വൃക്കരോഗങ്ങളും ആഹാരക്രമീകരണവും

ജീവിതശൈലി രോഗങ്ങള്‍ മനുഷ്യനെ കീഴ്പ്പെടുത്തുന്ന ഇന്നത്തെ കാലഘട്ടത്തില്‍ ഓരോ ജീവിതശൈലി രോഗവും മറ്റു രോഗങ്ങളുടെ വാഹകരാകുന്നു.

അമിതവണ്ണം പ്രമേഹത്തിനും ഹൃദ്രോഗങ്ങള്‍ക്കും, വൃക്കരോഗങ്ങള്‍ക്കും കാരണമാകും. പ്രമേഹം ഹൃദ്രോഗത്തിനും വൃക്കരോഗത്തിനും കാരണമാകാം. ഇങ്ങനെ ഒന്നിനെ തൊട്ടാല്‍ മറ്റുള്ളവ ചങ്ങലപോലെ നമ്മെ വരിഞ്ഞുമുറുകാന്‍ പാത്തിരിക്കുന്നു. അതിനാല്‍ ഭക്ഷണക്രമീകരണവും, വ്യായാമവും ശീലമാക്കി ജീവിതശൈലിരോഗങ്ങളെ അകറ്റാന്‍ ശ്രമിക്കുക.

വൃക്കരോഗങ്ങള്‍ പല കാരണങ്ങള്‍കൊണ്ടും ഉണ്ടാകാം. പ്രമേവും, പൊണ്ണത്തടിയും ഇന്ന് പ്രധാന കാരണങ്ങളുടെ ഗണത്തില്‍പ്പെടുന്നു. അക്യൂട്ട് കിഡ്നി ഇന്‍ജുറി, ക്രോണിക് കിഡ്നി ഡിസീസസ്, ഹൈപ്പര്‍ടെന്‍സ് നെഫ്രോസ്ക്ളീറോസിസ് കിഡ്നി സ്റ്റോണ്‍സ്, അനാള്‍ജസിക് നെഫ്രോപതി ഡയബറ്റിക് കിഡ്നി ഡിസീസസ്, പോളിസിസ്റ്റിക് കിഡ്നി ഡിസീസസ് എന്നിങ്ങനെ ഓമനപ്പേരുകള്‍ ഒരുപാടുണ്ട് വൃക്കരോഗങ്ങള്‍ക്ക്. ഇവയെ അവരുടെ കാര്യകാരണ ലക്ഷണങ്ങളും, അവയുടെ ആഘാതത്തിന്റെ തോതും അനുസരിച്ച് പ്രധാനമായും മൂന്നു ഗണത്തിലായി ഉള്‍ക്കൊള്ളിച്ചു.

1. ഇന്‍ഹറിറ്റഡ് കിഡ്നി ഡിസ്ഓര്‍ഡേഴ്സ്
2. കണ്‍ജനിറ്റല്‍ കിഡ്നി ഡിസ്ഓര്‍ഡേഴ്സ്.
3. അക്വയ്ഡ് കിഡ്നി ഡിസ്ഓര്‍ഡേഴ്സ്.

ഇന്നത്തെ സാഹചര്യത്തില്‍ എല്ലാ പേര്‍ക്കും കൃത്യമായ ഒരു ആഹാരക്രമവും വ്യായാമവും പാലിക്കേണ്ട ആവശ്യമുണ്ടെങ്കിലും വൃക്കരോഗികള്‍ കുറച്ചുകൂടി ശ്രദ്ധയോടെ ആഹാര ക്രമീകരണം പാലിക്കേണ്ടതുണ്ട്. വര്‍ഷത്തില്‍ 365 ദിവസവും 24 മണിക്കൂറും പ്രവര്‍ത്തിക്കുന്ന നമ്മുടെ വൃക്കകള്‍ക്ക് പ്രവൃത്തിഭാരം കൂടുമ്പോള്‍ അവയുടെ പ്രവര്‍ത്തനം അല്‍പ്പമൊന്ന് അമാന്തിച്ചാല്‍ നമ്മുടെ ശരീരത്തിലെ ധാതുലവണങ്ങളുടെയും, ഇലക്ട്രോ ലൈറ്റുകളുടെയും, ജലത്തിന്റെയും എല്ലാം അനുപാതത്തില്‍ വ്യതിയാനങ്ങള്‍ സംഭവിക്കാം. പുറന്തള്ളപ്പെടേണ്ടവ ശരീരത്തില്‍ നിലനില്‍ക്കാം. അതിനാല്‍ വൃക്കകളുടെ പ്രവര്‍ത്തനം മന്ദീഭവിക്കുമ്പോള്‍ അവയുടെ ഭാരം നാം കുറച്ചുകൊടുക്കേണ്ടതുണ്ട്.

