മുഖസൗന്ദര്യം ആഗ്രഹിക്കുന്നവര്‍ അറിഞ്ഞിരിക്കേണ്ടത്‌
മുഖസൗന്ദര്യം ആഗ്രഹിക്കുന്നവര്‍ അറിഞ്ഞിരിക്കേണ്ടത്‌
കോസ്‌മെറ്റിക്‌ സര്‍ജറി
ഓരോ ശരീരഭാഗങ്ങളും ഇത്തരത്തില്‍ ചികിത്സയിലൂടെ ആകര്‍ഷകമാക്കാം.
സൗന്ദര്യം ആത്മവിശ്വാസത്തിലേക്കുള്ള ചവിട്ടുപടിയാണ്‌. ഏതുപ്രായക്കാരിലും ഉണ്ടാകാവുന്ന സൗന്ദര്യപ്രശ്‌നങ്ങള്‍ക്കുള്ള ആധുനിക പരിഹാരമാണ്‌
കോസ്‌മെറ്റിക്‌ സര്‍ജറി.
പുതിയ ലോകത്തിന്റെ പുതിയശീലമെന്നതിനപ്പുറം മനസിന്റെ സൗന്ദര്യസങ്കല്‌പങ്ങളെ തൃപ്‌തിപ്പെടുത്തുന്നുവെന്നതാണ്‌ സൗന്ദര്യ ശസ്‌ത്രക്രിയയുടെ നേട്ടം.
ഓരോ ശരീരഭാഗങ്ങളും ഇത്തരത്തില്‍ ചികിത്സയിലൂടെ ആകര്‍ഷകമാക്കാം. എന്നാല്‍ ഡോക്‌ടറുടെ അഭിപ്രായം കൂടി അറിഞ്ഞ്‌, ആവശ്യമെങ്കില്‍ മാത്രമേ സൗന്ദര്യ ശസ്‌ത്രക്രിയയ്‌ക്ക് വിധേയമാകാവൂ.
മൂക്ക്‌ ആകര്‍ഷകമാക്കാം
ശരീരത്തിലെ വളരെ ചെറിയ അവയവമാണെങ്കിലും മുഖമഴകില്‍ മൂക്കിന്റെ സ്‌ഥാനം വലുതാണ്‌. എന്നാല്‍ മൂക്കിന്റെ സൗന്ദര്യത്തെക്കുറിച്ചോര്‍ത്ത്‌ ഉത്‌കണ്‌ഠപ്പെടുന്നവര്‍ ഏറെയാണ്‌.
വലിയമൂക്ക്‌, പതിഞ്ഞമൂക്ക്‌, വളഞ്ഞമൂക്ക്‌ എന്നിങ്ങനെ നീളുന്നു മൂക്കിന്റെ സൗന്ദര്യപ്രശ്‌നങ്ങള്‍. ഇത്‌ പലപ്പോഴും നമ്മുടെ ആത്മവിശ്വാസംതന്നെ കെടുത്തിക്കളഞ്ഞേക്കാം.
മൂക്കിന്റെ രൂപവും വടിവും ആകര്‍ഷകമാക്കാന്‍ ശസ്‌ത്രക്രിയകള്‍ ചെയ്യുന്നവരുടെ എണ്ണം ഇന്ന്‌ കൂടിവരികയാണ്‌. സിനിമാതാരങ്ങളാണ്‌ ഒരുകാലത്ത്‌ ഇത്തരം ശസ്‌ത്രക്രിയകളില്‍ ഇടം പിടിച്ചിരുന്നതെങ്കില്‍ ഇന്ന്‌ സാധാരണക്കാരാണ്‌ സൗന്ദര്യ ശസ്‌ത്രക്രിയക്ക്‌ എത്തുന്നവരില്‍ അധികവും.
മൂക്കിന്റെ ആകാരഭംഗി കൂട്ടാന്‍ സഹായിക്കുന്ന ശസ്‌ത്രക്രിയയാണ്‌ റൈനോപ്ലാസ്‌റ്റി. മുഖത്തിന്റെ മറ്റ്‌ ഭാഗങ്ങള്‍ക്ക്‌ തുലനത ഉണ്ടാകുന്നരീതിയിലാണ്‌ മൂക്കിന്റെ ആകൃതി നിശ്‌ചയിക്കുന്നത്‌.
വളഞ്ഞമൂക്ക്‌, വലിയമൂക്ക്‌, പരന്നമൂക്ക്‌, പാലത്തിന്റെ വളവും തിരിവും, ചെറിയമൂക്ക്‌, വളഞ്ഞ്‌ തൂങ്ങിയ മൂക്ക്‌ തുടങ്ങി നാസികയ്‌ക്കുണ്ടാകുന്ന എല്ലാ അപാകതകളും റൈനോപ്ലാസ്‌റ്റിയിലൂടെ ശരിയാക്കാവുന്നതാണ്‌.
മൂക്കിന്റെ രൂപഭംഗിയെക്കുറിച്ചോര്‍ത്ത്‌ ഉത്‌കണ്‌ഠപ്പെടുന്നവര്‍ക്ക്‌ ഈ ശസ്‌ത്രക്രിയ ആത്മവിശ്വാസം പകര്‍ന്നു നല്‍കും.
