ആരോഗ്യസംരക്ഷണം വീട്ടില്‍ തുടങ്ങാം

ആമുഖം

നമ്മുടെ വീട്ടുപറമ്പുകളിൽ സുലഭമായി ലഭിക്കുന്ന ഔഷധസസ്യങ്ങൾ ആരോഗ്യ സംരക്ഷണത്തിനും രോഗനിയന്ത്രണത്തിനും പ്രയോജനപ്പെടുത്താവുന്നതാണ്. ഗുണനിലവാരമുള്ള, ശരിയായ മൂപ്പെത്തിയ, ഗൃഹവൈദ്യത്തിനുള്ള പച്ചമരുന്ന് ആവശ്യാനുസരണം വീട്ടുവളപ്പിൽ തന്നെ വളർത്തിയെടുക്കാം. കഴിയുന്നത്ര അവയുടെ സ്വാഭാവിക ആവാസ വ്യവസ്ഥയിലെ സാഹചര്യങ്ങൾ നിലനിർത്തി ജൈവകൃഷി രീതികളിലൂടെ ഔഷധസസ്യങ്ങൾ വളർത്തണം. തെങ്ങിന്റെയും, മറ്റു ചിരസ്ഥായി വിളകളുടേയും ഇടവിളകളായി വീട്ടുവളപ്പിൽ വളർത്താവുന്ന അനേകം ഔഷധികളുണ്ട്.

പെട്ടെന്ന് ഉണ്ടാകുന്ന പല രോഗങ്ങൾക്കും വിദഗ്ധചികിത്സ ലഭിക്കുന്നതു വരെ താത്ക്കാലിക ശമനത്തിന് ഗൃഹവൈദ്യം ഉപയോഗപ്പെടുത്താം. അനുയോജ്യമായ ഗൃഹഔഷധികൾ കൊണ്ട് പല രോഗങ്ങളേയും തുടക്കത്തിൽ തന്നെ നമുക്ക് ഭേദമാക്കാവുന്നതാണ്. വിദഗ്ദ്ധ വൈദ്യോപദേശം എപ്പോഴും നന്നായിരിക്കും. വീടിന്റെ പരിസരത്ത് വളർത്താവുന്നതും ലളിതമായും ഫലപ്രദമായും ഗൃഹവൈദ്യത്തിന് ഉപയോഗപ്പെടുത്താവുന്നതുമായ ഏതാനും സസ്യങ്ങളെപ്പറ്റിയാണിവിടെ പ്രതിപാദിക്കുന്നത്.

അശോകം

15 മീറ്റർ വരെ ഉയരത്തിൽ വളരുന്ന നിത്യഹരിത വൃക്ഷമാണിത്. പുഷ്പങ്ങൾ മനോഹരങ്ങളും കുലയായിട്ടുള്ളതുമാണ്. തണലിൽ വളരുമെന്നുള്ളതിനാൽ വീട്ടുവളപ്പിൽ നടുവാനും അനുയോജ്യം. സ്ഥലപരിമിതിക്കനുസരിച്ച് മരം കോതി ഒതുക്കി വളർത്താം.

അശോകത്തൊലി കഷായമായും പാൽ കഷായമായും സ്ത്രീകളിലെ അമിത രക്തസ്രാവത്തിന് ഉപയോഗപ്പെടുത്താം. അശോകത്തിന്റെ പൂവ് ചതച്ച് വെളിച്ചെണ്ണയിൽ ഇട്ട് മൂപ്പിച്ച് അല്ലെങ്കിൽ ഉണക്കിപ്പൊടിച്ച് കല്ക്കമായി വെളിച്ചെണ്ണ കാച്ചിപ്പുരട്ടിയാലും, വെളിച്ചെണ്ണയിൽ ചാലിച്ച് പുരട്ടിയാലും കുട്ടികൾക്കുണ്ടാകുന്ന ത്വക്ക് രോഗങ്ങൾ (കരപ്പൻ, ചൊറി, ചിരങ്ങ്) ശമിക്കുന്നതാണ്.

ആര്യവേപ്പ്

അന്തരീക്ഷ മലിനീകരണത്തെ നിയന്ത്രിക്കുവാൻ ശേഷിയുള്ള ആര്യവേപ്പ് എല്ലാ വീട്ടിലും നട്ടുവളർത്തേണ്ട ഔഷധവൃക്ഷമാണ്. ആര്യവേപ്പിന്റെ ഇല, വിത്ത്, തൊലി, എണ്ണ എന്നിവ വാത-ത്വക് രോഗങ്ങൾക്ക് പ്രതിവിധിയായി ഉപയോഗിക്കാറുണ്ട്. എന്നാൽ വേപ്പെണ്ണ, വേപ്പിലച്ചാറ് എന്നിവ അനിയന്ത്രിതമായ അളവിൽ ഉള്ളിൽ ചെല്ലുന്നത് ആന്തരാവയവങ്ങളെ ദോഷകരമായി ബാധിക്കും.

ആര്യവേപ്പിലയും പച്ചമഞ്ഞളും അരച്ച് നിത്യവും ശരീരമാസകലം തേച്ചു കുളിക്കുന്നത് ത്വക്ക് രോഗങ്ങളോടനുബന്ധിച്ചുള്ള പാടുകൾ മാറുവാൻ നല്ലതാണ്. ചൊറി, ചിരങ്ങ്, വ്രണങ്ങൾ എന്നിവയ്ക്ക് ആര്യവേപ്പിലയിട്ടു തിളപ്പിച്ച വെളളം കൊണ്ട് കഴുകുകയും വേപ്പിലയും, മഞ്ഞളും ചേർത്തരച്ച് പുരട്ടുകയും ചെയ്യുക.

പല്ലുവേദന, മോണപഴുപ്പ് എന്നിവയ്ക്ക് വേപ്പിൻകായ്, പടിക്കാരം, കറിയുപ്പ് ഇവ സമം പൊടിച്ച് അതുകൊണ്ട് പല്ല് തേക്കുക. വേപ്പിന്റെ തണ്ടുകൊണ്ട് പല്ല് തേക്കാവുന്നതാണ്. ആര്യവേപ്പില അരച്ച് പുരട്ടുന്നത് പൊള്ളലിനു നല്ലതാണ്. കൃമിശല്യത്തിന് ആര്യവേപ്പില അരച്ച് ഉരുട്ടി ഒരു നെല്ലിക്കായുടെ വലിപ്പത്തിൽ കഴിക്കാം. അല്ലെങ്കിൽ വേപ്പില ചതച്ചു പിഴിഞ്ഞെടുത്ത നീരിൽ ഉപ്പും ചേർത്ത് സേവിക്കാവുന്നതാണ്.

