ ഘട്ടങ്ങളായാണ്‌ ചികിത്സ നടപ്പിലാക്കുന്നത്‌. ഇന്റർവെന്‍ഷന്‍, ഡീറ്റോക്‌സിഫിക്കേഷന്‍, പുനരധിവാസം (റീഹാബിലിറ്റേഷന്‍) എന്നിവയാണവ. വ്യക്തിയുടെ ശാരീരികാരോഗ്യം മെച്ചപ്പെടുത്തിയതിനുശേഷം മാത്രം മാനസികാരോഗ്യ പ്രശ്‌നങ്ങളിലേക്ക്‌ കടക്കൂ എന്ന രീതിയിലാണ്‌ ചികിത്സ അനുവർത്തിക്കുന്നത്‌. വ്യക്തിയുടെ കുടുംബാംഗങ്ങളുടെ സഹകരണം ചികിത്സയുടെ സുഗമമായ നടത്തിപ്പിന്‌ അത്യന്താപേക്ഷിതമാണ്‌

ആശങ്കാമനോരോഗം

ഉത്‌ക്കടമായ ഭയാശങ്കകള്‍ നിമിത്തമുളവാകുന്ന മാനസിക രോഗം. പലപ്പോഴും ഈ ഭയാശങ്കകളുടെ കാരണം രോഗിക്ക്‌ അജ്ഞാതമായിരിക്കും. മനോരോഗങ്ങളിൽ വച്ച്‌ ഏറ്റവും കൂടുതൽ കാണപ്പെടുന്ന അസുഖമാണിത്‌. അയഥാർഥവും അവ്യക്തവുമായ ഭയമോ ആകാംക്ഷയോ ആണ്‌ രോഗലക്ഷണം. കുട്ടികളിലും, ചെറുപ്പക്കാരിലുമാണ്‌ കൂടുതലായി കണ്ടുവരുന്നത്‌. സിഗ്മണ്ട്‌ ഫ്രായ്‌ഡ്‌ ആണ്‌ ഈ പദം ആദ്യമായി ഉപയോഗിച്ചത്‌ (Anxiety Neurosis). ആശങ്ക ജീവിത വിജയത്തിന്‌ ഒരളവുവരെ ആവശ്യമാണ്‌ എങ്കിലും അളവിൽ കൂടുതലാകുമ്പോള്‍ അത്‌ വ്യക്തിയുടെ ബുദ്ധിപരവും വൈകാരികവും ശാരീരികവുമായ കഴിവുകളെ ദോഷകരമായി ബാധിക്കുന്നു. വ്യക്തിയുടെ മാനസികമോ ശാരീരികമോ ആയ ദൗർബല്യങ്ങള്‍, മാനുഷിക ബന്ധങ്ങളിലുണ്ടാകുന്ന തകർച്ച, ജീവിത സംഘർഷങ്ങളെ നേരിടുന്നതിനുള്ള കഴിവുകേട്‌, തൊഴിൽ രംഗത്തെ പ്രശ്‌നങ്ങള്‍, മറ്റ്‌ ആരോഗ്യപ്രശ്‌നങ്ങള്‍, ലൈംഗിക പരാജയ ഭീതി, ദാമ്പത്യ പ്രശ്‌നങ്ങള്‍ എന്നിങ്ങനെ വിവിധ കാരണങ്ങള്‍ കൊണ്ട്‌ ആശങ്കാ മനോരോഗം ഉണ്ടാകാം.

പ്രധാനമായും രണ്ട്‌ തരത്തിലുള്ള മാറ്റമാണ്‌ ആശങ്കാധീനനായ ഒരു വ്യക്തിയിലുണ്ടാകുന്നത്‌. ഒന്നാമതായി വ്യക്തി ക്രമാതീതമായ വേഗത്തിൽ ശ്വാസോഛാസം നടത്തുന്നു. വിറയൽ, വിയർപ്പ്‌ എന്നിവ ഉള്‍പ്പടെയുള്ള ശാരീരിക വ്യത്യാസങ്ങളിൽ ശ്രദ്ധ കേന്ദ്രീകരിക്കുന്നു. രണ്ടാമതായി, തന്റെ മാനസിക സംഘർഷത്തെയും സംഭ്രമത്തെയും പറ്റി രോഗി ബോധവനാകുന്നു. ഇതിനോടൊപ്പം തന്നെ വ്യക്തിയുടെ ചിന്താരീതിയും കാഴ്‌ചപ്പാടുകളും അനാരോഗ്യകരമായി തീരുന്നു. ഇങ്ങനെയുണ്ടാകുന്ന മനഃക്ഷോഭം മൂലം രോഗി വിഷാദമഗ്നനായി തീരാനിടയുണ്ട്‌. അതിദ്രുതമായ ഹൃദയമിടിപ്പും ശ്വാസതടസ്സവും രക്തസമ്മർദവുമെല്ലാം ഈ രോഗത്തിന്റെ ഫലമായുണ്ടാകാം. ശരീരത്തിന്റെ ഉപാപചയ പ്രവർത്തനങ്ങളെയും രോഗം ബാധിക്കാം. തന്മൂലം വിശപ്പിലായ്‌മ, ഉറക്കമില്ലായ്‌മ, മലബന്ധം, ലൈംഗികമായ താത്‌പര്യക്കുറവ്‌ എന്നിവയും ഉണ്ടാകാം. തലവേദന, കൈകാൽവേദന, തളർച്ച എന്നിങ്ങനെ ഒന്നിൽ കൂടുതൽ ശാരീരികാസ്വാസ്ഥ്യങ്ങള്‍ ഈ രോഗികളിൽ കാണാറുണ്ട്‌. ആശങ്കാമനോരോഗം പ്രധാനമായും താഴെ പറയുന്ന രീതിയിലാണ്‌ തരംതിരിച്ചിരിക്കുന്നത്‌.

(1) സാമാന്യവത്‌കൃത ആന്‍ക്‌സൈറ്റി ഡിസ്‌ഓർഡർ (Generalised Anxiety Disorder) (2) പാനിക്‌ ഡിസ്‌ഓർഡർ (Panic Disorder) (3) ഫോബിയാസ്‌ (Phobias) (4) ഒബ്‌സസീവ്‌-കംപള്‍സീവ്‌ ഡിസ്‌ഓർഡർ (Obsessive compulsive Disorder) വ്യക്തിയെ കുറിച്ചും വ്യക്തിയുടെ ചുറ്റുപാടുകളെക്കുറിച്ചും പൂർണമായ അവബോധം ചികിത്സകന്‌ ഉണ്ടായിരിക്കണം. കൃത്യമായ മനഃശാസ്‌ത്രചികിത്സാ രീതികള്‍ക്കൊപ്പം, അസുഖത്തിന്റെ തീവ്രതയനുസരിച്ച്‌ ലഘുവായ ഔഷധപ്രയോഗവും ആവശ്യമായി വരാം. ഈ രോഗം പൂർണമായും ഭേദപ്പെടുത്താന്‍ കഴിയും.