ചികിത്സ
മോഡലുകളുടെ ചിത്രങ്ങള്‍കൊണ്ടുവന്ന്‌ അതേ ആകൃതിയിലുള്ള മൂക്ക്‌ വേണമെന്ന്‌ നിര്‍ബന്ധം പിടിക്കുന്നവരുണ്ട്‌. എന്നാല്‍ ഏത്‌ സൗന്ദര്യ ശസ്‌ത്രക്രിയ ചെയ്യുന്നതിനുമുമ്പും ഒരുകാര്യം ഓര്‍ക്കണം.
ഓരോരുത്തരുടെയും മുഖാകൃതിക്കു ചേരുന്ന രീതിയില്‍ മാത്രമേ അവയവ ഘടനയില്‍ വ്യതിയാനം വരുത്താന്‍ കഴിയൂ. അല്ലാതെ മറ്റുള്ളവരുടെ അതേ രൂപത്തിലും വടിവിലും അവയവങ്ങള്‍ പുനര്‍നിര്‍മ്മിക്കാന്‍ സാധ്യമല്ല.
അതിനാല്‍ ശസ്‌ത്രക്രിയക്കുമുമ്പ്‌ ഒരാള്‍ക്കനുയോജ്യമാകുന്ന മാറ്റം ശസ്‌ത്രക്രിയാ വിദഗ്‌ധനുമായി ചര്‍ച്ചചെയ്‌തു മനസിലാക്കേണ്ടതാണ്‌. യഥാര്‍ഥ്യത്തിനപ്പുറത്തേക്കുള്ള പ്രതീക്ഷകള്‍ വച്ചു പുലര്‍ത്തരുത്‌.
ശസ്‌ത്രക്രിയ
റൈനോപ്ലാസ്‌റ്റി ശസ്‌ത്രക്രിയ രണ്ടു രീതിയിലുണ്ട്‌. രണ്ടു നാസാരന്ധ്രങ്ങള്‍ക്കിടയിലുള്ള തൊലിയില്‍ മുറിവുണ്ടാക്കി നടത്തുന്ന ഓപ്പണ്‍ ശസ്‌ത്രക്രിയയും പുറമേ മുറിവില്ലാതെ ചെയ്യുന്ന ക്ലോസ്‌ഡ് റൈനോപ്ലാസ്‌റ്റിയും.
അനസ്‌തേഷ്യ നല്‍കിയാണ്‌ ശസ്‌ത്രക്രിയ ചെയ്യുന്നത്‌. മൂക്കിനകത്തെ അഭംഗിയുള്ള എല്ലുകളിലും തരുണാസ്‌ഥികളിലും ആവശ്യമായ രൂപമാറ്റം വരുത്തിയാണ്‌ മൂക്കിന്റെ ആകൃതിയില്‍ വ്യതിയാനം വരുത്തുന്നത്‌.
പരന്ന മൂക്കുകള്‍ വലുതാക്കാന്‍ ശരീരത്തിനുള്ളിലെ പേശികളോ, ഇംപ്ലാന്റുകളോ വച്ചു പിടിപ്പിക്കുന്നു. ഈ ശസ്‌ത്രക്രിയയിലൂടെ മൂക്കിന്റെ സ്വാഭാവിക പ്രവര്‍ത്തനങ്ങള്‍ക്ക്‌ ഒരുതടസവും ഉണ്ടാകുന്നില്ല.
സാധാരണയായി 15 വയസിനു മുകളിലുള്ളവരിലാണ്‌ റൈനോപ്ലാസ്‌റ്റി ചെയ്യുന്നത്‌. 15 വയസാകുന്നതോടെയാണ്‌ അസ്‌ഥികളുടെ വളര്‍ച്ച പൂര്‍ത്തിയാകുന്നത്‌.
15 - 45 വയസിനിടയിലുള്ളവരാണ്‌ റൈനോപ്ലാസ്‌റ്റിക്കെത്തുന്നവരില്‍ അധികവും. വേദന കുറഞ്ഞതും ഒരു ദിവസത്തെ ആശുപത്രിവാസം മാത്രം ആവശ്യമുള്ളതുമായ ശസ്‌ത്രക്രിയയാണിത്‌.
ശസ്‌ത്രക്രിയക്കുശേഷം
- ഒരാഴ്‌ചത്തെ വിശ്രമം ആവശ്യമാണ്‌. ഒരാഴ്‌ചയ്‌ക്കുശേഷം സ്‌റ്റിച്ച്‌ ഡോക്‌ടറെകണ്ട്‌ നീക്കം ചെയ്യുക.
- ശസ്‌ത്രക്രിയക്കുശേഷമുള്ള മൂന്നാഴ്‌ചയോളം മൂക്കിനു ചുറ്റും നീരും തടിപ്പും കാണപ്പെടാമെങ്കിലും സാധാരണ ജീവിതത്തിലേക്ക്‌ മടങ്ങിവരാവുന്നതാണ്‌.
- ശസ്‌ത്രക്രിയക്കുശേഷമുള്ള ആദ്യത്തെ മൂന്ന്‌ ദിവസങ്ങളില്‍ മൂക്കിന്‌ കഠിനമായ പ്രഹരങ്ങളോ തട്ടോ ഏല്‍ക്കാതെ പ്രത്യേകം ശ്രദ്ധിക്കണം.
