കര്‍ക്കിടകമെത്തി;മനസും ശരീരവും ഉന്മേഷത്തോടെ നിലനിര്‍ത്താന്‍ തയാറെടുക്കേണ്ട കാലം

കര്‍ക്കിടകമെത്തി. മനസും ശരീരവും ഒരു വര്‍ഷക്കാലത്തേക്ക് ഉന്മേഷത്തോടെ നിലനിര്‍ത്താന്‍ തയാറെടുക്കേണ്ട കാലമായിരിക്കുന്നു. ആയുര്‍വേദം കര്‍ക്കടകത്തില്‍ പാലിക്കേണ്ട ശീലങ്ങളെ കുറിച്ചു പറഞ്ഞിട്ടുണ്ട്.

കര്‍ക്കടകത്തില്‍ അഗ്നിദീപ്‌തികരവും (വിശപ്പുണ്ടാകുന്ന) തൃദോ ഷശമനങ്ങളുമായ ആഹാരങ്ങളും ഔഷധങ്ങളും പ്രത്യേകം ശീലിക്കണം. പഞ്ചകോലം, കൂവളയില, പഴ മുതിര, ചെറുപയര്‍, അയമോദകം, ജീരകം, ദശമൂലം, ഇന്തുപ്പ് തുടങ്ങി നിരവധി ഔഷധങ്ങള്‍ ചേര്‍ന്ന കര്‍ക്കടക കഞ്ഞി ഏറ്റവും വിശേഷമത്രെ.

വാതശമനത്തിന് ഔഷധങ്ങള്‍ സേവിക്കുകയും എണ്ണ, കുഴമ്ബ് ഉപയോഗിച്ച്‌ തേച്ചുകുളിക്കുകയും ചെയ്യാം. ദിവസേന തേച്ചുകുളി (അഭ്യംഗം) ആയുര്‍വേദത്തില്‍ നിഷ്‌ക്കര്‍ഷിച്ചിട്ടുണ്ട്. തേച്ചുകുളി വാതം, ക്ഷീണം എന്നിവ ശമിപ്പിക്കുന്നതിനും ജരാനരകള്‍ തടയുന്നതിനും കാഴ്‌ച ശക്‌തി, ദേഹപുഷ്‌ടി, ദീര്‍ഘായുസ്സ്, നല്ല ഉറക്കം, തൊലിക്ക് മാര്‍ദ്ദവവും ഉറപ്പും എന്നിവയ്‌ക്ക് കാരണമാകുന്നു. തേച്ചുകുളിക്ക് നല്ലെണ്ണ മികച്ചതെന്ന് പഠനങ്ങളില്‍ വ്യക്‌തമായിട്ടുണ്ട്. രോഗങ്ങളെ ചെറുക്കുന്നതില്‍ നല്ലെണ്ണയ്‌ക്ക് പ്രത്യേക കഴിവുണ്ട്. തലയിലും ചെവിയിലും ഉള്ളം കാലിലും പ്രത്യേകമായി എണ്ണ തേയ്‌ക്കണം. കഫം വര്‍ധിച്ചിരിക്കുന്നവരും, ഛര്‍ദ്ദിപ്പിക്കുക, വയറിളക്കുക എന്നിവയ്‌ക്ക് വിധേയമായിരിക്കുന്നവരും അഭ്യംഗം ചെയ്യരുത്. അജീര്‍ണമുള്ളവരും എണ്ണ തേയ്‌ക്കരുത്.

പ്ലാവില, വാതം കൊല്ലിയില, ആവണക്കില, കടുക്കതോട് ഇവയിട്ട് തിളപ്പിച്ച വെള്ളം കുളിക്കാന്‍ ഉപയോഗിക്കാം. ധന്വന്തരം തൈലം കുഴമ്ബ്, ബലാശ്വഗന്ധാദി തൈലം, സഹചരാദി തൈലം എന്നിവ ദേഹത്തും ക്ഷീരബല തൈലം, അസനവില്വാദി തൈലം തുടങ്ങിയവ തലയിലും പുരട്ടാം.

