വിഷമില്ലാത്ത പച്ചക്കറി വീട്ടുവളപ്പില്‍
വിഷമില്ലാത്ത പച്ചക്കറി വീട്ടുവളപ്പില്‍
- വിഷമില്ലാത്ത പച്ചക്കറി വീട്ടുവളപ്പില്‍
- വീട്ടുവളപ്പിലെ പച്ചക്കറികൃഷി തയ്യാറെടുപ്പ്
- വീട്ടുവളപ്പിലേക്കുള്ള പച്ചക്കറികള്‍
- മലനാടന്‍ പച്ചക്കറികള്‍
- പച്ചക്കറികൃഷി മഴമറയില്‍
- മട്ടുപ്പാവിലെ പച്ചക്കറി കൃഷി
- ജൈവപരിപാലനം – പൊതുതത്വങ്ങള്‍
- ജൈവവളങ്ങള്‍
- ജൈവരോഗ കീടനിയന്ത്രണത്തിനുള്ള ജീവാണുക്കള്‍
- പച്ചക്കറികളിലെ അവശിഷ്ട വിഷാംശം നീക്കം ചെയ്യല്‍
വിഷമില്ലാത്ത പച്ചക്കറി വീട്ടുവളപ്പില്‍
വീട്ടാവശ്യത്തിന് പച്ചക്കറി വാങ്ങാന്‍ കടയില്‍ ചെല്ലുന്ന മിക്കവരും യാതൊരു പുഴുക്കേടുമില്ലാതെ, തിളക്കത്തോടെയിരിക്കുന്ന പച്ചക്കറികളാണ് തിരഞ്ഞെടുക്കാര്. എന്നാല്‍ അവയില്‍ ഒട്ടുമിക്കവാറും ഉഗ്രവിഷമുള്ള കീടനാശിനികള്‍ തളിച്ച് വളര്‍ത്തിയുണ്ടാക്കിയവയോ, ചെടിയില്‍ നിന്ന് പറിച്ചെടുത്തശേഷം കീടനാശിനിയില്‍ മുക്കിയവയോ ആണെന്ന് മിക്കവരും അറിയാറില്ല. പ്രത്യേകിച്ച് കാബേജ്, കോളിഫ്ലവര്‍ പോലുള്ള പച്ചക്കറികള്‍ വ്യാപകമായി കൃഷി ചെയ്ത് കേരളത്തിലേക്കയക്കുന്ന സ്ഥലങ്ങളില്‍ കീടനാശിനികള്‍ മുക്കി ലോറികളിലയക്കുന്നത് യാത്രക്കിടയില്‍ പ്രാണിശല്യം ഒഴിവാക്കാനും വേണ്ടിയാണ്.വിഷമുള്ള ഇത്തരം പച്ചക്കറികള്‍ വാങ്ങി വീട്ടിലേക്ക് മടങ്ങുമ്പോള്‍ കുഞ്ഞുങ്ങളടക്കമുള്ള കുടുംബാംഗങ്ങളുടെ ആരോഗ്യം പതുക്കെ തകര്‍ക്കുകയാണെന്ന് നമ്മള്‍ ഓര്‍ക്കാറില്ല. ഏറ്റവും വിദ്യാഭ്യാസമുള്ള കേരളത്തില്‍ ആണ് ഏറ്റവും കൂടുതല്‍ കാന്‍സര്‍ രോഗികള്‍ പെരുകുന്നത് എന്ന ദുഖസത്യത്തിന് ഒരു കാരണം പച്ചക്കറിയിലൂടെ ഉഗ്രവിഷം കഴിക്കുന്നതും കൂടിയാണ്.
വീട്ടുവളപ്പിലെ പച്ചക്കറികൃഷി തയ്യാറെടുപ്പ്
- നല്ല സൂര്യപ്രകാശം ലഭിക്കുന്ന സ്ഥലം കൃഷിക്കായി തിരഞ്ഞെടുക്കണം.
- ജലസേചന സൗകര്യങ്ങള്‍ ലളിതമാക്കിയെടുക്കണം.
- നീര്‍വാര്‍ച്ച ഉറപ്പാക്കണം. വെള്ളം കെട്ടിനിന്നാല്‍ മിക്ക പച്ചക്കറികള്‍ക്കും രോഗബാധയുണ്ടാകുകയോ ചീഞ്ഞു പോകുകയോ ചെയ്യും.
- മേല്‍മണ്ണ്‍ ഒലിച്ചുപോകാതെ സംരക്ഷിക്കണം. ഇതിനായി ജൈവവസ്തുക്കള്‍ (ചപ്പുചവറുകള്‍) ഉപയോഗിച്ച് പുതയിടണം. പുതയിടുക വഴി, സൂക്ഷ്മ ജീവികളുടെ പ്രവര്‍ത്തനം മെച്ചപ്പെടും.
- മണ്ണിലെ പുളിരസം നീക്കംചെയ്യാന്‍ അല്പം കുമ്മായം ഇട്ട് കൊടുക്കാന്‍ ശ്രദ്ധിക്കണം.