മറക്കരുത്

ഓരോരുത്തര്‍ക്കും അവരവരുടെ ശരീരഘടന, മറ്റു രോഗങ്ങള്‍, വൃക്കരോഗത്തിന്റെ ഘട്ടം എന്നിവ അനുസരിച്ച് ആഹാരക്രമവും വ്യത്യാസപ്പെട്ടിരിക്കും. വൃക്കരോഗം ഏതു വര്‍ഗമാണ് എന്നതും അനിവാര്യമാണ്. അതിനാല്‍ ഒരു വ്യക്തിക്ക് നിര്‍ദേശിക്കുന്ന ഭക്ഷണക്രമീകരണം മറ്റൊരു വ്യക്തിക്ക് യോജിക്കണമെന്നില്ല. രോഗത്തിന്റെ അവസ്ഥയ്ക്കനുസരിച്ച് ഓരോ ഘട്ടത്തിലും ഭക്ഷണക്രമീകരണം മാറിമാറി വരുന്നു. ഒരിക്കലും സ്വയം നിയന്ത്രിക്കുകയോ ക്രമീകരിക്കുകയോ ചെയ്യാതെ വിദഗ്ധരുടെ സഹായം തേടുക അനിവാര്യം.

ആഹാര ക്രമീകരണം

പൊതുവായി ശ്രദ്ധിക്കേണ്ട കാര്യങ്ങളാണെങ്കിലും ഇവയുടെ തോത് വ്യക്തിനിഷ്ഠമാണ്. 

മാംസ്യം
ശരീരകലകളുടെ വളര്‍ച്ചയ്ക്ക് അനിവാര്യവും ഒപ്പം ശരീരത്തിന്റെ ഊര്‍ജശ്രോതസ്സുമായ മാംസ്യത്തെ പ്രവര്‍ത്തനക്ഷമത കുറഞ്ഞ വൃക്കകള്‍ക്ക് കൈകാര്യംചെയ്യുക പ്രയാസമാണ്. അതിനാല്‍ വൃക്കരോഗമുള്ളവര്‍ക്ക് മാംസ്യത്തിന്റെ ഉപയോഗം കുറയ്ക്കുകയും എന്നാല്‍ ബയോളജിക്കല്‍ വാല്യു കൂടിയതുമായവ ഉള്‍പ്പെടുത്തണം. അതായത് മത്സ്യം, പാല്‍, മുട്ട, മാംസം, നട്സ് എന്നിവയിലെ മാംസ്യം ഉള്‍പ്പെടുത്താം. 
സാധാരണ ഒരുഗ്രാം/കി.ഗ്രാം എന്ന തോതില്‍ വേണ്ട മാംസ്യം 0.8ഗ്രാം/കി.ഗ്രാം ബോഡി വെയിറ്റ് എന്നാക്കാറുണ്ട്. എന്നാല്‍ ഡയാലിസിസിന്റെ ഘട്ടങ്ങളിലും മറ്റും ഇവ 1.2ഗ്രാം/കി.ഗ്രാം മുതല്‍ 1.5 ഗ്രാം/കി.ഗ്രാം ബോഡി വെയ്റ്റ് എന്ന തോതിലും ആക്കാറുണ്ട്. 

സോഡിയം
രക്തത്തില്‍ സോഡിയത്തിന്റെ തോതു കൂടിയാല്‍ രക്തസമ്മര്‍ദം കൂടുക, ജലാംശം ശരീരത്തില്‍ നിലനില്‍ക്കുക തുടങ്ങിയ പ്രശ്നങ്ങള്‍ വൃക്കരോഗികളില്‍ കാണപ്പെടും. അധികമായ സോഡിയം ശരീരഭാരം കൂട്ടാന്‍, അതായത് ജലം ശരീരത്തില്‍ തങ്ങിനിന്ന് ഹൃദയം, കരള്‍ എന്നിവയെ ബാധിക്കാന്‍ കാരണമാകാം. അതിനാല്‍ സാധാരണഗതിയില്‍ വൃക്കരോഗികള്‍ സോഡിയം നിയന്ത്രിക്കേണ്ടത് അനിവാര്യം.