രാവിലെ തയാറാക്കിയ കര്‍ക്കടക കഞ്ഞി തേച്ചു കുളികഴിഞ്ഞ് പത്തു മണിയോടെ കഴിക്കാം.

ശരീരശുദ്ധി വരുത്തി പഞ്ചകര്‍മ ചികിത്സ പ്രധാനമായി കഷായവസ്‌തി ചെയ്യാം. കഷായ വസ്‌തിക്കു ശേഷം പഴക്കം ചെന്ന ഗോതമ്ബ്, കാട്ടുഴുന്ന്, കാട്ടുപയറ് എന്നീ ധാന്യങ്ങള്‍ ഉപയോഗിച്ചുണ്ടാക്കുന്ന ആഹാരങ്ങള്‍ കഴിക്കാം.

എപ്പോഴും പുകച്ച വസ്‌ത്രം ഉപയോഗിക്കണം. പകലുറക്കം പാടില്ല. കൂടുതല്‍ അധ്വാനം, വെയില്‍ ഒഴിവാക്കണം.

കാലാവസ്ഥാ വ്യതിയാനങ്ങള്‍കൊണ്ട് ഉണ്ടാകുന്ന രോഗങ്ങളില്‍നിന്ന് ശരീരത്തെ പരിരക്ഷിക്കാന്‍ ഓരോ ഋതുവിലും ജീവിതരീതികള്‍ എങ്ങിനെ ചിട്ടപ്പെടുത്തണമെന്ന് ആയുര്‍വേദം നിര്‍ദേശിക്കുന്നു. "ഋതുചര്യ' എന്ന പേരിലാണ് ഇത് അറിയപ്പെടുന്നത്. ആറു ഋതുക്കള്‍ ചേര്‍ന്നതാണ് ഒരുവര്‍ഷം. ഒരു ഋതുവിന്റെ അവസാനത്തെ ഒരാഴ്ചയും അടുത്ത ഋതുവിന്റെ ആദ്യത്തെ ഒരാഴ്ചയും ചേര്‍ന്ന കാലയളവ് ഋതുസന്ധി എന്ന് അറിയപ്പെടുന്നു. ഈ സമയത്ത് ഉണ്ടാകുന്ന ഏതു രോഗവും ശ്രദ്ധിച്ചില്ലെങ്കില്‍ മാരകമാകാമെന്ന് ആയുര്‍വേദം പറയുന്നു.

കേരളത്തില്‍ എല്ലാ ഋതുക്കളും അത്ര പ്രകടമല്ല. നാലുമാസത്തോളമുള്ള വര്‍ഷഋതു അഥവാ മഴക്കാലം ഇവിടത്തെ പ്രത്യേകതയാണ്. മകരംതൊട്ട് മിഥുനംവരെയുള്ള മാസങ്ങള്‍ ഉത്തരായനത്തിലും കര്‍ക്കടകംതൊട്ട് ധനുവരെയുള്ള മാസങ്ങള്‍ ദക്ഷിണായനത്തിലുംപെടുന്നു. ദക്ഷിണായനകാലത്ത് സൂര്യന്റെ ചൂട് കുറഞ്ഞ അളവിലാണ് ഭൂമിയില്‍ പതിക്കുന്നത്. ശാരീരികവും മാനസികവുമായ ബലം കുറയുന്ന മാസങ്ങളാണിത്. ജൂണ്‍മുതല്‍ സെപ്തംബര്‍വരെയുള്ള മഴക്കാലത്ത് വാത-പിത്ത-കഫങ്ങളാകുന്ന മൂന്നു ദോഷങ്ങളും വര്‍ധിക്കുന്നു. മലിനമാക്കപ്പെടുന്ന ജലസ്രോതസ്സുകളാലും പരിസരമലിനീകരണത്താലും രോഗാണുക്കള്‍ പെരുകുന്നു. രോഗപ്രതിരോധശേഷി ഏറ്റവും കുറഞ്ഞ ഈ കാലയളവില്‍ വേനല്‍ക്കാലത്ത് ശരീരത്തില്‍ ഒളിച്ചിരുന്ന പല രോഗാണുക്കളും ശക്തിപ്രാപിച്ച്‌ രോഗകാരണമാകുന്നു. ചൂട്, തണുപ്പ്, വായു, ജലം, ആഹാരം, ഔഷധദ്രവ്യങ്ങള്‍ എന്നിവയ്ക്കുണ്ടാകുന്ന ഗുണവ്യത്യാസങ്ങള്‍ ശരീരബലത്തിനും ദഹനശക്തിക്കും ഉണ്ടാകുന്ന ഏറ്റക്കുറിച്ചിലുകള്‍ ഇവയെല്ലാം കണക്കിലെടുത്തുവേണം ഓരോ ഋതുവിലും ജീവിതചര്യകള്‍ ക്രമപ്പെടുത്തേണ്ടത്.