- പരമാവധി ജൈവവളങ്ങള്‍ സംഭരിച്ച് വയ്ക്കണം. ചാണകം, കപ്പലണ്ടിപിണ്ണാക്ക്, ഗുണമേന്മയുള്ള വേപ്പിന്‍പിണ്ണാക്ക്, എല്ലുപൊടി, കോഴിവളം, മണ്ണിരകമ്പോസ്റ്റ്, എന്നിവ കരുതിവയ്ക്കാം.
- നൂതന ജൈവ കീട രോഗനിയന്ത്രണത്തിനായി സ്യൂഡോമോണാസ്, ട്രൈക്കോടെര്‍മ, വെര്‍ട്ടിസീലിയം, മെറ്റാറൈസിയം തുടങ്ങിയവയുടെ ലഭ്യത ഉറപ്പാക്കണം.
- ജൈവ കീടനിയന്ത്രണത്തിനായി വേപ്പിന്‍കുരു, പുകയില, വേപ്പെണ്ണ മറ്റ് രൂക്ഷഗന്ധമുള്ള സസ്യങ്ങളുടെ ഇലകള്‍ എന്നിവ കണ്ടുവയ്ക്കണം.
- കൃഷിക്കായുള്ള സ്ഥലം കിളയ്ക്കുന്നതിനു ചെറിയ മണ്ണുവെട്ടി, ചെടിയുടെ കമ്പുകള്‍ മുറിക്കുന്നതിനായി കത്രിക പോലുള്ള സിക്കേച്ചറുകള്‍, ചെറു സ്പെയറുകള്‍ മുതലായവ ഉണ്ടായിരിക്കണം.
- വീട്ടുമുറ്റത്ത് കൃഷിക്കായി സൗകര്യമില്ലെങ്കില്‍ മട്ടുപ്പാവ് ഇതിനായി തയ്യാറാക്കാം.
- മട്ടുപ്പാവിലെ കൃഷിയില്‍ ചെടികള്‍ വളര്‍ത്തുന്നതിനായി പോളി കവറുകളോ, ചട്ടികളോ, ബേസിനുകളോ വായ്‌വട്ടമുള്ള മറ്റ് ഉപയോഗമില്ലാത്ത പാത്രങ്ങളോ, ചെറു ചാക്കുകളോ ഉപയോഗിക്കാം.
- മുറ്റത്തെ മണ്ണില്‍ കൊത്തിക്കിള സാധ്യമല്ലാത്ത ഇടങ്ങളിലും മേല്‍പ്പറഞ്ഞ സംവിധാനത്തില്‍ കൃഷി ചെയ്യാം.
- വിളവ്‌ അല്പം കുറയുമെങ്കിലും രോഗപ്രതിരോധശേഷിയുള്ള ഇനങ്ങള്‍ തന്നെ ഉപയോഗിക്കണം.
- ഓരോ സീസണിലും അനുയോജ്യമായ പച്ചക്കറി ഇനം കൃഷി ചെയ്യുന്നതിനായി തിരഞ്ഞെടുക്കാം.
- വിത്തുപാകുമ്പോള്‍ ഉറുമ്പിന്‍റെ ശല്യം കുറയ്ക്കാന്‍ മെറ്റാറൈസിയം എന്ന ജൈവ കീടനാശിനിയോ മഞ്ഞള്‍പ്പൊടി, റവ, അരി എന്നിവ കലര്‍ത്തി വിത്ത് വിതയ്ക്കുന്ന നാട്ടുരീതിയോ അവലംബിക്കാം.
- കൂടുതല്‍ വിത്തിട്ടു ആരോഗ്യമുള്ള തൈകള്‍ മാത്രം നിര്‍ത്തി ബാക്കി നീക്കം ചെയ്യുക.
- ശാസ്ത്രീയമായി വെണ്ട, പയര്‍, വെള്ളരിവര്‍ഗ്ഗ വിളകള്‍, കാരറ്റ്, ബീറ്റ്റൂട്ട് എന്നിവ വിത്ത് നേരിട്ട് പാകി കൃഷിയിറക്കേണ്ട ഇനങ്ങളാണ്. പ്രോട്രേകളില്‍ ലഭിക്കുന്ന തൈ വാങ്ങിയും ഉപയോഗിക്കാം.
- നാടന്‍ പച്ചക്കറികള്‍ ശീലമാക്കാന്‍ ശ്രമിക്കുക. ചുരുങ്ങിയ പരിചരണം വേണ്ട ദീര്‍ഘകാല നാടന്‍ പച്ചക്കറികളായ അമര, നിത്യവഴുതന, വാളരിപ്പയര്‍, കുറ്റിഅമര, കൊത്തമര, കാ‍ന്താരി മുളക്, കോവല്‍ എന്നിവ കൃഷി ചെയ്യുക.