ഉപ്പ്, തോടുള്ള കടല്‍, കായല്‍ മത്സ്യങ്ങള്‍, കത്തിരിക്ക, തക്കാളി,ചീര, ഉരുളക്കിഴങ്ങ്, മധുരക്കിഴങ്ങ് തുടങ്ങിയ പച്ചക്കറികള്‍, തണ്ണീര്‍മത്തന്‍, പ്ളം, ഓറഞ്ച്, മുന്തിരി, ചെറുനാരകം, വാഴപ്പഴം, ഫാഷന്‍ഫ്രൂട്ട് തുടങ്ങിയ ഫലവര്‍ഗങ്ങള്‍, പിന്നെ വൈന്‍, ബിയര്‍ തുടങ്ങിയവ ഉപേക്ഷിക്കുക. ഉപ്പിന്റെ ഉപയോഗം നിയന്ത്രിച്ചാല്‍ മതി. 

പൊട്ടാസ്യം
പൊട്ടാസ്യം വൃക്കരോഗികള്‍ നിയന്ത്രിക്കേണ്ട മൂലകമാണ്. കാരണം വൃക്കകളുടെ പ്രവര്‍ത്തനം മന്ദീഭവിക്കുമ്പോള്‍ രക്തത്തില്‍ പൊട്ടാസ്യത്തിന്റെ അളവു കൂടുന്നതായി കാണാം. ഹൈപ്പര്‍കലീമിയ എന്നറിയപ്പെടുന്ന ഈ അവസ്ഥ അപകടകരമാകാം. അതിനാല്‍ വൃക്കരോഗികള്‍ പൊട്ടാസിയം നിയന്ത്രിക്കുക. 200 മി.ഗ്രാമില്‍ കൂടുതല്‍ പൊട്ടാസ്യം അരക്കപ്പില്‍ ലഭിക്കുന്നവയായ ചീര, മധുരക്കിഴങ്ങ്, വാഴപ്പഴം, ഓറഞ്ച്, ഉരുളക്കിഴങ്ങ്, ഈന്തപ്പഴം, മത്തന്‍ തുടങ്ങിയവ ഒഴിവാക്കുക. അരക്കപ്പില്‍ 100 മി.ഗ്രാമില്‍ കുറവ് ലഭിക്കുന്നവ ക്രമമായി ഉപയോഗിക്കാം. അതായത് കാബേജ്, സവാള, കൈതച്ചക്ക, തണ്ണീര്‍മത്തന്‍, വഴുതന, വെള്ളരി തുടങ്ങിയവ. 

ഫോസ്ഫറസ്
വൃക്കരോഗത്തിന്റെ ആദ്യഘട്ടങ്ങളില്‍ രക്തത്തില്‍ ഫോസ്ഫറസിന്റെ അളവ് കൂടുതലായി കാണപ്പെടും. അധികമായ അളവിലെ ഫോസ്ഫറസ് അസ്ഥികളിലെ കാത്സ്യം വലിച്ചെടുക്കുന്നതുവഴി അസ്ഥികള്‍ക്ക് ബലക്ഷയം സംഭവിക്കാന്‍ ഇടയാക്കും. ചിലരില്‍ ഫോസ്ഫറസിന്റെ ആധിക്യം ചൊറിച്ചില്‍പോലുള്ള അലര്‍ജിക്ക് കാരണമാകാം. 
രക്തത്തില്‍ ഫോസ്ഫറസിന്റെ അളവ് കൂടുതലുള്ള വൃക്കരോഗികള്‍ കാത്സ്യം കൂടുതലായി ഉപയോഗിക്കുക. ഒപ്പം ജീവകം ഡിയുടെ അളവും നിയന്ത്രിച്ചുനിര്‍ത്തി കാത്സ്യത്തിന്റെ ആഗിരണത്തെ സഹായിക്കുക. പാല്‍, യോഗര്‍ട്ട്, ചീസ് തുടങ്ങിയവ നിയന്ത്രിക്കുന്നത് ഉത്തമം. ഫോസ്ഫറസിന്റെ അളവ് ശരിയായ രീതിയിലാണെങ്കില്‍ സാധാരണ ഭക്ഷണം ഉള്‍പ്പെടുത്താം. 