മഴക്കാലത്ത് വാതം വര്‍ധിക്കുകയും വാതരോഗലക്ഷണങ്ങള്‍ നന്നായി പ്രകടമാകുകയും ചെയ്യുന്നു. രോഗത്തെ സഹിക്കാനുള്ള ശേഷി കുറയുന്നു. ശരീരബലം കുറയുന്നു. ദഹനശക്തി കുറയുന്നു. അഗ്നിയുടെ ബലം കുറയുന്നു (ശരീരത്തിനുള്ളിലെ ഉപാപചയ പ്രവര്‍ത്തനങ്ങളെ നിയന്ത്രിക്കുന്ന ശക്തിയെ അഗ്നിയെന്നു പറയാം). ഈ കാലത്ത് ലഘുവായ പഞ്ചകര്‍മചികിത്സ ചെയ്യാം. അശുദ്ധിയാണ് രോഗം; നൈര്‍മല്യമാണ് ആരോഗ്യം എന്നാണ് ആയുര്‍വേദ സിദ്ധാന്തം. ശുദ്ധീകരിക്കലാണ് ഛര്‍ദിപ്പിക്കല്‍, വയറിളക്കല്‍, വസ്തി, നസ്യം, രക്തമോക്ഷം തുടങ്ങിയ പഞ്ചകര്‍മങ്ങളാല്‍ നിര്‍വഹിക്കപ്പെടുന്നത്. മഴക്കാലത്തുള്‍പ്പെട്ട കര്‍ക്കടകമാസത്തില്‍ വാതരോഗലക്ഷണങ്ങള്‍ ഏറ്റവും പ്രകടമാണ്. ഇക്കാലത്ത് ശരീരശക്തിക്കനുസരിച്ച്‌ പഞ്ചകര്‍മ ചികിത്സകള്‍ ചെയ്യുന്നത് നല്ലതാണ്. ഇത്തരം ചികിത്സകളാല്‍ ആന്തരിക ശുദ്ധി വരുത്തിയശേഷം ഉപയോഗിക്കുന്ന ഔഷധക്കഞ്ഞി ശരീരത്തിന് ഏറെ ഗുണം നല്‍കും.

നമ്മുടെ ശരീരത്തിനുള്ള റീ ചാര്‍ജാണ് കര്‍ക്കടക മാസത്തിലെ സുഖചികില്‍സ. കടുത്ത വേനല്‍ച്ചൂടിനു ശേഷം വര്‍ഷപാതവും ശീതപാതവും അളപാതവും കഴിഞ്ഞ് ശുദ്ധപാതം എത്തുന്ന കര്‍ക്കടകം സുഖചികില്‍സയ്‌ക്കും ആരോഗ്യ പരിപാലനത്തിനും യോജിച്ച മാസമാണ്. ഇത്രയും കാലത്തെ അലച്ചിലും അധ്വാനവും തളര്‍ത്തിയ ശരീരത്തിന് ഉണര്‍വും ഊര്‍ജവും നല്‍കും കര്‍ക്കടക ചികില്‍സ.