- പടര്‍ന്നുകയറുന്ന ഇനങ്ങള്‍ക്ക് അതിനായുള്ള സൗകര്യം ഒരുക്കണം.
- പച്ചക്കറിയായും പഴമായും ഉപയോഗിക്കാവുന്ന പപ്പായ (കൊപ്പക്കായ) നിര്‍ബന്ധമായും ഉള്‍പ്പെടുത്തണം.
- ആരോഗ്യപ്രദായിയായ കറിവേപ്പിലയ്ക്ക് ഒരിടം നല്‍കാന്‍ മറക്കരുത്. കടയില്‍ കിട്ടുന്ന വേപ്പില മിക്കവാറും കീടനാശിനി തളിച്ചതാവാം.
- അല്പം സ്ഥലം മാത്രം ഉപയോഗിക്കുന്ന മുരിങ്ങ നട്ടുവളര്‍ത്തിയാല്‍ കായ്ക്കു പുറമേ നിത്യോപയോഗത്തിനുള്ള ഇലക്കറിയും ലഭ്യമാകും.
- പഴമായും പച്ചക്കറിയായും ഉപയോഗിക്കാവുന്ന നാടന്‍വാഴ ഇനങ്ങളോ കുറിയവാഴ ഇനങ്ങളോ നട്ടുവളര്‍ത്തിയാല്‍ വാഴയിലയും ഉപയോഗിക്കാം.
- കിഴങ്ങുവര്‍ഗ്ഗ വിളകള്‍ കൂടുതലായി ഉണ്ടാകുന്ന സമയങ്ങളില്‍ മിച്ചം വരുന്ന ഉല്‍പ്പന്നങ്ങള്‍ ഉണക്കി കൊണ്ടാട്ടമായോ, അച്ചാറാക്കിയോ, വെറുതെ ഉണക്കിയോ, മറ്റ് മൂല്യവര്‍ധിത ഉല്‍പ്പന്നങ്ങളായ സ്ക്വാഷോ, ജാമോ, സോസോ ഉണ്ടാക്കിയോ സൂക്ഷിക്കാം.
വീട്ടുവളപ്പിലേക്കുള്ള പച്ചക്കറികള്‍
ചീര
കേരളീയരുടെ ആഹാരക്രമത്തില്‍ ഇലക്കറികള്‍ക്ക് വളരേയേറെ പ്രാധാന്യമുണ്ട്. ചീര, മുരിങ്ങയില, ചെക്കുര്‍മാനിസ്, പയറിന്‍റെ ഇല, മത്തയില, തഴുതാമ, മുതലായവ നമ്മുടെ നാട്ടില്‍ സുലഭമായി ലഭിക്കുന്ന ഇലക്കറികളാണ്. കിഴങ്ങുവര്‍ഗ്ഗങ്ങള്‍, കായ്കറികള്‍ എന്നിവയെ അപേക്ഷിച്ച് ഇലക്കറികളില്‍ ധാരാളം പോഷകങ്ങള്‍ അടങ്ങിയിട്ടുണ്ട്. ഇവയില്‍ ജീവകം എ, ജീവകം ബി യില്‍ ഉള്‍പ്പെട്ട റൈബോഫ്ലാവിന്‍, ഫോളിക് ആസിഡ് എന്നിവയും, കാത്സ്യം, ഇരുമ്പ് എന്നീ ധാതുലവണങ്ങളും സമൃദ്ധമായി കാണപ്പെടുന്നു. കൂടാതെ അവയില്‍ ധാരാളം നാരുകളും അടങ്ങിയിട്ടുണ്ട്. ചീര ഉപയോഗിച്ച് തോരന്‍, കറി, പച്ചടി, കട്ട്ലെറ്റ് മുതലായവ ഉണ്ടാക്കാം. ചപ്പാത്തി, ഉപ്പുമാവ്, ഓംലെറ്റ്, പരിപ്പുകറി എന്നീ വിഭവങ്ങളിലേക്ക് ഇലക്കറികള്‍ അനായാസേന സംയോജിപ്പിക്കുവാന്‍ കഴിയും. കൊച്ചുകുട്ടികള്‍ സാധാരണയായി ഇലക്കറികള്‍ കഴിക്കുവാന്‍ ഇഷ്ടപ്പെടുന്നില്ല, എന്നാല്‍ അവര്‍ക്കിഷ്ടമുള്ള ആഹാരവിഭവങ്ങളിലേക്ക് ഇലക്കറികള്‍ ചേര്‍ക്കാന്‍ സാധിക്കും.
കൃഷിരീതികള്‍
- ചുവന്ന ഇനം : അരുണ്‍, കണ്ണാറ ലോക്കല്‍, കൃഷ്ണശ്രീ
- പച്ച ഇനം : രേണുശ്രീ, Co-1
- തൈകള്‍ തമ്മിലുള്ള ഇടയകലം ഒരടി
- ഒരു സെന്‍റിന് രണ്ട് ഗ്രാം വിത്ത്
- മഴക്കാലത്ത് ചുവന്ന ചീര ഒഴിവാക്കണം.