- ഇംപ്ലാന്റ്‌ വച്ചിട്ടുള്ളവര്‍ കണ്ണട ഉപയോഗിക്കുമ്പോള്‍ മൂക്കിന്റെ പാലത്തിന്‌ സമ്മര്‍ദം ചെലുത്താതെ ഒരാഴ്‌ചയോളം നോക്കണം.
- മുഖത്തെ നീര്‌ കുറയ്‌ക്കാന്‍ ഐസ്‌പായ്‌ക്ക് ഉപയോഗിക്കാവുന്നതാണ്‌.
- ആദ്യത്തെ മൂന്ന്‌ ദിവസം തലനനച്ച്‌ കുളിക്കരുത്‌.
താടിയെല്ലുകള്‍ സുന്ദരമാക്കാം
ഒട്ടേറെ കാരണങ്ങള്‍കൊണ്ട്‌ മുഖാകൃതിക്ക്‌ വൈരൂപ്യം ഉണ്ടാകാം. അതില്‍ വലിയൊരു പ്രശ്‌നമാണ്‌ താടിയെല്ലുകളുടെ അഭംഗി. താടി ചെറുതായിരിക്കുമ്പോള്‍ മുഖത്തെ മറ്റ്‌ അവയവങ്ങള്‍ക്ക്‌ കൂടുതല്‍ വലുപ്പം തോന്നാം.
മാത്രമല്ല ത്വക്ക്‌ കൂടുതല്‍ അയഞ്ഞ്‌ ഇരട്ടത്താടി ഉണ്ടാകാം. മുഖാകൃതിയിലുണ്ടാകുന്ന ഇത്തരം വൈരൂപ്യങ്ങളെ ലളിതമായ ശസ്‌ത്രക്രിയ വഴി പരിഹരിക്കാവുന്നതാണ്‌.
റൈനോപ്ലാസ്‌റ്റിയിലൂടെ മൂക്കിന്റെ പ്രശ്‌നങ്ങള്‍ പരിഹരിക്കുമ്പോള്‍ ചിലപ്പോള്‍ അതിനൊപ്പം ആകര്‍ഷകമായ മുഖസൗന്ദര്യത്തിന്‌ താടിയെല്ലുകളും ശസ്‌ത്രക്രിയയിലൂടെ മാറ്റം വരുത്തേണ്ടി വരാം.
പൊങ്ങിനില്‍ക്കുന്നതോ ഉന്തിയതോ ആയ മേല്‍ത്താടി, നീളം കുറഞ്ഞ കീഴ്‌ത്താടി, ഉള്ളിലേക്ക്‌ വലിഞ്ഞിരിക്കുന്ന മേല്‍ത്താടി, ഉറങ്ങുമ്പോള്‍ വായ്‌ ചേര്‍ത്തടക്കാന്‍ കഴിയാതെ വരുക, മൂക്കിന്‌ നീളമോ വീതിയോ കൂടിയിരിക്കുക, കീഴ്‌ത്താടി ഉന്തിനില്‍ക്കുക, ഇരട്ടത്താടി, മുഖാസ്‌ഥികളുടെ വളര്‍ച്ചക്കുറവ്‌ എന്നിങ്ങനെ താടിയെല്ലുകളുടെ വൈകല്യങ്ങള്‍മൂലം ഉണ്ടാകുന്ന ഏത്‌ വൈരൂപ്യങ്ങളും ശസ്‌ത്രക്രിയയിലൂടെ പരിഹരിക്കാവുന്നതാണ്‌.
ചികിത്സ
ഒരു കോസ്‌മെറ്റിക്‌ സര്‍ജന്റെ സഹായത്തോടെ പ്രശ്‌നമെന്തെന്ന്‌ കൃത്യമായി നിര്‍ണയിക്കുകയാണ്‌ ആദ്യംവേണ്ടത്‌. താടിയെല്ലുകളുടെ വളര്‍ച്ച
ശരിയാക്കാന്‍ പല മാര്‍ഗങ്ങള്‍ സ്വീകരിക്കാറുണ്ട്‌.
ഓരോരുത്തരുടെയും മുഖാകൃതിക്കിണങ്ങുന്നരീതിയില്‍ താടിയെല്ലുകളെ ക്രമീകരിക്കുകയെന്നതാണ്‌ പ്രധാനം. ഇംപ്ലാന്റ്‌ ഉപയോഗിച്ചുള്ള ശസ്‌ത്രക്രിയയാണ്‌ നീളം കുറഞ്ഞ താടിയുള്ളവര്‍ക്ക്‌ സാധാരണ ചെയ്യുന്നത്‌.
താടിയെല്ലിനു മുകളില്‍ ഇംപ്ലാന്റുകള്‍വച്ചു പിടിപ്പിക്കുന്നു. ഈ ഇംപ്ലാന്റുകള്‍ ഒരു രീതിയിലും ശരീരത്തിനു ദോഷകരമല്ല. അരമണിക്കൂര്‍കൊണ്ട്‌ ചെയ്യാവുന്നതും സുരക്ഷിതവുമായ മാര്‍ഗമാണിത്‌.