ആര്യവേപ്പിലയും പച്ചമഞ്ഞളും അരച്ച് വിഷജന്തുക്കൾ കടിച്ച ഭാഗത്ത് പുരട്ടിയാൽ വിഷശമനം ലഭിക്കും. വീടിനുള്ളിലെ പുസ്തകങ്ങളും വസ്ത്രങ്ങളും നശിപ്പിക്കുന്ന കീടങ്ങളെ ഇല്ലാതാക്കുന്നതിന് വേപ്പില ഉണക്കി വിതറിയാൽ മതിയാവുന്നതാണ്. മുടി കൊഴിച്ചിൽ, താരൻ എന്നിവയ്ക്ക് ആര്യവേപ്പിലയിട്ടു തിളപ്പിച്ചാറിയ വെള്ളം കൊണ്ട് തല പതിവായി കഴുകുക.

ദന്തപ്പാല/വെട്ടുപാല

വരണ്ട കാലാവസ്ഥയിൽ ഏകദേശം 10 മീ. ഉയരത്തിൽ വളരുന്ന ഇലപൊഴിയുന്ന വൃക്ഷമാണ് ദന്തപ്പാല. പൂക്കൾ വെള്ളനിറമുള്ളതും വാസനയുള്ളവയുമാണ്. പ്രധാനമായും ഇല, തൊലി, വിത്ത് എന്നിവയാണ് ഔഷധമായി ഉപയോഗിക്കുന്നത്. ദന്തപ്പാലയുടെ ഇല

ചെറുകഷണങ്ങളാക്കി വെളിച്ചെണ്ണയിലിട്ട് ഒന്നുരണ്ടു മണിക്കൂർ വെയിലത്ത് വച്ച് ചൂടാക്കിയ ശേഷം തലയിൽ പുരട്ടിയാൽ താരനു ശമനം കിട്ടും. ദന്തപ്പാല ഇലയുടെ നീരും ദന്തപ്പാലയിലയിട്ടു കാച്ചിയ എണ്ണയും സോറിയാസിസ് എന്ന രോഗത്തിന് ഫലപ്രദമായ ഔഷധമാണ്. ദന്തപ്പാലയുടെ ഇലനുള്ളി ചെറുകഷണങ്ങളാക്കി ഒരു മൺചട്ടിയിലിട്ട് മൂടത്തക്കവണ്ണം വെളിച്ചെണ്ണ ഒഴിച്ച് (1 കിലോ ഇലക്ക് 1 കി.ഗ്രാം വെളിച്ചെണ്ണ) 7 ദിവസം വെയിലത്ത് വച്ച് എട്ടാം ദിവസം ഇല പിഴിഞ്ഞ് എണ്ണ അരിച്ചെടുക്കാം. എണ്ണ പുരട്ടി 2 മണിക്കൂർ ഇരുന്നശേഷം സോപ്പ് തേക്കാതെ കുളിക്കണം. ഈ എണ്ണ വൈദ്യനിർദ്ദേശപ്രകാരം അകത്തേക്ക് കഴിക്കാവുന്നതുമാണ്.

തുളസി

എല്ലാ വീടുകളിലും വേണ്ടതായ ഒരു നിത്യഹരിത കുറ്റിച്ചെടിയാണിത്. തുളസിയുടെ എല്ലാ ഭാഗങ്ങൾക്കും ഔഷധഗുണമുണ്ട്. ദാഹം, ക്ഷീണം, ദഹന പ്രശ്നങ്ങൾ എന്നിവയ്ക്കും രോഗപ്രതിരോധത്തിനും തുളസിയിലയിട്ട് വെള്ളം തിളപ്പിച്ച് കുടിക്കുന്നത് വളരെ നല്ലതാണ്.

ജലദോഷത്തിനും ശ്വാസകോശരോഗങ്ങൾക്കും തുളസിയില ചതച്ചു പിഴിഞ്ഞെടുത്ത 10 മില്ലി നീരിൽ ചെറുതേൻ സമം ചേർത്ത് പലവട്ടം സേവിക്കുക. തുളസി സമം നാരങ്ങാനീരും ചേർത്തു മുഖത്തു പുരട്ടിയാൽ കറുത്ത പുള്ളികൾ, നിറ വ്യത്യാസം എന്നിവ മാറും. വിശപ്പില്ലായ്മയ്ക്ക് തുളസിയില അൽപ്പം ഉപ്പുമായി തിരുമ്മി പിഴിഞ്ഞെടുത്ത നീര് കുടിക്കുക. കുഴിനഖത്തിന് തുളസിയിലയിട്ടു മൂപ്പിച്ച വെളിച്ചെണ്ണ പുരട്ടുക അല്ലെങ്കിൽ. തുളസിയിലയും ഉപ്പും തേനിൽ അരച്ചു പുരട്ടുക. തലയിലെ പേൻ ശല്യത്തിന് തുളസിയില അരച്ചു തലയിൽ പുരട്ടുക. മുഖക്കുരുവിനും പുഴുക്കടിപോലുള്ള അസുഖങ്ങൾക്കും തുളസിയില നീര് പുറമേ പുരട്ടുക. തലവേദനയ്ക്ക് തുളസിയിലനീര് അല്ലെങ്കിൽ വേര് നന്നായരച്ച് ഒന്നു രണ്ടു തവണ നെറ്റിയിൽ പുരട്ടുക. അലർജി നിമിത്തമുള്ള തുമ്മലിന് കൃഷ്ണതുളസിയില ചതച്ചിട്ട് എണ്ണ മൂപ്പിച്ച് പതിവായി തലയിൽ തേക്കുക.

ഇലയും വേരും സമം നന്നായരച്ച് തേൾ കടിച്ച ഭാഗത്തു പുരട്ടിയാൽ വിഷം ശമിക്കും. കടന്നൽ വിഷത്തിന് തുളസിയില അരച്ച് പുരട്ടുകയും ഇലനീരിൽ ചുക്ക്, കുരുമുളക്, തിപ്പലി ഇവ പൊടിച്ച് കലക്കി കുടിക്കുകയും ചെയ്യുക. ചിലന്തിവിഷത്തിന് തുളസിയില നീരിൽ പച്ചമഞ്ഞൾ അരച്ചുകലക്കി പാലിലോ തണുത്തവെള്ളത്തിലോ കുടിക്കുകയും പുറമേ പുരട്ടുകയും ചെയ്യുക.