- നാലുമാസം വരെ അനേക തവണയായി വിളവെടുക്കാം. നേര്‍പ്പിച്ച ഗോമൂത്രമോ, പുളിപ്പിച്ചു നേര്‍പ്പിച്ച പിണ്ണാക്ക് ലായനിയോ, ഫിഷ്‌ അമിനോ ആസിഡോ ആഴ്ചതോറും തളിച്ച് കൊടുത്താല്‍ ഉത്പാദനം വര്‍ദ്ധിക്കും.
- ഒരു സെന്ററില്‍ നിന്നും 70-100 കി.ഗ്രാം വിളവ്‌ പ്രതീക്ഷിക്കാം.
മുളക്
കാഴ്ചശക്തി വര്‍ദ്ധിപ്പിക്കുന്നതിനും തൊലിയുടെ ആരോഗ്യത്തിനും ആവശ്യമായ ജീവകം ‘എ’, വിളര്‍ച്ച തടയുന്നതിനാവശ്യമായ ഫോളിക് ആസിഡ്, മോണകള്‍ക്കും, ശരീരത്തില്‍ ഇരുമ്പിന്‍റെ ആഗിരണം വര്‍ദ്ധിപ്പിക്കുന്നതിനും ആവശ്യമായ വിറ്റമിന്‍ സി എന്നിവ മുളകില്‍ ഉയര്‍ന്ന തോതില്‍ അടങ്ങിയിട്ടുണ്ട്.
കൃഷിരീതികള്‍
- എരിവ് കൂടിയ ഇനം ഉജ്ജ്വല
- എരിവ് കുറഞ്ഞ ഇനം അനുഗ്രഹ
- തണലുള്ള സ്ഥലങ്ങള്‍ക്ക് യോജിച്ച ഇനമാണ് മിതമായ എരിവുള്ള അതുല്യ
- ഈ ഇനങ്ങള്‍ എല്ലാം വാട്ടരോഗ പ്രതിരോധശേഷിയുള്ളതാണ്.
- തൈകള്‍ തമ്മിലുള്ള ഇടയകലം ഒന്നര അടി
- ഒരു സെന്‍റിന് 4 ഗ്രാം വിത്ത്
- ഇടവിട്ടുള്ള വളപ്രയോഗം നടത്തണം.
- 6 മുതല്‍ 8 മാസം വരെ വിളവ്‌ പ്രതീക്ഷിക്കാം.
- ഒരു സെന്ററില്‍ നിന്നും 50 കി.ഗ്രാം വിളവ്‌ പ്രതീക്ഷിക്കാം.
വഴുതിന
നാരുകളാല്‍ സമ്പുഷ്ടമായ ഒരു പച്ചക്കറിയാണ് വഴുതന. വഴുതനങ്ങയുടെ തൊലിക്ക് നിറം പകരുന്ന ആന്തോസയാനിന്‍ എന്ന രാസഘടകം കാന്‍സര്‍, നാഡീസംബന്ധമായ രോഗങ്ങള്‍, മറ്റു രോഗങ്ങള്‍ എന്നിവയ്ക്ക് വളരെ നല്ലതാണ്.
കൃഷിരീതികള്‍
- എല്ലാകാലത്തും കൃഷി ചെയ്യാം.
- ഇളം പച്ചനിറത്തില്‍ നീളത്തിലുള്ള കായ്കള്‍ ഉണ്ടാകുന്ന ഇനമായ ഹരിത വീട്ടുമുറ്റത്ത് അനുയോജ്യമാണ്.
- നീലനിറത്തിലുള്ള കായ്കള്‍ ഉണ്ടാകുന്ന ഇനമാണ് സൂര്യയും, നീലിമയും.
- ചെടികള്‍ തമ്മിലുള്ള ഇടയകലം രണ്ടര അടി.
- ഒരു സെന്‍റിന് 2 ഗ്രാം വിത്ത് അല്ലെങ്കില്‍ 100 തൈകള്‍.
- ഒരു സെന്‍റിന് 100 കിലോ ജൈവവളം നല്‍കണം.
- ഇടവിട്ടുള്ള വളപ്രയോഗം അനുവര്‍ത്തിക്കണം.
- ഒരു സെന്ററില്‍ നിന്ന് 60 കിലോ മുതല്‍ 80 കിലോ വരെ വിളവ്‌ പ്രതീക്ഷിക്കാം.