8 മണിക്കൂര്‍ മാത്രം വിശ്രമം ആവശ്യമുള്ളൂ. എന്നാല്‍ കീഴ്‌ത്താടിയുടെ വൈരൂപ്യം വളരെയധികം ഉണ്ടെങ്കില്‍ താടിയിലെ എല്ല്‌ മുറിച്ച്‌ മുന്നിലേക്ക്‌ നീക്കി ഇടയ്‌ക്കുള്ള വിടവില്‍ ശരീരത്തിന്റെ മറ്റു ഭാഗത്തുനിന്ന്‌ അസ്‌ഥി എടുത്തുപിടിപ്പിക്കുന്ന രീതിയാണ്‌ നടത്തുന്നത്‌.
ഇതിനെ ജീനിയോ പ്ലാസ്‌റ്റി എന്നാണ്‌ പറയപ്പെടുന്നത്‌. കീഴ്‌ത്താടി വളരെക്കുറവുള്ളവര്‍ക്കാണ്‌ ഈ ശസ്‌ത്രക്രിയ ആവശ്യമായി വരുന്നത്‌.
എന്നാല്‍ ഈ രീതിയില്‍ കൂടുതല്‍ വിശ്രമം ആവശ്യമാണ്‌. നീളക്കൂടുതലുള്ള അസ്‌ഥിഭാഗങ്ങള്‍നീക്കം ചെയ്‌ത് താടിയെല്ലുകളുടെ നീളം കുറയ്‌ക്കാവുന്നതാണ്‌.
ശസ്‌ത്രക്രിയ
മുഖാകൃതിയുടെ പ്രശ്‌നങ്ങള്‍ എന്തെല്ലാമാണെന്ന്‌ കൃത്യമായി മനസിലാക്കുകയാണ്‌ ആദ്യം ഘട്ടം. വിശദമായ മുഖപരിശോധനയുടെ അടിസ്‌ഥാനത്തില്‍ ഓരോരുത്തര്‍ക്കും അനുയോജ്യമായ രീതി നിര്‍ണയിക്കാവുന്നതാണ്‌.
ചെറിയ ശസ്‌ത്രക്രിയയാണെങ്കില്‍ ഒന്നര രണ്ടു മണിക്കൂര്‍കൊണ്ട്‌ പൂര്‍ത്തിയാകും. വായിക്കകത്തുകൂടി നടത്തുന്ന ശസ്‌ത്രക്രിയ ആയതിനാല്‍ പുറമേ മുറിവുകള്‍ കാണപ്പെടുന്നില്ല.
ശസ്‌ത്രക്രിയക്കുശേഷം മുഖഘടനയില്‍ എടുത്തുപറയത്തക്ക മാറ്റങ്ങള്‍ പ്രകടമാകുന്നു. മറ്റേതു ശസ്‌ത്രക്രിയക്കും ഉണ്ടാകാവുന്ന ചില സങ്കീര്‍ണതകള്‍ മാത്രമേ മുഖസൗന്ദര്യ ശസ്‌ത്രക്രിയയുടെ കാര്യത്തിലുമുള്ളൂ.
ശ്രദ്ധിക്കാന്‍
- ശസ്‌ത്രക്രിയക്കുശേഷം പല്ലുകളുടെയും വായുടെയും ശുചീകരണത്തില്‍ പ്രത്യേകം ശ്രദ്ധിക്കണം.
- ഒരാഴ്‌ചത്തെ വിശ്രമം ആവശ്യമാണ്‌.
- ശസ്‌ത്രക്രിയ ചെയ്‌ത ഭാഗത്ത്‌ മൂന്ന്‌ ആഴ്‌ച തട്ടലോ പ്രഹരമോ ഏല്‍ക്കാതെ ശ്രദ്ധിക്കണം.
കട്ടികുറഞ്ഞ ഭക്ഷണംവേണം ശസ്‌ത്രക്രിയ കഴിഞ്ഞു ആദ്യത്തെ മൂന്ന്‌ ദിവസം കഴിക്കാന്‍.
മുഖസൗന്ദര്യം വര്‍ധിപ്പിക്കാം
പഴയകാലത്തെ സൗന്ദര്യ സങ്കല്‌പങ്ങളല്ല ഇപ്പോള്‍ ഉള്ളത്‌. അതുകൊണ്ടുതന്നെ മാറിയ കാലത്തിന്റെ സൗന്ദര്യസങ്കല്‌പങ്ങള്‍ പുതിയലോകത്തിന്റെ ശീലങ്ങള്‍ക്കൊപ്പം നില്‍ക്കാനും ആത്മവിശ്വാസത്തോടെ മധ്യവയസിനെ നേരിടാനും സഹായിക്കും.
പ്രായം ആദ്യം പ്രതിഫലിക്കുന്നത്‌ ത്വക്കിലാണ്‌. ചര്‍മ്മം അയഞ്ഞു തൂങ്ങി വാര്‍ധക്യത്തിന്റെ വരവറിയിക്കുമ്പോള്‍തന്നെ പലരുടെയും മനസിന്റെ യുവത്വവും നഷ്‌ടപ്പെടും.