നീർമരുത്

വ്യാപിച്ച വൃക്ഷത്തലപ്പുകളോടുകൂടിയ തണൽവൃക്ഷം. തൊലിയാണ് ഉപയോഗഭാഗം. 10 വർഷം ആകുന്നതു മുതൽ തൊലി ശേഖരിക്കാൻ തുടങ്ങാം. 5 സെ.മീ. വീതിയും 25 സെ.മീ. നീളവുമുള്ള പാളികളായിട്ടാണ് തൊലി ശേഖരിക്കുന്നത്. തൊലി വായു സഞ്ചാരമുള്ള സ്ഥലത്ത് തണലിൽ ഉണക്കണം. തുടർന്ന് പെട്ടികളിലോ പോളിത്തീൻ ബാഗുകളിലോ സൂക്ഷിക്കാം.

ഹൃദയത്തിന്റെ ശരിയായ പ്രവർത്തനത്തിനും ഉത്തേജനത്തിനും ഒരുത്തമ ഔഷധമാണിത്. 10 ഗ്രാം നീർമരുതിൻതോൽ ചൂർണ്ണം പാലിൽ കലക്കി തേൻ മേമ്പൊടി ചേർത്തു ദിവസേന കാലത്തു കഴിക്കുന്നത് അല്ലെങ്കിൽ നീർമരുതിൻ തൊലി കഷായം വച്ച് പതിവായി രണ്ടു നേരം കഴിക്കുന്നത് കാർഡിയാക് ടോണിക്കാണ്. മൂത്രമൊഴിക്കുമ്പോൽ കൂടെക്കൂടെയുണ്ടാവുന്ന വേദന, മൂത്രത്തോടു കലർന്നു കാണുന്ന രക്തം, മൂത്രത്തിലൂടെ വിസർജിക്കപെടുന്ന ചെറിയ കല്ലുകൾ, ഇവയെല്ലാം മൂത്രക്കല്ലുണ്ടെന്നു കാണിക്കുന്ന ലക്ഷണങ്ങളാണ്. അപ്പോൾ നീർമരുതിൻ തൊലി ഉണക്കി പൊടിയാക്കി 10 ഗ്രാം വീതം മോരിൽ കാലത്തു കഴിക്കുക. നീർമരുതില അരച്ചിടുന്നത് മുഖക്കുരു, വ്രണം, ചർമരോഗങ്ങൾ എന്നിവയ്ക്ക് നല്ലതാണ്. ഇതിന്റെ തൊലി തേനിലരച്ചിട്ടാൽ മുഖക്കുരു ശമിക്കുന്നതാണ്.

ആടലോടകം

കഫക്കെട്ടിനും ചുമയ്ക്കും എതിരെയുള്ള സിദ്ധൗഷധമാണ് ആടലോടകം. ആടലോടകം രണ്ടു തരമുണ്ട്. ചെറിയ ആടലോടകവും (Adhatoda beddomei) വലിയ ആടലോടകവും (Adhatoda vasica). ചെറിയ ആടലോടകത്തിന്റെ ഇലയ്ക്കും വേരിനുമാണ് ഔഷധ ഗുണം ഏറെയുള്ളത്. അത്യുല്‍പാദന ശേഷിയുള്ള രണ്ടിനങ്ങൾ (അജഗന്തി, വാസിക) കേരള കാർഷികസർവ്വകലാശാലയിൽ വികസിപ്പിച്ചെടുത്തിട്ടുണ്ട്. ഇല ആവശ്യാനുസരണം ശേഖരിക്കാം. വേരിനായി ശേഖരിക്കുമ്പോൾ 2 വർഷം കഴിഞ്ഞ് പറിക്കുന്നതാണ് നല്ലത്. മണ്ണിളക്കി വേരു ശേഖരിച്ച് വെള്ളത്തിൽ കഴുകി വൃത്തിയാക്കി പച്ചയായോ ഉണക്കിയോ ഉപയോഗിക്കാം.

ആടലോടകത്തില വാട്ടിപ്പിഴിഞ്ഞ നീരിൽ ഒരു സ്പൂൺ വീതം തുല്യ അളവ് ചെറുതേനോ കല്‍ക്കണ്ടമോ ചേർത്ത് കഴിക്കുന്നത്, അല്ലെങ്കിൽ ആട്ടിൻ പാൽ ചേർത്ത് കാച്ചി കഴിക്കുന്നത് ആസ്ത്മ, ചുമ ഇവ ശമിപ്പിക്കും. ആടലോടകത്തിന്റെ ഇല വാട്ടിപ്പിഴിഞ്ഞ് നീരും കുരുമുളകും കൂടി കഴിക്കുന്നതും ആസ്ത്മ നിയന്ത്രിക്കാൻ സഹായിക്കും. സ്ത്രീകളിലെ അമിത രക്തസ്രാവത്തിന് ആടലോടകത്തില വാട്ടിപ്പിഴിഞ്ഞ നീരിൽ (15മി.ലി) തേനും പഞ്ചസാരയും ചേർത്തു കഴിക്കുക അല്ലെങ്കിൽ 15ഗ്രാം ശർക്കരയിൽ ചേർത്ത് 2 നേരം കഴിക്കുക. ഇലനീര് തൊണ്ടയിലെ അണുബാധ നിയന്ത്രിക്കാൻ സഹായിക്കും.