ജലം
വൃക്കരോഗത്തിന്റെ ആദ്യഘട്ടത്തില്‍ ജലം നിയന്ത്രിക്കേണ്ട ആവശ്യം വരുന്നില്ല. എന്നാല്‍ ശരീരത്തില്‍ നിര്‍വീക്കം, ഡയാലിസിസ് തുടങ്ങിയ അവസരങ്ങളില്‍ നിയന്ത്രണം ഏര്‍പ്പെടുത്താറുണ്ട്. ശരീരത്തില്‍നിന്നു പുറത്തേക്ക് പോകുന്ന ജലത്തിന്റെ അളവ് +500 മില്ലി ആണ് സാധാരണ ജലത്തിന്റെ അളവായി കണക്കാക്കുന്നത്. ഇതും വ്യക്തികളുടെ അവസ്ഥകള്‍ക്കും എടുക്കുന്ന ഡൈയൂററ്റിക്സിന്റെ അളവും അനുസരിച്ച് വ്യത്യാസപ്പെടാം. 
ജലം നിയന്ത്രിതഘട്ടത്തില്‍ ദാഹം ശമിപ്പിക്കാന്‍ ഇവ സഹായിക്കും.

ജലാംശം അധികമായ പഴവര്‍ഗങ്ങള്‍, കറികള്‍ ഒഴിവാക്കുക.
ചെറിയ കപ്പില്‍ വെള്ളം കുടിച്ചശേഷം കപ്പ് ഉടനെ കമഴ്ത്തിവയ്ക്കുക.
ഉപ്പ് നിയന്ത്രിക്കുകയോ, ഒഴിവാക്കുകയോ ചെയ്യാം. ശരീരത്തെ പുറമെ തണുപ്പിക്കുക.

അയണ്‍

വൃക്കരോഗികളില്‍ വിളര്‍ച്ച സാധാരണ കണ്ടുവരുന്നതാണ്. അതിനാല്‍ ഇരുമ്പിന്റെ അംശം അടങ്ങിയ പച്ചക്കറികളും, മാംസവും ഇടവിട്ടെങ്കിലും ഉപയോഗിക്കാന്‍ ശ്രമിക്കുക. എനാല്‍ അവയിലെ പൊട്ടാസിയത്തെ ശ്രദ്ധിക്കുക. 

ശ്രദ്ധിക്കുക

• ഒരു നേരത്തെയും ഭക്ഷണം ഉപേക്ഷിക്കരുത്. വിശപ്പ് അനുവഭപ്പെടുന്നില്ലെങ്കില്‍പ്പോലും വളരെ ചെറിയ അളവില്‍ നാലുമുതല്‍ ഒമ്പതു പ്രാവശ്യംവരെ കഴിക്കുക.
• ഭാരം ക്രമാതീതമായി കുറയുന്നുണ്ടെങ്കില്‍ ഡോക്ടറുടെയോ, ന്യൂട്രീഷനിസ്റ്റിന്റെയോ സഹായത്തോടെ ഭാരം നിയന്ത്രിച്ചുനിര്‍ത്താന്‍ ശ്രദ്ധിക്കുക.

വിറ്റാമിനുകള്‍ക്കും മിനറല്‍സിനുംവേണ്ടി ഒരു സപ്ളിമെന്റും സ്വയംഉപയോഗിക്കാതിരിക്കുക. 
നിങ്ങള്‍ കഴിക്കുന്നത് നിങ്ങള്‍ക്ക് അനുയോജ്യമാണോ എന്ന് നിങ്ങളെ ചികിത്സിക്കുന്ന ഡോക്ടറുമായി പങ്കുവയ്ക്കുക. 

ചില പൊടിക്കൈകള്‍
ജലം നിയന്ത്രിതമായവര്‍ ജലരൂപേണയുള്ള കറികള്‍, കുറുക്കിയ ഭക്ഷണങ്ങള്‍ എന്നിവ ഉപേക്ഷിച്ച് കട്ടിയായ ആഹാരം കഴിക്കാന്‍ 
ശ്രമിക്കുക. തിളപ്പിച്ചൂറ്റി പച്ചക്കറികള്‍ ഉപയോഗിക്കുന്നത് ഉത്തമം. (പൊട്ടാസിയം, ഫോസ്ഫറസ് തുടങ്ങി ഹാനികരമായവ ഒരുപരിധിവരെ നിയന്ത്രിക്കാന്‍ സഹായിക്കും. 
ജലാംശം നഷ്ടമാകുന്ന രീതിയിലുള്ള കഠിനമായ ജോലികള്‍ ഒഴിവാക്കുക. 
പൊട്ടാസിയം കുറഞ്ഞ പഴവര്‍ഗങ്ങളോ പച്ചക്കറികളോ ഉപയോഗിക്കുക.