എന്നാല്‍ അയഞ്ഞ ത്വക്കിന്‌ യുവത്വം പ്രദാനം ചെയ്യുന്ന കോസ്‌മെറ്റിക്‌ ശസ്‌ത്രക്രിയയാണ്‌ ഫെയിസ്‌ ലിഫ്‌റ്റ് സര്‍ജറി. 50 വയസ്‌ കഴിഞ്ഞവരിലാണ്‌ കൂടുതലായി ഇത്‌ ചെയ്യുന്നത്‌. വിദേശിയരെവച്ചു നോക്കുമ്പോള്‍ ഇന്ത്യക്കാരില്‍ പൊതുവേ വാര്‍ധക്യ ലക്ഷണങ്ങള്‍ നേരത്തെ പ്രകടമാകാത്തതിനാല്‍ ഇത്‌ ചെയ്യുന്നവരുടെ എണ്ണം കുറവാണ്‌്.
ചികിത്സ
പ്രായമേറുന്നതോടെ മുഖത്ത്‌ പലതരത്തിലുള്ള മാറ്റങ്ങള്‍ പ്രകടമാകാം. ത്വക്ക്‌ താഴേക്ക്‌ വലിയുകയും ചര്‍മം ചുളിയുകയും ചെയ്യുന്നു. ത്വക്കിന്റെ ഇലാസ്‌തികത കുറയുന്നതിനാല്‍ ചുളിവുകളുടെ അളവും കൂടുതല്‍ പ്രകടമാകും.
അയഞ്ഞ ത്വക്ക്‌ മുറുക്കുന്നതിലൂടെ ചര്‍മത്തിലെ ഇത്തരം അഭംഗികള്‍ ഒഴിവാക്കാം. ശസ്‌ത്രക്രിയയിലൂടെ അയഞ്ഞ ത്വക്കിനെ മുറുക്കി സാധാരണ അവസ്‌ഥയിലാക്കുകയും അധികം വരുന്ന ചര്‍മ്മം നീക്കം ചെയ്യുകയും ചെയ്യുന്നു.
ശസ്‌ത്രക്രിയ
അനസ്‌തേഷ്യ നല്‍കി ചെയ്യുന്ന ശസ്‌ത്രക്രിയയാണിത്‌. കണ്‍തടങ്ങളിലെ തടിപ്പ്‌, കഴുത്തിലെ ചുളിവുകള്‍ തുടങ്ങിയ പ്രശ്‌നങ്ങളും ഈ ശസ്‌ത്രക്രിയയുടെ ഭാഗമായി പരിഹരിക്കാവുന്നതാണ്‌.
ചെവിയുടെ അരികുവഴിയാണ്‌ ഇത്‌ ചെയ്യുന്നത്‌. അതിനാല്‍തന്നെ മുറിവ്‌ പുറമേ കാണാന്‍ കഴിയില്ല. അയഞ്ഞ ചര്‍മം ബലപ്പെടുത്തി അധികമായുള്ള ത്വക്ക്‌ നീക്കം ചെയ്യുകയാണ്‌ ശസ്‌ത്രക്രിയയിലൂടെ ചെയ്യുന്നത്‌.
ഇതുമൂലം മുഖത്തെ ചുളിവുകള്‍ നീങ്ങുകയും കാഴ്‌ചയില്‍ കൂടുതല്‍ പ്രസരിപ്പും ഉന്മേഷവും ലഭിക്കുന്നു. ഏറ്റവും പ്രധാനം മനസിന്റെ ആകുലതകളെ തൃപ്‌തിപ്പെടുത്താന്‍ കഴിയുന്നുവെന്നതാണ്‌.
മറ്റുള്ളവര്‍ക്ക്‌ ഫെയിസ്‌ ലിഫ്‌റ്റ് ചെയ്‌തെന്നു മനസിലാകാത്ത രീതിയിലാണ്‌ ഇത്‌ ചെയ്യുക. മുഖത്തിന്റെ ആകൃതിക്ക്‌ മാറ്റം വരുത്താതെതന്നെ ഉള്ള സൗന്ദര്യത്തെ കൂടുതല്‍ ആകര്‍ഷകമാക്കുകയെന്നതാണ്‌ ഇതിന്റെ ലക്ഷ്യം. കൃത്രിമ സൗന്ദര്യത്തേക്കാള്‍ ഉപരി സ്വാഭാവിക സൗന്ദര്യമാണ്‌ ഫെയിസ്‌ ലിഫ്‌റ്റ് സര്‍ജറി പകര്‍ന്നു നല്‍കുന്നത്‌.
കണ്‍തടങ്ങള്‍ സുന്ദരമാക്കാം
സൗന്ദര്യസംരക്ഷണമെന്നാല്‍ കെമിക്കലുകള്‍ അടങ്ങിയ സൗന്ദര്യവര്‍ധക വസ്‌തുക്കളില്‍ മാത്രം ഒതുങ്ങുന്നതല്ല. മുഖസൗന്ദര്യത്തില്‍ ഓരോ അവയവത്തിനും അതിന്റേതായ പ്രാധാന്യമുണ്ട്‌.
അതില്‍ എടുത്തു പറയേണ്ടതാണ്‌ കണ്ണുകളുടെ ആകര്‍ഷണീയത. പ്രായമാകുന്നതോടെ മിക്കവരിലും കണ്ണിനടിവശം ഇടിഞ്ഞൂ തൂങ്ങി കാണപ്പെടാറുണ്ട്‌. ക്ഷീണിച്ചു
തളര്‍ന്ന ഭാവമായിരിക്കും ഇവരുടെ കണ്ണുകള്‍ക്ക്‌ എപ്പോഴും.