തക്കാളി
തക്കാളിയില്‍ ഉയര്‍ന്ന തോതില്‍ ജീവകം ‘എ’യും ധാരാളം ആന്‍റി ഓക്സിഡണ്ടുകളും അടങ്ങിയിരിക്കുന്നതിനാല്‍ കാഴ്ചശക്തിക്കും തൊലിയുടെയും എല്ലിന്‍റെയും ആരോഗ്യത്തിനു വളരെ നല്ലതാണ്. ഇതിനു പുറമേ നാരിന്‍റെ അംശവും മറ്റ് ജീവകങ്ങളും, ധാതുലവണങ്ങളും മിതമായ തോതില്‍ അടങ്ങിയിരിക്കുന്നതിനാല്‍ കൊളസ്ട്രോള്‍ രോഗികള്‍ക്കും അമിതവണ്ണമുള്ളവര്‍ക്കും ശരീരത്തിന്‍റെ പ്രതിരോധശേഷി വര്‍ദ്ധിപ്പിക്കുന്നതിനും ഭക്ഷണക്രമത്തില്‍ ഉള്‍പ്പെടുത്താവുന്ന ഒരു പച്ചക്കറിയാണ് തക്കാളി. പൊട്ടാസ്യം ഉയര്‍ന്ന തോതില്‍ തക്കാളിയില്‍ അടങ്ങിയിട്ടുണ്ട്. ഹൃദയമിടിപ്പ് ക്രമീകരിക്കുന്നതിനും പൊട്ടാസ്യത്തിനു വളരെയേറെ പ്രാധാന്യമുണ്ട്. മിതമായ നിരക്കില്‍ ബി വിറ്റാമിനുകളായ തയാമീന്‍, റൈബോഫ്ലാവിന്‍, നിയാസിന്‍ എന്നിവയ്ക്ക് പുറമേ ഇരുമ്പ്, കാത്സ്യം, മാംഗനീസ് എന്നിവയും ഇതില്‍ അടങ്ങിയിട്ടുണ്ട്. എല്ലുകളും പല്ലുകളും ബലമുള്ളതായിരിക്കാന്‍ കാത്സ്യം അത്യാവശ്യമാണ്. രക്തത്തിലെ ഹീമോഗ്ലോബിന്‍ എന്ന ഘടകത്തിന്‍റെ നിര്‍മ്മാണത്തിന് ഇരുമ്പും ആവശ്യമാണ്. ഈ ഘടകം കുറയുമ്പോള്‍ വിളര്‍ച്ച ഉണ്ടാകുന്നു.
കൃഷിരീതികള്‍
- സെപ്തംബര്‍-ഒക്ടോബര്‍ മാസം കൃഷിചെയ്യാന്‍ അനുയോജ്യം.
- ബാക്ടീരിയയില്‍ വാട്ടപ്രതിരോധശേഷിയുള്ള ഇനങ്ങളാണ് അനഘ, മനുലക്ഷ്മി എന്നിവ.
- ഒരു സെന്‍റിന് 2 ഗ്രാം വിത്ത് അല്ലെങ്കില്‍ ഏകദേശം 100 തൈകള്‍.
- തൈകള്‍ തമ്മില്‍ 2 അടി അകലം നല്‍കണം.
- അമ്ലരസമുള്ള മണ്ണില്‍ വാട്ടരോഗം കൂടുതലായതിനാല്‍ കുമ്മായമിട്ടു അമ്ലരസം ക്രമീകരിക്കേണ്ടത് അനിവാര്യമാണ്.
- മൂന്നുമുതല്‍ നാല് മാസം വരെ വിളവ്‌ പ്രതീക്ഷിക്കാം.
- ഒരു സെന്ററില്‍ നിന്ന് ശരാശരി 80 കി.ഗ്രാം വിളവ്‌ ലഭിക്കും.
പയര്‍
പയര്‍വര്‍ഗ്ഗങ്ങളില്‍ ഏകദേശം 25% പ്രോട്ടീന്‍ അടങ്ങിയിരിക്കുന്നു. ശരീരത്തിന്‍റെ വളര്‍ച്ചയ്ക്കും കോശങ്ങളുടെ പരിപാലനത്തിനും ഹോര്‍മോണുകള്‍, രാസാഗ്നികള്‍ എന്നിവയുടെ ഉല്‍പ്പാദനത്തിനും പ്രവര്‍ത്തനത്തിനും പ്രോട്ടീന്‍ ആവശ്യമാണ്. ധാതുലവണങ്ങളായ പൊട്ടാസ്യം ഉയര്‍ന്ന തോതിലും, കാത്സ്യം, മഗ്നീഷ്യം, ഫോസ്ഫറസ് എന്നിവ മിതമായ തോതിലും പയറില്‍ അടങ്ങിയിട്ടുണ്ട്. നാരുകള്‍ അടങ്ങിയിരിക്കുന്നതിനാല്‍ പ്രമേഹ രോഗികള്‍ക്ക് പയര്‍ അവരുടെ ആഹാരക്രമത്തില്‍ ഉള്‍പ്പെടുത്താവുന്നതാണ്.