ആരോഗ്യ കാര്യത്തിലും ആത്മീയ കാര്യത്തിലും ഏറെ പ്രാധാന്യമുള്ള മാസമാണ് കര്‍ക്കടകം. മഴക്കാലത്ത് ശരീരത്തില്‍ വാതം പ്രകോപിതമാകും. ശരീരത്തില്‍ അധികമുള്ള വാതദോഷത്തെ പുറത്തുകളയാന്‍ വേണ്ടിയാണ് കര്‍ക്കടക ചികില്‍സ. മസാജ്, ധാര, പൊടിക്കിഴി, പച്ചക്കിഴി, ഉധ്വര്‍ത്തനം തുടങ്ങിയവയാണ് ഇതില്‍ പ്രധാനം. സുഖ ചികില്‍സയ്‌ക്കു മൂന്നു ദിവസം മുതല്‍ ഒരു മാസം വരെ നീളുന്ന വിവിധ പാക്കേജുകളുണ്ട്. വീട്ടില്‍ വച്ചു തന്നെ ചെയ്യാവുന്ന ലഘുചികില്‍സയാണ് എണ്ണതേച്ചുകുളി.

ആയുര്‍വേദ ആശുപത്രികളിലും മര്‍മ ചികില്‍സാലയങ്ങളിലും കര്‍ക്കടക മാസ ചികില്‍സകളായ ഉഴിച്ചിലും പിഴിച്ചിലും ഔഷധക്കഞ്ഞി വിതരണവും സജീവമാണിപ്പോള്‍. പ്രായഭേദമെന്യേ മുതിര്‍ന്നവര്‍ക്കും സ്ത്രീകള്‍ക്കും കുട്ടികള്‍ക്കുമെല്ലാം സുഖചികില്‍സ നടത്താം. വിശ്രമവും പഥ്യവുമാണ് ശ്രദ്ധിക്കേണ്ട കാര്യങ്ങള്‍. ഓരോ ചികില്‍സാവിധിക്കും ഓരോ സമയപരിധിയുണ്ട്. ഒരു ചികില്‍സാ രീതി നിശ്‌ചയിച്ചു കഴിഞ്ഞാല്‍ ഇടയ്‌ക്കു വച്ചു നിര്‍ത്താന്‍ പറ്റില്ല. ശരീരത്തെ ചികില്‍സയ്‌ക്കു വിധേയമാക്കി വീണ്ടും പഴയ പടിയെത്തിക്കും വരെയുള്ള ഒരു ചക്രം പൂര്‍ത്തിയാക്കുമ്ബോഴേ ചികില്‍സ പൂര്‍ണമാകൂ.

എണ്ണതേച്ചുള്ള കുളി (അഭ്യംഗസ്‌നാനം) ആണ് വീട്ടില്‍ തന്നെ ചെയ്യാവുന്ന സുഖചികില്‍സ. പേശികള്‍ക്കും എല്ലുകള്‍ക്കും സംഭവിക്കുന്ന രൂപമാറ്റങ്ങള്‍, സ്‌ഥാനഭ്രംശങ്ങള്‍, രക്‌തയോട്ടത്തിലുണ്ടാകുന്ന കുറവ് തുടങ്ങിയവ പരിഹരിക്കാന്‍ എണ്ണതേച്ചുള്ള കുളി ഉത്തമമാണ്. ശരീരപ്രകൃതി മനസ്സിലാക്കി വേണം ഏതു തരത്തിലുള്ള തൈലമാണ് ഉപയോഗിക്കേണ്ടതെന്നു തീരുമാനിക്കാന്‍. ഇതിന് ആയുര്‍വേദ വിദഗ്‌ധന്റെ സഹായം തേടണം.