നീലയമരി

ശാഖോപശാഖകളോടുകൂടിയതും ഒരു മീറ്റർ വരെ പന്തലിച്ചുനില്ക്കുന്നതുമായ നീലയമരിയുടെ ഇലകൾ, ചെറുതും, നീല കലർന്ന പച്ചനിറത്തോടു കൂടിയതുമാണ്. ഏകദേശം 1.5-2 മാസം ഇടവിട്ട് 30 സെ. മീ. ഉയരത്തിൽ വച്ച് ചെടികൾ മുറിച്ചെടുക്കാം. മുടി വളരുന്നതിനും മുടികൊഴിച്ചിൽ കുറയ്ക്കുന്നതിനും അകാലനര തടയുന്നതിനും അമരിയിലയുടെ നീര് എണ്ണകാച്ചി തേക്കുന്നത് ഉത്തമമാണ് അല്ലെങ്കിൽ ഇല, അത്രയും തൂക്കം എണ്ണ ചേർത്ത് ഏഴു ദിവസം വെയിലത്തു വച്ച് അരിച്ച് പിഴിഞ്ഞ് ഉപയോഗിക്കാം. വിഷജന്തുക്കൾ കടിച്ചാൽ നീലയമരിച്ചെടി സമൂലമെടുത്ത് അരച്ച് മുറിവിൽ പുരട്ടുകയും ഇലയുടെ നീര് കുടിക്കുകയും ചെയ്യുന്നതും നല്ലതാണ്. ത്വക്ക് രോഗങ്ങൾ, പൊള്ളൽ, വ്രണം മുതലായവയ്ക്ക് ഇല ബാഹ്യമായി അരച്ചിടാവുന്നതാണ്.

മൈലാഞ്ചി

രണ്ടു മീറ്റർ വരെ ഉയരത്തിൽ വളരുന്ന കുറ്റിചെടിയാണിത്. ഇല, പൂവ് എന്നിവയാണ് ഔഷധോപയോഗഭാഗങ്ങൾ. മുടികൊഴിച്ചിൽ, അകാലനര എന്നിവയ്ക്ക് അരച്ചമൈലാഞ്ചിയില വെളിച്ചെണ്ണ കാച്ചി തലയിൽ തേയ്ക്കുക. അല്ലെങ്കിൽ മൈലാഞ്ചിയിലയരച്ച് നിഴലിലുണക്കി എണ്ണയിൽ ചാലിച്ച് പതിവായി തേയ്ക്കുക. മുടി കറുപ്പാകുന്നതിനും, താരൻ നശിക്കുന്നതിനും ഈ പ്രയോഗം നല്ലതാണ്. ഇതിന്റെ പൂവും, ഇലയും, ചിറ്റമൃത് ഇലയും കൂടി അരച്ച് കലക്കി സമം എണ്ണയും ചേർത്ത് നീർ വറ്റിച്ച് തലയിൽ തേച്ചാൽ മുടികൊഴിച്ചിൽ കുറയും, മുടിക്ക് നിറം വർദ്ധിക്കും. കുഴിനഖത്തിന് മൈലാഞ്ചിയിലയും, പച്ചമഞ്ഞളും കൂടിയരച്ച് നഖത്തിൽ പൊതിഞ്ഞു വയ്ക്കുക. വളം കടിക്ക് മൈലാഞ്ചിയില അരച്ചിടാം. ചുടുവാതത്തിനും നന്ന്. തലവേദനക്ക് ഇല അരച്ച് ഉമ്മം, പുളി, ഉപ്പ് എന്നിവ ചേർത്ത് തേക്കുക.

കറ്റാർവാഴ

വീട്ടുമുറ്റത്തോ ചെടിചട്ടികളിലോ വച്ചു പിടിപ്പിക്കാവുന്ന ഏതാണ്ട് 30-35 സെ.മീ. ഉയരത്തിൽ വളരുന്ന മാംസളപർണ്ണങ്ങളുള്ള ഔഷധചെടിയാണ് കറ്റാർവാഴ. ഔഷധയോഗ്യമായ ഭാഗം ഇലപ്പോളകളാണ്. ഇലപ്പോളനീര് ശേഖരിക്കാനായി, ഇലപ്പോളകളുടെ ചുവടുഭാഗവും അഗ്രഭാഗവും മുറിച്ചു മാറ്റി ഇല ചെറിയ കഷ്ണങ്ങളായി നുറുക്കി നല്ലപോലെ അരച്ചെടുക്കണം. അതിനുശേഷം, തുണിയിൽ പിഴിഞ്ഞ് നീരെടുക്കുന്നു. ഇങ്ങനെ ലഭിക്കുന്ന നീര് ഗൃഹവൈദ്യത്തിനായി ഉപയോഗിക്കാവുന്നതാണ്. കറ്റാർവാഴ നീര് ഉണക്കി പൊടി രൂപത്തിലാക്കാവുന്നതാണ്. ഇതാണ് ചെന്നിനായകം. പൊടിരൂപത്തിലാക്കുമ്പോള്‍, കൂടുതല്‍ കാലം സൂക്ഷിച്ചു വയ്ക്കാനാകും. ഒരു ടീസ്പൂണ്‍ കറ്റാര്‍വാഴനീര്, തേനും കൂട്ടി ദിവസം മൂന്നു നേരമെന്ന തോതില്‍ പത്ത് ദിവസം കഴിക്കുന്നത് ആര്‍ത്തവസമയത്തെ വേദന ശമിപ്പിക്കുന്നു. വയറുവേദനക്കും അസിഡിറ്റിക്കും കറ്റാർവാഴനീര് 5 മി.ലി വീതം ദിവസം രണ്ട് തവണ കഴിക്കുക. തീപ്പൊള്ളലിനും മറ്റ് പൊള്ളലുകൾക്കും കറ്റാർവാഴക്കുഴമ്പ് പച്ചമഞ്ഞളുമായി ചേർത്ത് പുരട്ടുക. കറ്റാർവാഴക്കുഴമ്പ് പുരട്ടുന്നത് ത്വക്ക് മ്യദുലമാക്കുന്നതിനും നിറം വർദ്ധിപ്പിക്കുന്നതിനും സഹായിക്കുന്നു.

തലമുടി വളർച്ചക്കും കറുപ്പിനും വേണ്ടി ഇതിന്റെ പോളകൾ അരിഞ്ഞിട്ട് എണ്ണമുറുക്കി തേയ്ക്കാം. കറ്റാർവാഴപ്പോളനീര് താളിയാക്കി തലയിൽ തേച്ചു കുളിച്ചാൽ മുടി വളരും. കറ്റാർവാഴപ്പോളച്ചാറിൽ അജ്നക്കല്ല് പൊടിച്ച് കല്ക്കമാക്കി വെളിച്ചെണ്ണയും ചേർത്ത് കാച്ചി പുരട്ടിയാൽ തലമുടി വളരുകയും കറുക്കുകയും ചെയ്യും.