കൃഷിരീതികള്‍
- വള്ളിപ്പയര്‍ ഇനങ്ങള്‍ : ലോല, ജ്യോതിക, വൈജയന്തി
- കുറ്റിപ്പയര്‍ ഇനങ്ങള്‍ : ഭാഗ്യലക്ഷ്മി, കാശികാഞ്ചന്‍
- ഇടത്തരം കുറ്റിപ്പയര്‍ അഥവാ തടപയര്‍ ഇനം: അനശ്വര, കനകമണി
- വള്ളിപ്പയര്‍ ഒരു സെന്‍റിന് 20 ഗ്രാം വിത്ത് വേണം
- കുറ്റിപ്പയര്‍ ആണെങ്കില്‍ 80 ഗ്രാം വിത്ത് വേണ്ടിവരും
- ഒരു സെന്‍റിന് 80 കിലോഗ്രാം ജൈവവളം അടിവളമായി വേണം
- ഇടവിട്ടുള്ള വളപ്രയോഗം നല്‍കണം.
- ഒരു സെന്ററില്‍ നിന്നും ശരാശരി ലഭിക്കുന്ന വിളവ്‌
വള്ളിപ്പയര്‍ - 80 കിലോ
കുറ്റിപ്പയര്‍ - 20 കിലോ
തടപയര്‍ - 50 കിലോ
മത്തന്‍/കുമ്പളം/വെള്ളരി
ജീവകങ്ങളായ ‘എ’ ‘സി’ ‘ഇ’ എന്നിവയുടെ കലവറയാണ് മത്തന്‍. വളരെ ഉയര്‍ന്ന തോതില്‍ ജീവകം ‘എ’ അടങ്ങിയിരിക്കുന്നു. ഒരു ദിവസത്തെ ജീവകം ‘എ’ യുടെ ആവശ്യകതയെ നിറവേറ്റുവാന്‍ 100 ഗ്രാം മത്തങ്ങ ഒരു ദിവസത്തെ ദിനചര്യയില്‍ ഉള്‍പ്പെടുത്തിയാല്‍ മതിയാകും. വിറ്റാമിന്‍ ബി മിതമായ തോതിലും ധാതുലവണങ്ങളായ കോപ്പര്‍, കാത്സ്യം, ഫോസ്ഫറസ്, പൊട്ടാസ്യം എന്നിവ ഉയര്‍ന്ന തോതിലും മത്തങ്ങയില്‍ അടങ്ങിയിരിക്കുന്നു. മത്തന്‍കുരു നാരിന്‍റെ ഒരു നല്ല സ്രോതസ്സാണ്. അതിനുപുറമേ ധാരാളം അപൂരിതകൊഴുപ്പുകള്‍ ഇതില്‍ അടങ്ങിയിരിക്കുന്നതിനാല്‍ ഹൃദയത്തിന്‍റെ ആരോഗ്യത്തിന് വളരെ നല്ലതാണ്. 100 ഗ്രാം മത്തന്‍കുരുവില്‍ 559 കലോറിയും 30 ഗ്രാം പ്രോട്ടീനും ഉയര്‍ന്ന തോതില്‍ ഇരുമ്പ്, സിങ്ക്, ജീവകം ബി എന്നിവയും അടങ്ങിയിരിക്കുന്നു.
കുമ്പളങ്ങയില്‍ ഏകദേശം 95% ജലാംശം അടങ്ങിയിരിക്കുന്നതിനാല്‍ അമിതവണ്ണമുള്ളവര്‍ക്ക് ഭക്ഷണക്രമത്തിലുള്‍പ്പെടുത്താവുന്ന ഒരു പച്ചക്കറിയാണ് കുമ്പളങ്ങ. ഔഷധഗുണങ്ങളേറെയുള്ളതിനാല്‍ ആയുര്‍വേദ മരുന്നുകളില്‍ ഉപയോഗിച്ചുവരുന്നു. പോഷകസമൃദ്ധമായ ഒരു പച്ചക്കറിയാണ് കുമ്പളങ്ങ. ബി വിറ്റാമിനുകള്‍ ആയ തയാമിന്‍, നിയാസിന്‍ എന്നിവയും വിറ്റാമിന്‍ സിയും ഉയര്‍ന്ന തോതിലും ഇതില്‍ അടങ്ങിയിട്ടുണ്ട്. രക്തസമ്മര്‍ദ്ദം കുറയ്ക്കുന്നതിനും, ഹൃദയത്തിന്‍റെ ആരോഗ്യത്തിനാവശ്യമായ ധാതുലവണമായ പൊട്ടാസ്യവും നല്ല തോതില്‍ കുമ്പളങ്ങയില്‍ ഉണ്ട്. ക്ഷാരഗുണമുള്ളതിനാല്‍ ഉദര സംബന്ധമായ രോഗങ്ങള്‍ക്കും കുമ്പളങ്ങ നല്ലതാണ്. പ്രമേഹരോഗികള്‍ക്കും ശ്വാസകോശരോഗങ്ങള്‍ ഉള്ളവര്‍ക്കും ആഹാരക്രമത്തില്‍ ഉള്‍പ്പെടുത്തേണ്ട ഒരു പച്ചക്കറിയാണ് കുമ്പളങ്ങ.