നാഡീ ഞരമ്ബുകളെ ഉണര്‍ത്തി ഊര്‍ജസ്വലത നല്‍കുന്നതിനുള്ള ചികില്‍സകളാണ് ഉഴിച്ചിലും തിരുമ്മലും. വാതരോഗ ശമനത്തിനും ശരീരത്തിലെ മാലിന്യം വിയര്‍പ്പ്, മലം, മൂത്രം എന്നിവ വഴി പുറന്തള്ളുന്നതിനും ഏറെ സഹായകമാണ് ഇത്. ഉഴിച്ചില്‍ നടത്തുമ്ബോള്‍ പ്രത്യേക ചിട്ടകള്‍ പാലിക്കേണ്ടിവരും. ഏഴു ദിവസം മുതല്‍ 14 ദിവസം വരെയാണ് ഈ ചികില്‍സ നടത്തേണ്ടത്. ഔഷധ ഇലകള്‍ നിറച്ച കിഴികള്‍ ഉപയോഗിച്ചു തൈലങ്ങള്‍ ശരീരത്തില്‍ തിരുമ്മി പിടിപ്പിക്കുന്നതാണ് തിരുമ്മല്‍. ചെറുചൂടുള്ള തൈലം തിരുമ്മി പിടിപ്പിക്കാം. ഇതിനു പുറമെ നവരക്കിഴി ചികില്‍സ, ഇലക്കിഴി ചികില്‍സ, വസ്തിനസ്യം തുടങ്ങിയവ വിദഗ്ധ വൈദ്യന്മാരുടെ മേല്‍നോട്ടത്തില്‍ ചെയ്യാവുന്ന സുഖചികില്‍സകളാണ്.

പൊതുവെ ദഹനശക്‌തി കുറയുന്ന സമയമായതിനാല്‍ ദഹനം ത്വരിതപ്പെടുത്തുന്നതിനും വാതം, പിത്തം, കഫം എന്നീ ത്രിദോഷങ്ങളുടെ ബുദ്ധിമുട്ടുകളില്‍നിന്നു രക്ഷ തരുന്നതിനും ഒട്ടേറെ ഔഷധക്കൂട്ടുകളടങ്ങിയ കര്‍ക്കടക കഞ്ഞി ഉത്തമമാണ്. അരിയാറ്, ചെറുപയര്‍, നല്ല ജീരകം, കരിംജീരകം, പെരുംജീരകം, ആശാളി, ഉലുവ, കൊത്തമല്ലി, കരിങ്കുറിഞ്ഞി, അയമോദകം, കുറുന്തോട്ടി, മഞ്ഞള്‍, ചുക്ക്, ശതകുപ്പ, ഏലത്തരി, ജാതി പത്രി, കരയാമ്ബൂ, തക്കോലം, നറുനീണ്ടി (നന്നാറി), ഓരില, മൂവില, അടപതിയന്‍, നിലപ്പന, വയല്‍ചുള്ളി, പുത്തരിച്ചുണ്ട, തഴുതാമ, ചങ്ങലവരണ്ട തുടങ്ങിയവ ഔഷധങ്ങള്‍ ഉപയോഗിച്ച്‌ ഉണ്ടാക്കുന്ന കഷായത്തിലാണ് കഞ്ഞി തയാറാക്കുന്നത്. കഷായം അരിച്ചെടുത്ത് അതില്‍ നവര അരി വേവിച്ചെടുത്ത് പശുവിന്‍ പാലിലോ ആട്ടിന്‍ പാലിലോ തേങ്ങാപ്പാലിലോ ചേര്‍ത്ത് കഴിക്കാം. നവര അരി ഇല്ലെങ്കില്‍ പഴയ നെല്ലിന്റെ തവിടു കളയാത്ത മട്ടപ്പച്ചരി ഉപയോഗിക്കാം. രാവിലെ വെറും വയറ്റില്‍ കഴിക്കുന്നതാണ് ഉത്തമം. വൈകുന്നേരവും കഴിക്കാം. തുടര്‍ച്ചയായി ഒരു മാസം ഉപയോഗിക്കുന്നതു ഗുണം ചെയ്യുമെങ്കിലും 10, 20, 30, 40 ദിവസം എന്നിങ്ങനെ ആവശ്യം പോലെ ഔഷധക്കഞ്ഞി സേവിക്കുന്നവരുണ്ട്. ഔഷധക്കഞ്ഞിയും ച്യവനപ്രാശ്യവുമെല്ലാം നമ്മുടെ ആമാശയത്തിന്റെ പ്രവര്‍ത്തനത്തെ കൃത്യതയുള്ളതാക്കാന്‍ സഹായിക്കും.