തഴുതാമ

നിലം പറ്റി പടർന്നു വളരുന്ന ഒരു ചെടിയാണിത്. തഴുതാമയുടെ ഇല തോരൻ വെച്ച് പതിവായി കഴിക്കുന്നത് ആമവാതം, കരൾ രോഗങ്ങൾ, അൾസർ, വായ്പ്പുണ്ണ് എന്നീ രോഗങ്ങൾക്ക് നല്ലതാണ്. മൂത്രം പോകാൻ വിഷമമുള്ള പലഘട്ടങ്ങളിലും തഴുതാമവേര് കഷായം വച്ച് കഴിച്ചാൽ ഗുണകരമാണ്. പ്രത്യേകിച്ച് മൂത്രനാളീ വീക്കം, പൗരുഷഗ്രന്ഥി വീക്കം, മൂത്രക്കല്ല്  തുടങ്ങിയ രോഗങ്ങളിൽ ഈ കഷായം വളരെ ഫലം ചെയ്യും. ഉറക്കമില്ലായ്മ, രക്തവാതം, നേത്രരോഗങ്ങൾ എന്നിവയിലും തഴുതാമ കഷായം കഴിക്കുന്നത് ഫലപ്രദം. തഴുതാമ സമൂലം അരച്ച് 3 ഗ്രാം മുതൽ 6 ഗ്രാം വരെ ദിവസം രണ്ടുനേരം വീതം കഴിച്ചാൽ നീര് ശമിക്കും. യുവത്വം നിലനിർത്തുന്നതിന് പുതിയ വേര് മുപ്പതുഗ്രാം വീതമരച്ച് കാച്ചിയ പാലിൽ കലക്കി നിത്യേന സേവിക്കുക. കാസശ്വാസം, മഞ്ഞപ്പിത്തം എന്നിവക്കും തഴുതാമ കൊണ്ട് ശമനം ലഭിക്കും. തഴുതാമയുടെ തണ്ടും ഇലയും (ഒരുപിടി) കഴുകി വൃത്തിയാക്കി, ചെറുതാക്കി മുറിച്ചെടുത്ത് അഞ്ചുഗ്ലാസ് ശുദ്ധജലത്തിലിട്ട് തിളപ്പിക്കുക. നന്നായി തിളക്കുമ്പോൾ തീ കുറക്കുക. ചൂട് കുറയുമ്പോൾ ഒരു വലിയ കഷ്ണം പച്ച മഞ്ഞൾ ചേർത്ത് വീണ്ടും തിളപ്പിച്ച്, തണുപ്പിച്ച് ഉപയോഗിക്കാം. തഴുതാമനീര് കൊളസ്ട്രോൾ നിയന്ത്രിക്കാൻ സഹായിക്കും.

പനിക്കൂർക്ക

നല്ല വാസനയുള്ള ഒരു ചിരസ്ഥായി ഔഷധസസ്യമാണിത്. പനിക്കൂർക്കയുടെ ഇലയും തണ്ടും രോമാവൃതവും സുഗന്ധമുള്ളതുമാണ്. കർപ്പൂരവള്ളി എന്ന പേരിലും അറിയപ്പെടുന്നു. പനിക്കൂർക്കയുടെ ഇലകൾ മൂത്രവിരേചനീയമാണ്. മൂത്രവസ്തിയെ ശുദ്ധമാക്കാനും ഇതു സഹായകമാണ്. ഇല വാട്ടി നെറുകയിൽ പതിച്ചുവച്ചാൽ കുട്ടികൾക്കുണ്ടാകുന്ന ജലദോഷം, പനി, മൂക്കടപ്പ് ഇവ നിയന്ത്രിതമാകും. പനിക്കൂർക്കയില വാട്ടിപിഴിഞ്ഞെടുത്ത നീര് 10 തുളളി എടുത്ത് തേൻ അല്ലെങ്കിൽ പഞ്ചസാര ചേർത്ത് ദിവസം മൂന്നു നേരം എന്ന കണക്കിൽ രണ്ടോ മൂന്നോ ദിവസം കുട്ടികൾക്ക് കൊടുക്കുന്നതും പനിക്കൂർക്കയുടെ നീരെടുത്ത് ചെറുനാരങ്ങ നീരും പഞ്ചസാരയും ചേർത്ത് കൊടുക്കുന്നതും ജലദോഷം ശമിപ്പിക്കും. തൊണ്ടവേദനക്ക് പനിക്കൂർക്കയുടെ ഇല വെള്ളത്തിലിട്ട് തിളപ്പിച്ച് ആവികൊള്ളുക. ശ്വാസതടസത്തിന് പനിക്കൂർക്കയുടെ നീര് 8 തുളളി വീതം കഴിക്കുകയും ഇല കുഴമ്പ് നെഞ്ചിലും നെറ്റിതടത്തിലും പുരട്ടുകയും ചെയ്യുക. പഴുതാരയുടെ കുത്തേറ്റാൽ പനിക്കൂർക്കയുടെ ഇല കുഴമ്പുപരുവത്തിൽ തേക്കുന്നതു നല്ലതാണ്.

ബ്രഹ്മി

ബ്രഹ്മി ഈർപ്പമുള്ള പ്രദേശങ്ങളിലും ചെളിക്കുണ്ടുകളിലും നന്നായി വളരുന്നു. ധാരാളം ശാഖകളുള്ള ഔഷധിയാണ്. ബ്രഹ്മിനീര് 5 മുതൽ 10 മി.ലി അത്രയും വെണ്ണയോ നെയ്യോ ചേർത്ത് രാവിലെ പതിവായി കുട്ടികൾക്ക് കൊടുക്കുന്നത് ബുദ്ധിശക്തിയും ഓർമ്മ ശക്തിയും വർദ്ധിക്കുന്നതിനു സഹായകരമാണ്. ഒച്ചയടപ്പിന് ബ്രഹ്മി ഇടിച്ചു പിഴിഞ്ഞ നീരിൽ ചെറുതേൻ ചേർത്ത് ഒരു ടേബിൾസ്പൂൺ വീതം കഴിക്കുക. 10 മി.ലി ബ്രഹ്മിനീരും നാലിൽ ഒരു ഭാഗം ഇരട്ടി മധുരം പൊടിച്ചെടുത്തതും ചേർത്ത് കാച്ചിയ പാലിൽ കലർത്തി പതിവായി ഉപയോഗിക്കുന്നതും ബ്രഹ്മി നെയ്യിൽ വറുത്ത് സേവിക്കുന്നതും അകാലവാർദ്ധക്യത്തിനും ദീർഘായുസിനും നല്ലതാണ്.