വെള്ളരിക്ക തൊലിയോടുകൂടി കഴിക്കുന്നതാണ് കൂടുതല്‍ നല്ലത്. തൊലിയില്‍ ധാരാളമായി നാരുകള്‍ അടങ്ങിയിട്ടുള്ളതിനാല്‍ ഇവ വന്‍കുടലിന്‍റെ ചലനത്തെ ഉത്തേജിപ്പിക്കുകയും മലവിസര്‍ജ്ജനത്തെ സഹായിക്കുകയും ചെയ്യും. ഇതിനുപുറമേ ആഹാരത്തിലെ ഗ്ലൂക്കോസ്, കൊളസ്ട്രോള്‍ എന്നിവയുടെ ആഗിരണം മന്ദഗതിയിലാക്കുകയും ചെയ്യുന്നു. തന്മൂലം പ്രമേഹരോഗികള്‍ക്കും ഹൃദ്രോഗികള്‍ക്കും നാരടങ്ങിയ ഭക്ഷണം പ്രയോജനപ്പെടും. ഇതിനുപുറമേ ആന്‍റി ഓക്സിഡണ്ടുകളായ വിറ്റാമിന്‍ എ, വിറ്റാമിന്‍ സി എന്നിവയും മിതമായ നിരക്കില്‍ വെള്ളരിക്കയില്‍ അടങ്ങിയിരിക്കുന്നു. മറ്റു പച്ചക്കറികളെ അപേക്ഷിച്ച് വെള്ളരിക്കയില്‍ വിറ്റാമിന്‍ കെ ധാരാളമായി അടങ്ങിയിട്ടുണ്ട്. രക്തം പെട്ടെന്ന് കട്ടപിടിക്കുന്നതിനും എല്ലുകളുടെ ഉറപ്പിനും, തലച്ചോറിന്‍റെ പ്രവര്‍ത്തനത്തിനും വിറ്റാമിന്‍ കെ ആവശ്യമാണ്.
കൃഷിരീതികള്‍
- എല്ലാകാലത്തും കൃഷിചെയ്യാം.
- വലിപ്പമുള്ള കായ്കള്‍ തരുന്ന ഇനങ്ങളാണ് അമ്പിളി (മത്തന്‍), കെ.എ.യു. ലോക്കല്‍(കുമ്പളം), മുടിക്കോട് ലോക്കല്‍(വെള്ളരി)
- വലുപ്പം കുറഞ്ഞ കായ്കള്‍ തരുന്ന ഇനങ്ങളാണ് സരസ്, അര്‍ക്കസൂര്യമുഖി (മത്തന്‍), ഇന്ദു(കുമ്പളം), സൗഭാഗ്യ(വെള്ളരി)
- ഒരു സെന്റ്‌ കൃഷി ചെയ്യാന്‍ വേണ്ടിവരുന്ന വിത്തിന്‍റെ അളവ്
മത്തന്‍ - 6 ഗ്രാം
കുമ്പളം - 4 ഗ്രാം
വെള്ളരി – 3 ഗ്രാം
- വള്ളികള്‍ നിലത്തുപടരുമ്പോള്‍ തെങ്ങിന്‍പട്ടയോ മറ്റോ ഇട്ടുകൊടുക്കുന്നത് കായ് മണ്ണില്‍ പതിഞ്ഞ് കിടന്ന് കേടുവരാതിരിക്കാന്‍ സഹായിക്കും.
- ഒരു സെന്റ്‌ സ്ഥലത്തേക്ക് 80 കിലോഗ്രാം ജൈവവളം അടിവളമായി നല്‍കേണ്ടതാണ്.
- വിളവെടുപ്പ് കാലം മൂന്നു-നാല് മാസം
- ശരാശരി വിളവ്‌ 80 – 100 കിലോഗ്രാം
പാവല്‍/പടവലം
ജീവകങ്ങളായ ബി,സി എന്നിവയുടെ ഒരു ഉയര്‍ന്ന സ്രോതസ്സാണ് പാവക്ക. ധാതുലവണങ്ങളായ ഇരുമ്പ്, കാത്സ്യം എന്നിവ ഉയര്‍ന്ന തോതില്‍ അടങ്ങിയിട്ടുണ്ട്. പ്രമേഹരോഗികള്‍ക്ക് ഭക്ഷണക്രമത്തില്‍ ഉള്‍പ്പെടുത്താവുന്ന ഒരു ഉത്തമ പച്ചക്കറിയാണ് പാവക്ക. ഇതില്‍ അടങ്ങിയിരിക്കുന്ന ചാരാന്റിന്‍ എന്ന ഘടകത്തിന് രക്തത്തില്‍ ഗ്ലൂക്കൊസിന്‍റെ ആഗിരണത്തെ മന്ദഗതിയിലാക്കുന്നതിനുള്ള കഴിവുള്ളതിനാല്‍ പ്രമേഹരോഗികള്‍ക്ക് ഗുണകരമാണ്. ഇതിനുപുറമേ ഇന്‍സുലിനോട്‌ സാമ്യമുള്ള ഘടകം പാവക്കയില്‍ അടങ്ങിയിരിക്കുന്നതിനാല്‍ പ്രമേഹരോഗികള്‍ക്ക് പാവക്ക കൂടുതല്‍ ഗുണം ചെയ്യും. രോഗപ്രതിരോധശേഷി വര്‍ദ്ധിപ്പിക്കുന്നതിനും ശ്വാസകോശ സംബന്ധമായ രോഗങ്ങള്‍ക്കും പാവക്ക ഭക്ഷണക്രമത്തില്‍ ഉള്‍പ്പെടുത്തുന്നത് നല്ലതാണ്.