ചര്‍മത്തിന്റെ ഇലാസ്‌തികത നഷ്‌ടപ്പെടുമ്പോള്‍ കണ്‍തടങ്ങള്‍ ഇടിഞ്ഞു തൂങ്ങി തടിക്കുന്നു. ബ്ലിഫറോപ്ലാസ്‌റ്റി എന്ന ശസ്‌ത്രക്രിയയിലൂടെ ഈ പ്രശ്‌നം പരിഹരിക്കാവുന്നതാണ്‌. അയഞ്ഞുവരുന്ന ഭാഗം പൂര്‍വസ്‌ഥിതിയില്‍വച്ച്‌ അയഞ്ഞ ത്വക്ക്‌ മുറുക്കുന്ന രീതിയാണിത്‌.
ചികിത്സ
പ്രായം കൂടിയവരില്‍ കണ്ണിന്റെ അടിഭാഗം തടിച്ചുവരുന്ന അവസ്‌ഥയ്‌ക്കു ശസ്‌ത്രക്രിയയിലൂടെ ശാശ്വത പരിഹാരം സാധ്യമാണ്‌. ഈ ശസ്‌ത്രക്രിയയിലൂടെ ബലക്ഷയം സംഭവിച്ച പേശികളെ പൂര്‍ണമായും ബലപ്പെടുത്താവുന്നതാണ്‌. കണ്‍പീലിയ്‌ക്കുതൊട്ടുള്ള വരയില്‍കൂടിയാണ്‌ ശസ്‌ത്രക്രിയ ചെയ്യുന്നത്‌.
അതിനാല്‍ പുറമേ മുറിവ്‌ കാണുന്നില്ല. ചിലരില്‍ കണ്ണിനകത്തുകൂടിയും ഈ ശസ്‌ത്രക്രിയ ചെയ്യാറുണ്ട്‌. ആദ്യത്തെ ഒരാഴ്‌ച മുഖത്ത്‌ നീര്‌ ഉണ്ടാകാം. രണ്ടാഴ്‌ച കൊണ്ട്‌ നീര്‌ പൂര്‍ണമായും മാറുകയും മാറ്റം പ്രകടമാകുകയും ചെയ്യുന്നു.
നാല്‌പത്‌ വയസിനു താഴെയുള്ളവരില്‍ കണ്ണിന്റെ അടിഭാഗത്ത്‌ കൊഴുപ്പ്‌ അടിഞ്ഞു കൂടുന്നതുമൂലം തടിപ്പ്‌ കാണാറുണ്ട്‌. ഇത്‌ കണ്ണിനകത്തുകൂടിയുള്ള ശസ്‌ത്രക്രിയവഴി നീക്കം ചെയ്യാവുന്നതാണ്‌.
ശ്രദ്ധിക്കാന്‍
- ശസ്‌ത്രക്രിയക്കുശേഷം മൂന്നാഴ്‌ച മുതല്‍ മുന്ന്‌ മാസംവരെ തുടര്‍ പരിശോധനകള്‍ നടത്തണം.
- അധികം ഭാരമുള്ള ജോലികള്‍ ചെയ്യരുത്‌.
- ഒരാഴ്‌ച ജിമ്മില്‍ പോകരുത്‌.
ആകര്‍ഷകമായ കവിളുകള്‍
ഒട്ടിയകവിളുകള്‍ പലപ്പോഴും നമ്മുടെ സൗന്ദര്യ സങ്കല്‌പങ്ങളെ തകര്‍ത്തു കളയാറുണ്ട്‌. മുഖത്തിന്റെ രൂപലാവണ്യത്തില്‍ അല്‌പം തുടുത്ത കവിളുകള്‍ക്ക്‌ തന്നെയാണ്‌ ആകര്‍ഷണീയത.
കവിളിനുമുകളിലുള്ള എല്ല്‌ പതിഞ്ഞിരിക്കുന്ന അവസ്‌ഥയാണ്‌ കവിളുകള്‍ പതിഞ്ഞിരിക്കുന്നതിന്‌ ഒരു പ്രധാന കാരണം. ഇംപ്ലാന്റിന്റെ സഹായത്തോടെ ഈ പ്രശ്‌നം ശരിയാക്കാവുന്നതാണ്‌.
ഓരോരുത്തരുടെയും ആകൃതിക്കിണങ്ങുന്ന ഇംപ്ലാന്റുകള്‍ വച്ചു പിടിപ്പിക്കുന്ന രീതിയാണിത്‌. ഇംപ്ലാന്റുകള്‍ യാതൊരു വിധത്തിലും ശരീരത്തെ ബാധിക്കുകയില്ല.
വിദേശ നിര്‍മ്മിത സിലിക്കോണ്‍ ഇംപ്ലാന്റുകളാണ്‌ ഉപയോഗിക്കുന്നത്‌. ഇംപ്ലാന്റുകള്‍ ഉപയോഗിക്കുന്നതിലൂടെ ഒട്ടിയകവിളുകള്‍ക്ക്‌ ശാശ്വതപരിഹാരം സാധ്യമാണ്‌. കൊഴുപ്പ്‌ കുത്തിവയ്‌ക്കുന്നതിലൂടെയും കവിള്‍ ഉയര്‍ത്താവുന്നതാണ്‌.