ആരോഗ്യകരമായ ലൈംഗിക ജീവിതത്തിനും കര്‍ക്കടക ചികില്‍സ ഗുണം ചെയ്യും. കര്‍ക്കടക ചികില്‍സ ശരീരത്തിലെ ഓരോ നാഡികളിലൂടെയുമുള്ള രക്‌തയോട്ടം വര്‍ധിക്കാന്‍ സഹായകമാകും. പേശികള്‍ക്കു ബലമേറും. ലൈംഗിക സംതൃപ്‌തിയുടെ പ്രധാന ഘടകങ്ങളാണിവയെന്ന് ആരോഗ്യവിദഗ്‌ധര്‍ പറയുന്നു.

മല്‍സ്യ, മാംസാഹാരങ്ങള്‍ ഉപേക്ഷിക്കല്‍ മാത്രമല്ല പഥ്യം. ആയുര്‍വേദ വിധിപ്രകാരം രോഗത്തിനും ഔഷധത്തിനും ചേരുന്നതും ചേരാത്തതുമായവ തിരിച്ചറിഞ്ഞുകൊണ്ടുള്ള ഭക്ഷണക്രമത്തെയാണു പഥ്യം എന്നു പറയുന്നത്. ചില രോഗങ്ങള്‍ ഉള്ളവര്‍ക്കു ചില ഭക്ഷണപഥാര്‍ഥങ്ങള്‍ ചേരില്ല. ചില മരുന്നുകള്‍ ഉപയോഗിക്കുമ്ബോഴും ചില ഭക്ഷണങ്ങള്‍ ഉപേക്ഷിക്കേണ്ടി വരും. ഇവ ഒഴിവാക്കി, ഡോക്‌ടര്‍ നിര്‍ദേശിക്കുന്ന ഭക്ഷണക്രമം പിന്തുടരുന്നതിനെയാണ് പഥ്യം എന്നു പറയുന്നത്. മിതമായ ഭക്ഷണമാണ് അഭികാമ്യം. കര്‍ക്കടകത്തിലെ സുഖചികില്‍സാ കാലത്ത്, ദഹിക്കാന്‍ വിഷമമുള്ള ഭക്ഷണപഥാര്‍ഥങ്ങള്‍ ഒഴിവാക്കാനാണു ഡോക്‌ടര്‍മാര്‍ പറയുക. എരിവ്, ചവര്‍പ്പ്, കയ്‌പ് തുടങ്ങിയ രുചികള്‍ ഒഴിവാക്കണമെന്നു പറയുന്നതും പഥ്യത്തിന്റെ ഭാഗമാണ്.

∙ പഴകിയ അരി കൊണ്ടുള്ള ആഹാരം കഴിക്കുക.

∙ മാംസരസം (സൂപ്പ്) ഉപയോഗിക്കുക.

∙ ചെറുപയര്‍ കൊണ്ടുള്ള സൂപ്പ് കഴിക്കുക.

∙ നാട്ടില്‍ കിട്ടുന്ന പത്ത് ഇലക്കറികള്‍ കഴിക്കുക.

∙ ആയാസമുള്ള ജോലികള്‍ ഒഴിവാക്കുക.

∙ മധുര രസം, എരിവ് എന്നിവ ഒഴിവാക്കാം.

∙ തൈര് ഒഴിവാക്കാം. മോര് ധാരാളമായി ഉപയോഗിക്കാം.

∙ കുളിക്കുന്നതിനു മുന്‍പ് ധന്വന്തരം, ബലാശ്വഗന്ധാദി തൈലങ്ങള്‍ ദേഹത്തു പുരട്ടാം.

∙ മല്‍സ്യം മാംസം, മുട്ട എന്നിവയൊക്കെ ഒഴിവാക്കണം.

∙ പകലുറക്കം, വ്യായാമം എന്നിവ കുറയ്ക്കണം.

∙ മദ്യം, പുകവലി, മറ്റ് ലഹരി പദാര്‍ഥങ്ങള്‍ എന്നിവ വര്‍ജിക്കണം.