മുയൽച്ചെവിയൻ

ഏതാണ്ട് 30 മുതൽ 60 സെ.മീ.വരെ ഉയരത്തിൽ വളരുന്ന ദശപുഷ്പങ്ങളിൽപ്പെടുന്ന ഒരു ഏകവർഷി ഔഷധിയാണ് മുയൽ ചെവിയൻ. ഇത് സമൂലം ഔഷധമായി ഉപയോഗിക്കുന്നു. മുയൽച്ചെവിയന്റെ ഇല ഉപ്പുചേർത്ത് തിരുമ്മിയെടുത്തനീര് തൊണ്ടയ്ക്കു പുറമേ പുരട്ടിയാൽ ടോൺസിലൈറ്റിസ് കുറയും. മുയൽച്ചെവിയൻ സമൂലമരച്ച് 3 മുതൽ 6 ഗ്രാം വരെ മോരിൽ ചേർത്ത് കഴിച്ചാൽ രക്താർശ്ശസ് ശമിക്കും. സമൂലം പച്ചയായെടുത്ത് ഇടിച്ചു പിഴിഞ്ഞ് അര ഔൺസുവീതം മൂന്നു ദിവസം തുടർച്ചയായി കുടിച്ചാൽ അല്ലെങ്കിൽ ഇല അരച്ച് അരിമാവ് ചേർത്ത് അപ്പം ചുട്ടു കഴിച്ചാൽ ഉദരകൃമി ശമിക്കും. ഇല തിളപ്പിച്ചു കുറുക്കി കഷായമാക്കി കഴിക്കുന്നത് പനി കുറയ്ക്കും.

മുത്തങ്ങ

വീട്ടമ്മമാർ സാധാരണ ഉപയോഗിച്ചു വരുന്ന ഔഷധമാണ് മുത്തങ്ങ. കിഴങ്ങാണ് ഔഷധയോഗ്യഭാഗം. താഴ്ന്ന പ്രദേശങ്ങളിലും വയലുകളിലും ചതുപ്പ് പ്രദേശത്തും പുൽത്തകിടികളിലും മറ്റും കളച്ചെടിയായി കാണപ്പെടുന്നു. പനിയുള്ളവർ മുത്തങ്ങയും പർപ്പടകപ്പുല്ലും കൂടി കഷായം വച്ചു സേവിക്കുക. അതിസാരത്തിനു മുത്തങ്ങ ചതച്ചു പിഴിഞ്ഞെടുത്ത രസത്തിൽ അല്പം തേൻ ചേർത്തു സേവിക്കുക. അല്ലെങ്കിൽ മുത്തങ്ങ ചതച്ചിട്ടു പാലു കാച്ചി കുടിക്കുക. മുത്തങ്ങയും ഇഞ്ചിയും അരച്ച് തേനിൽ ചാലിച്ചു സേവിച്ചാൽ ഉദരരോഗങ്ങൾക്ക് നല്ലതാണ്. മുത്തങ്ങ, നിലപ്പനക്കിഴങ്ങ് എന്നിവ സമമെടുത്ത് ചതച്ച് കിഴി കെട്ടിയിട്ട് പാൽകാച്ചി പഞ്ചസാര ചേർത്തു കഴിക്കുന്നത് മൂത്രച്ചുടിൽ, അസ്ഥിസ്രാവം എന്നിവയ്ക്ക് നല്ലതാണ്. മുടി കൊഴിച്ചിലിന് മുത്തങ്ങ ചതച്ചിട്ട് എണ്ണകാച്ചി തലയിൽ തേയ്ക്കുക.

തിപ്പലി

കുരുമുളകിനോട് സാദ്യശ്യമുള്ള തറയില്‍ പടർന്നുവളരുന്ന ചിരസ്ഥായിയായ ഒരു വള്ളിച്ചെടിയാണ് തിപ്പലി. പൂങ്കുലകൾ/ തിരികൾ, വേര് എന്നിവയാണ് ഔഷധയോഗ്യ ഭാഗം. ഇലകള്‍ അണ്ഡാകൃതിയിലുള്ളതും, അഗ്രം കൂർത്തതുമാണ്. ആൺപൂക്കളും, പെൺപൂക്കളും വെവ്വേറെ സസ്യങ്ങളിലാണ് ഉണ്ടാകുന്നത്. ആൺചെടിയിലെ പൂങ്കുലകൾ നേർത്തതും, നീളമുള്ളവയുമാണ്. മൂത്ത കായകൾക്ക് കറുപ്പു കലർന്ന പച്ചനിറമാണ്. ചുമ, ബ്രോങ്കൈറ്റിസ്, ആസ്തമ തുടങ്ങിയ ശ്വാസകോശ സംബന്ധമായ മിക്ക രോഗങ്ങൾക്കും തിപ്പലി ഫലപ്രദമായ ഔഷധമാണ്. കൂടാതെ നീർവീക്കം, തലവേദന, സന്ധിവേദന, പനി, നടുവേദന, പെരുമുട്ടുവാതം,

ഉറക്കമില്ലായ്മ ഇവ അകറ്റാനും ദഹനം വർദ്ധിപ്പിച്ച് ആമാശയത്തെ ശക്തിപ്പെടുത്താനും തിപ്പലി ഉപയോഗപ്പെടുത്താം. നിശാന്ധത അകറ്റാനും, കാഴ്ചശക്തി കൂട്ടാനും തിപ്പലിക്ക് കഴിയും. വരണ്ട ചുമയ്ക്ക് ചുക്ക്, കുരുമുളക്, തിപ്പലി ഇവ സമമെടുത്ത് ഉണക്കിപ്പൊടിച്ച് ചെറുതേനിൽ ചേർത്തോ കല്ക്കണ്ടം പൊടിച്ചു ചേർത്തോ പലവട്ടം കഴിച്ചാൽ കുറയും. തിപ്പലിയും കരുനൊച്ചിവേരും കൂടി കരിക്കിൻവെള്ളത്തിൽ അരച്ചുകലക്കി കുടിക്കുന്നത് മൂത്രാശയത്തിൽ ഉണ്ടാകുന്ന കല്ല് ദ്രവിച്ച് പോകുന്നതിന് സഹായിക്കുന്നതാണ്.