ചുണ്ടുകള്‍ ആകര്‍ഷകമാക്കാം
ചുണ്ടുകളുടെ വശ്യതയില്‍ സൗന്ദര്യം നിറഞ്ഞു നില്‍ക്കുന്നതായി പറയാറുണ്ട്‌. സൗന്ദര്യത്തെകുറിച്ചു ചിന്തിക്കുമ്പോള്‍ ഒരു നേര്‍ത്ത പുഞ്ചിരിക്കൊപ്പം ചുണ്ടുകളുടെ സൗന്ദര്യവും കടന്നുവരുന്നു.
കണ്ണുപോലെതന്നെ മുഖത്തെ ആകര്‍ഷക ഘടകമാണ്‌ ചുണ്ടുകള്‍. എന്നാല്‍ വലിപ്പക്കുറവ്‌, വലിപ്പക്കൂടുതല്‍ എന്നിങ്ങനെ പല പ്രശ്‌നങ്ങളും ചുണ്ടുകളുടെ സൗന്ദര്യം കെടുത്തിക്കളയാം. ബോട്ടക്‌സ് കുത്തിവയ്‌പ്പുപോലെ തന്നെ ഫില്ലര്‍ കുത്തിവയ്‌പ്പിലൂടെ ചുണ്ടുകളുടെ വലിപ്പം കൂട്ടാവുന്നതാണ്‌.
ചികിത്സ
ഫില്ലര്‍ കുത്തിവയ്‌പ്പിന്റെ കാലപരിധി ഒരു വര്‍ഷമാണ്‌. അതുകഴിഞ്ഞ്‌ വീണ്ടും കുത്തിവയ്‌പ്പ് എടുക്കണം. ഈ കുത്തിവയ്‌പ്പിലൂടെ ശസ്‌ത്രക്രിയ കൂടാതെതന്നെ ചുണ്ടിന്റെ വലിപ്പം കൂട്ടാവുന്നതാണ്‌.
കുത്തിവയ്‌പ്പ് എടുത്ത്‌ ഉടന്‍തന്നെ മാറ്റം അറിയാന്‍ കഴിയും. വായിക്കകത്തുകൂടി ചെയ്യുന്ന ശസ്‌ത്രക്രിയയിലൂടെ ചുണ്ടുകളുടെ വലിപ്പം കുറയ്‌ക്കാവുന്നതാണ്‌.
ആ ഭാഗത്തെ കോശങ്ങളെ നശിപ്പിക്കുകയാണ്‌ ശസ്‌ത്രക്രിയയിലൂടെ ചെയ്യുന്നത്‌. ചുണ്ടുകളുടെ വലിപ്പം കുറയ്‌ക്കാനുള്ള ശസ്‌ത്രക്രിയകള്‍ അപൂര്‍വമായി മാത്രമേ കേരളത്തില്‍ നടത്താറുള്ളൂ.
വടിവൊത്ത കഴുത്ത്‌
മുഖസൗന്ദര്യത്തിനൊപ്പം തന്നെ സൗന്ദര്യത്തിന്റെ അളവുകോലാണ്‌ കഴുത്തിന്റെ സൗന്ദര്യവും. ഇടിഞ്ഞു തൂങ്ങിയ ചര്‍മം കഴുത്തിന്റെ സൗന്ദര്യത്തെ പ്രതികൂലമായി ബാധിക്കാം.
വാര്‍ധക്യ ലക്ഷണമായി പലരുടെയും കഴുത്തിലെ തൊലി ഇടിഞ്ഞു തൂങ്ങാറുണ്ട്‌. കഴുത്തിലെ തൊലികള്‍ക്കിടയില്‍ സ്‌ഥിതി ചെയ്യുന്ന
മാംസപേശികളുടെ ശോഷണം മൂലമാണ്‌ ഇങ്ങനെ സംഭവിക്കുന്നത്‌.
ശസ്‌ത്രക്രിയവഴി ചുളിവുള്ള ഭാഗത്തെ പേശികള്‍ ബലപ്പെടുത്തി അധികമുള്ള ചര്‍മ്മംനീക്കം ചെയ്യുന്നതിലൂടെ ഈ പ്രശ്‌നം പരിഹരിക്കാവുന്നതാണ്‌.
പ്ലാസ്‌റ്റിക്‌ സര്‍ജറിയുടെ ഒരു വിഭാഗമാണ്‌ കോസ്‌മെറ്റിക്‌ സര്‍ജറി. സൗന്ദര്യശസ്‌ത്രക്രിയകള്‍ ചെയ്യുന്നത്‌ ഒരു രോഗിക്കല്ല. സൗന്ദര്യ സംബന്ധമായ അഭംഗികള്‍ ഒഴിവാക്കാനാണ്‌.