നറുനീണ്ടി

രക്തശുദ്ധിക്കുള്ള ഔഷധങ്ങളില്‍ ഒന്നാണ് നറുനീണ്ടി അഥവാ നന്നാറി. നേർത്തവളളിയോടുകൂടിയ ബഹുവർഷ സസ്യമാണ്. കയ്യും ഉള്ളം കാലും പുകച്ചിലിൽ മാറുന്നതിന് നറുനീണ്ടിക്കിഴങ്ങ് പശുവിൻ പാലിൽ അരച്ചു പുരട്ടുക. നറുനീണ്ടിക്കിഴങ്ങ് നുറുക്കി വൃത്തിയാക്കി ചതച്ചെടുത്ത് ഒരു ഗ്ലാസ് വെള്ളത്തിൽ 12 മണിക്കൂർ ഇട്ടുവച്ചിരുന്നശേഷം അരിച്ചെടുത്ത് പകുതിവീതം ദിവസേന രണ്ടുനേരം സേവിക്കുക. നറുനീണ്ടിക്കിഴങ്ങ് പൊടിച്ച് പാലിൽ കലക്കി കുടിക്കുന്നതും നല്ലതാണ്. നറുനീണ്ടിക്കിഴങ്ങും, ശതാവരിക്കിഴങ്ങും, ഇരട്ടിമധുരവുമിട്ട് നെയ്യ് കാച്ചി സേവിക്കുകയും, പുറമേ പുരട്ടുകയും ചെയ്യുന്നതും ചുടുവാതത്തിന് നല്ലതാണ്. വെള്ളപോക്കിന് നറുനീണ്ടിക്കിഴങ്ങ് പാലിൽ അരച്ചുകലക്കി കാച്ചി പതിവായി കുറച്ചു ദിവസം കഴിക്കുക. രക്തദുഷ്ടി, തേൾവിഷം ഇവയ്ക്ക് നറുനീണ്ടിയുടെ വേര് ഉണക്കിപ്പൊടിച്ച് 3 ഗ്രാം വീതം രാവിലെയും വൈകിട്ടും കഴിക്കുക. നറുനീണ്ടിക്കിഴങ്ങ് ഉണക്കിപ്പൊടിച്ചത് പത്തു ഗ്രാം വീതം പശുവിൻ വെണ്ണ ചേർത്ത് സേവിക്കുന്നത് ത്വക് രോഗങ്ങൾക്ക് നല്ലതാണ്. നറുനീണ്ടിക്കിഴങ്ങ് ചതച്ച് വെള്ളത്തിൽ ഇട്ടുവച്ചിരുന്ന്. പിഴിഞ്ഞരിച്ചെടുത്ത് പലതവണ മുഖം കഴുകുന്നത് മുഖകാന്തി കൂടുകയും മുഖത്തുണ്ടാകുന്ന കാര മാറുകയും ചെയ്യും.

മൂത്രതടസത്തിനും മൂത്രാശയത്തിലെ കല്ലിനും നറുനീണ്ടിക്കിഴങ്ങ് അരച്ചിട്ടോ ചതച്ചിട്ടോ നിത്യേന പശുവിൻപാലിൽ കാച്ചി കുടിക്കുക. നറുനീണ്ടിക്കിഴങ്ങ്, കൊത്തമല്ലി, ജീരകം ഇവ സമമെടുത്ത് സമം ശർക്കരയും ചേർത്തിടിച്ച് നെല്ലിക്കാവലുപ്പത്തിൽ ഉരുളകളാക്കി ഓരോ ഉരുളവീതം രാവിലെയും വൈകിട്ടും പതിവായി കഴിച്ചാൽ മൂത്രതടസ്സം, അസ്ഥിസ്രാവം, കാസം, ചുട്ടുനീറ്റൽ, വിഷം ഇവ ശമിക്കും. നറുനീണ്ടിക്കഷായം പാലും തേനും ചേർത്ത് ഓരോ ഔൺസുവീതം ദിവസേന സേവിക്കുന്നത് ശരീരബലഹീനതയ്ക്ക് നല്ലതാണ്.

ശതാവരി/സഹസ്രമൂലി

ചുറ്റിപ്പടർന്ന് വളരുന്ന ഒരു വള്ളിച്ചെടിയാണ് ശതാവരി. പച്ചകിഴങ്ങുകളാണ് ഔഷധം. രണ്ടു വർഷം കൂടുമ്പോൾ കിഴങ്ങുകൾ വിളവെടുക്കാം.

ശതാവരിക്കിഴങ്ങ് നീരിൽ രാമച്ചപ്പൊടി ചേർത്ത് കാലിനടിയിൽ പുരട്ടിയാൽ ചുട്ടുനീറ്റലിനു കുറവു കിട്ടും. ചൂടുകാലത്ത് ശരീരോഷ്മാവ് നിയന്ത്രിക്കുന്നതിന് ശതാവരിക്കിഴങ്ങ് ജ്യൂസ് ഉണ്ടാക്കിക്കഴിക്കുന്നത് നല്ലതാണ്.

മൂത്രച്ചുടിച്ചിലിന് ശതാവരി ഇടിച്ചുപിഴിഞ്ഞനീരും, ഞെരിഞ്ഞിൽ പൊടിയും ചേർത്ത് പാൽകാച്ചി സേവിക്കുക. ശതാവരിക്കിഴങ്ങുനീരിൽ പാലും ചേർത്ത് കഴിക്കുന്നത് വ്യക്കയിലെ കല്ലിനും മൂത്രസംബന്ധമായ രോഗങ്ങൾക്കും നല്ലതാണ്. മുലപ്പാൽ വർദ്ധനക്ക് ശതാവരിക്കിഴങ്ങ് തൊലി കളഞ്ഞു ഉണക്കിപ്പൊടിച്ച് ദിവസം രണ്ടു സ്പൂൺ (40ഗ്രാം) വീതം പശുവിൻ പാലിൽ കലക്കി സേവിക്കുക. പശുക്കൾക്കും എരുമകൾക്കും പാൽ ഉൽപ്പാദനം വർദ്ധിപ്പിക്കുന്നതിനും ശതാവരി ഉപയോഗിക്കാം. കിഴങ്ങ് കഷായം വച്ചത് 15 മി.ലി. തേൻ ചേർത്ത് കഴിച്ചാൽ ആർത്തവ ക്രമക്കേടുകൾ

നിയന്ത്രിക്കാം. ഗർഭ സംരക്ഷണത്തിന് ശതാവരി ക്കിഴങ്ങും കൽക്കണ്ടവും പാലിൽ കഷായം വെച്ചുകഴിക്കുക. വെള്ളപോക്കിന് ശതാവരിക്കിഴങ്ങ് ഒരു ഗ്ലാസ് പാലിൽ അരച്ചു കലക്കി രാവിലെ ഉണർന്നയുടൻ വെറും വയറ്റിൽ കുടിക്കുക. കാത്സ്യം, ഇരുമ്പുസത്ത് എന്നിവയുടെ അഭാവത്താൽ ഉണ്ടാകുന്ന രോഗങ്ങൾക്ക് ശതാവരിക്കിഴങ്ങ് ഉണക്കിപ്പൊടിച്ച് മുപ്പതുഗ്രാം വീതം ദിവസേന പശുവിൻ പാലിൽ കാച്ചിക്കുടിക്കുന്നത് നല്ലതാണ്.

കച്ചോലം

ഇഞ്ചിവർഗ്ഗത്തിൽപ്പെടുന്നതും, നിലത്തു പറ്റി വളരുന്നതുമായ ഔഷധസസ്യമാണ് കച്ചോലം. കച്ചോലത്തിന്റെ കന്ദങ്ങളാണ് ഔഷധയോഗ്യമായ ഭാഗം. ഉണങ്ങിയ കച്ചോലം പൊടിച്ച് തേനിൽ കുഴച്ച് ദിവസം മൂന്നു നേരം കഴിച്ചാൽ ഛർദ്ദി ശമിക്കും. മുറുക്കുന്ന ശീലമുള്ളവർക്ക് വെറ്റിലയിൽ അല്പം കച്ചോലം ചേർത്ത് മുറുക്കിയാൽ ചുമ, ശ്വാസവൈഷമ്യം ഇവ കുറയും. കുട്ടികളിലെ വിരശല്യത്തിന് കച്ചോലക്കിഴങ്ങിന്റെ നീര് ഒരു ടീസ്പൂൺ വീതം കൊടുക്കുക. വയറുവേദനക്ക് കച്ചോലക്കിഴങ്ങ് കുഴമ്പു പരുവത്തിലാക്കി കഴിക്കുക അല്ലെങ്കിൽ ഒരു സ്പൂൺ കച്ചോലക്കിഴങ്ങ് പൊടിച്ചതും ചെറുനാരങ്ങയും ഇഞ്ചിയും ചേർത്ത്

പാനീയമാക്കി കൊടുക്കുക. പല്ലുവേദന ശമിക്കാൻ കച്ചോലക്കിഴങ്ങ് അരച്ചെടുത്ത് മോണയിൽ തേക്കുക. മുടിക്ക് സുഗന്ധം നൽകുന്ന കേശപോഷിണിയാണ് കച്ചോലം. കച്ചോലക്കിഴങ്ങ് ഹെർബൽ ഷാംപുവുമായി കലർത്തി തലയിൽ തേച്ചാൽ താരൻ മാറികിട്ടും, കച്ചോലം ചേർത്ത മുറുക്കുകയോ വെറ്റിലയും, കച്ചോലവും ചേർത്ത് ചവച്ച് നീരിറക്കുകയോ ചെയ്താൽ വായ്നാറ്റം കുറയും. ഛർദ്ദി ഉണ്ടാകുമ്പോൾ കച്ചോലക്കിഴങ്ങ് ചതച്ച് മണക്കുക.

കസ്തൂരിമഞ്ഞൾ

ഇഞ്ചിയും മഞ്ഞളും കൃഷി ചെയ്യുന്നതുപോലെ കസ്തൂരിമഞ്ഞൾ കൃഷി ചെയ്യാം. കന്ദങ്ങളാണ് ഔഷധയോഗ്യമായ ഭാഗം. ത്വക്ക് രോഗങ്ങൾക്ക് ഇത് പേരു കേട്ട ഔഷധമാണ്. കസ്തുരിമഞ്ഞൾ രോഗാണുക്കളിൽ നിന്ന് ചർമ്മത്തെ രക്ഷിക്കാനും ചർമ്മത്തിന് തിളക്കമുണ്ടാകാനും ഉപയോഗിക്കാം. കസ്തുരിമഞ്ഞളിന്റെ പൊടി പനിനീരിൽ അരച്ച് വെയിലത്തു വച്ചു ചൂടാക്കി പതിവായി മുഖത്തു പുരട്ടിയാൽ മുഖക്കുരു ഇല്ലാതാകും. കസ്തൂരി മഞ്ഞൾ പൊടിച്ച് തേനിൽ ചാലിച്ച് കലകളുള്ള ഭാഗങ്ങളിൽ രാത്രിയിൽ ഉറങ്ങുവാൻ കിടക്കുന്ന സമയത്ത് പതിവായി പുരട്ടുന്നത് മുഖത്ത കലകൾ മാറുവാൻ നല്ലതാണ്. കസ്തുരിമഞ്ഞൾ നല്ലതു പോലെ പൊടിച്ച് എണ്ണയിൽ ചാലിച്ച് നവജാത ശിശുക്കളെ തേച്ചു കുളിപ്പിക്കുന്നതു രോഗാണുക്കളിൽ നിന്ന് ചർമ്മത്തെ രക്ഷിക്കുന്നതിനും ദേഹകാന്തി വർദ്ധിപ്പിക്കുവാനും സഹായിക്കുന്നു. കസ്തുരിമഞ്ഞൾ പൊടിയും, പച്ചപയറുപൊടിയും കൂടിക്കുഴച്ച് ശിശുക്കളുടെ ദേഹത്തു പുരട്ടുന്നതും നല്ലതാണ്. തേൾ, പഴുതാര മുതലായ വിഷ ജന്തുക്കൾ കടിച്ചാൽ ആ ഭാഗത്തു കസ്തുരിമഞ്ഞൾ അരച്ചിടുക അല്ലെങ്കിൽ കടിയേറ്റ ഭാഗത്ത് തുളസിയുടെ നീരിൽ കസ്തുരി മഞ്ഞളരച്ചു പുരട്ടുക.

കടപ്പാട്: കൃഷിയങ്കണം