പുരികത്തിന്റെ പ്രശ്‌നങ്ങള്‍
കണ്‍പോളകള്‍ ഇടിഞ്ഞു താഴേക്കു വരുന്ന അവസ്‌ഥ മിക്കവരെയും അലട്ടുന്ന പ്രശ്‌നമാണ്‌. കണ്ണുകളുടെ സൗന്ദര്യത്തെ മാത്രമല്ല മുഖത്തിന്റെ മൊത്തത്തിലുള്ള പ്രസരിപ്പുതന്നെ ഇത്‌ ഇല്ലാതാക്കുന്നു.
കണ്‍പോളകളെ മുകളിലേക്ക്‌ ഉയര്‍ത്തുന്ന പേശീകളുടെ ബലഹീനതമൂലമാണ്‌ കണ്ണുകള്‍ പാതി അടഞ്ഞ അവസ്‌ഥയില്‍ കാണപ്പെടുന്നത്‌.
പലപ്പോഴും പ്രായമായവരിലാണ്‌ ഈ പ്രശ്‌നം കൂടുതലായി കണ്ടുവരുന്നത്‌. ആളുകളെ ഏറ്റവും കൂടുതല്‍ അലട്ടുന്ന സൗന്ദര്യപ്രശ്‌നമായി ഇത്‌ മാറിക്കഴിഞ്ഞിരിക്കുന്നു.
ശസ്‌ത്രക്രിയയിലൂടെയല്ലാതെ തന്നെ ഈ പ്രശ്‌നം പരിഹരിക്കാവുന്നതാണ്‌. ബോട്ടക്‌സ് കുത്തിവയ്‌പ്പ് എന്നാണ്‌ ഇത്‌ അറിയപ്പെടുന്നത്‌.
ബോട്ടക്‌സ് കുത്തിവയ്‌പ്പ് വഴി ചില മസിലുകളുടെ ശക്‌തി കുറയുകയും കണ്‍തടങ്ങള്‍ മുകളിലേക്ക്‌ ഉയര്‍ത്തുന്ന മസിലുകള്‍ക്ക്‌ കൂടുതല്‍ ശക്‌തി കിട്ടുകയും ചെയ്യുന്നു.
ഇതുവഴി പുരികം മുകളിലേക്ക്‌ ഉയരുകയും കണ്ണുകള്‍ കൂടുതല്‍ ആകര്‍ഷകവുമാകുന്നു. എന്നാല്‍ 60 വയസ്‌ കഴിഞ്ഞവരില്‍ ഈ പ്രശ്‌നം പരിഹരിക്കാന്‍ ശസ്‌ത്രക്രിയ ആവശ്യമായി വരുന്നു.
ചികിത്സ
ബോട്ടക്‌സ് കുത്തിവയ്‌പ്പ് എടുത്ത്‌ ഒരാഴ്‌ചകൊണ്ടുതന്നെ മാറ്റം അറിയാന്‍ കഴിയും. ആറുമാസംവരെയാണ്‌ ഈ കുത്തിവയ്‌പ്പിന്റെ കാലപരിധി.
അതിനുശേഷം വീണ്ടും മസിലുകള്‍ പഴയ രൂപത്തില്‍ ആകുമെന്നതിനാല്‍ ആറുമാസം കൂടുമ്പോള്‍ ബോട്ടക്‌സ് കുത്തിവയ്‌പ്പ് എടുക്കണം. നെറ്റിയിലാണ്‌ കുത്തിവയ്‌പ്പ് എടുക്കുന്നത്‌.
ഈ കുത്തിവയ്‌പ്പ് ഭാവിയില്‍ യാതൊരുവിധ പാര്‍ശ്വഫലങ്ങളും ഉളവാക്കുന്നില്ല. മാത്രമല്ല ആശുപത്രിയില്‍ കിടക്കേണ്ടിവരുന്നില്ല. വിശ്രമത്തിന്റെ ആവശ്യവുമില്ല. എന്നാല്‍ കുത്തിവയ്‌പ്പ് എടുത്തശേഷം ആദ്യത്തെ നാല്‌ മണിക്കൂര്‍ കിടക്കാതെ നോക്കണം.
ശ്രദ്ധിക്കാന്‍
- വിദഗ്‌ധനായ ഒരു കോസ്‌മെറ്റിക്‌ സര്‍ജന്റെ അടുത്തുമാത്രമേ ശസ്‌ത്രക്രിയ നടത്താവൂ.
- മുഖം അധികം ചലിപ്പിച്ചുള്ള പ്രവര്‍ത്തികള്‍ ചെയ്യരുത്‌.
- ആദ്യത്തെ രണ്ടു ദിവസം മുഖം കഴുകുന്നത്‌ ഒഴിവാക്കുക.
- ശസ്‌ത്രക്രിയക്കുശേഷം മൂന്നാഴ്‌ച പുകവലിക്കരുത്‌.
- ഡോക്‌ടര്‍ നിര്‍ദേശിക്കുന്ന കാര്യങ്ങള്‍ കൃത്യമായി പാലിക്കുകയും തുടര്‍ പരിശോധനകള്‍ നടത്തുകയും വേണം.
- ശസ്‌ത്രക്രിയക്കുശേഷം ആദ്യത്തെ മൂന്നാഴ്‌ച കുനിഞ്ഞുള്ള ജോലികളും കഠിനാധ്വാനം ആവശ്യമായി വരുന്ന ജോലികളും ഒഴിവാക്കുക.
അവസാനം പരിഷ്കരിച്ചത് : 2/15/2020