കൃഷിരീതികള്‍
- എല്ലാകാലത്തും കൃഷിചെയ്യാം.
- പാവല്‍-വെള്ളയിനം-പ്രീതി
- പടവലം ഇടത്തരം നീളമുള്ള ഇനം-മനുശ്രീ
- പടവലം നീളം കൂടിയ ഇനം-കൗമുദി
- ഒരു സെന്ററിലേക്ക് 25-30 ഗ്രാം പാവല്‍വിത്തും, 15-20 ഗ്രാം പടവല വിത്തും ആവശ്യമായി വരും
- അടിവളമായി 80 കിലോഗ്രാം ജൈവവളം നല്‍കിയിരിക്കണം.
- കുഴികള്‍ തമ്മില്‍ 2 മീറ്റര്‍ ഇടയകലം നല്‍കിയിരിക്കണം.
- ഒരു സെന്ററില്‍ നിന്നും ശരാശരി 60 കിലോഗ്രാം പാവലും, 100 കിലോഗ്രാം പടവലവും പ്രതീക്ഷിക്കാം.
- വിളവെടുപ്പ് കാലം – 5 മാസം
വെണ്ട
നാരുകളാല്‍ സമ്പുഷ്ടമാണ് വെണ്ട. ആന്‍റി ഓക്സിഡണ്ടുകളായ ജീവകം എ യുടെയും മറ്റു ഘടകങ്ങളുടെയും ഉയര്‍ന്ന സ്രോതസ്സാണ് വെണ്ട. ജീവകങ്ങളായ സി, കെ, ബി എന്നിവയും ഇതില്‍ അടങ്ങിയിട്ടുണ്ട്.
കൃഷിരീതികള്‍
- എല്ലാകാലത്തും കൃഷിചെയ്യാം.
- നരപ്പുരോഗ പ്രതിരോധശേഷിയുള്ള ഇനങ്ങളായ അര്‍ക്ക, അനാമിക, സല്‍കീര്‍ത്തി, വര്‍ഷ, ഉപഹാര്‍ എന്നിവ അനുയോജ്യം
- ഇവയുടെ കായ്കള്‍ക്ക് ഇളം പച്ചനിറമാണ്.
- വിത്ത് വിതച്ച് നാല്‍പ്പത്തിയഞ്ചാം ദിവസം ആദ്യവിളവ്‌ ലഭിക്കും.
- ഒരു സെന്‍റിന് 30 ഗ്രാം വിത്ത് വേണ്ടിവരും
- നാല് മാസക്കാലം വിളവ്‌ ലഭിക്കും.
- ഒരു സെന്ററില്‍ നിന്നും 50 കിലോഗ്രാം വിളവ്‌ പ്രതീക്ഷിക്കാം.
മലനാടന്‍ പച്ചക്കറികള്‍
ശീതകാല പച്ചക്കറി വിളകളായ കാബേജ്, കോളിഫ്ലവര്‍, ബീറ്റ്റൂട്ട്, കാരറ്റ്, സവാള, ബീന്‍സ് എന്നിവ പ്രോട്ടീനുകള്‍, ധാതുലവണങ്ങള്‍, വിറ്റാമിനുകള്‍ എന്നിവയാല്‍ സമ്പുഷ്ടമാണ്. 100 ഗ്രാമില്‍ അടങ്ങിയിരിക്കുന്ന പോഷകങ്ങള്‍ താഴെക്കൊടുത്തിരിക്കുന്നു.
|
വിള |
പ്രോട്ടീന്‍ (ഗ്രാം) |
നാര് (ഗ്രാം) |
കാത്സ്യം മി.ഗ്രാം |
ഇരുമ്പ് മി.ഗ്രാം |
വിറ്റാമിന്‍ എ ഐ.യു |
വിറ്റാമിന്‍ സി മി.ഗ്രാം |
സോഡിയം മി.ഗ്രാം |
പൊട്ടാസിയം മി.ഗ്രാം |
|
കാബേജ് |
1.8 |
1.0 |
39.0 |
0.80 |
120 |
124 |
- |
- |
|
കോളിഫ്ലവര്‍ |
2.6 |
1.2 |
33.0 |
1.23 |
30 |
56 |
53 |
138 |
|
ബീറ്റ്റൂട്ട് |
1.7 |
0.9 |
18.3 |
1.19 |
- |
59.8 |
43 |
- |
|
കാരറ്റ് |
0.9 |
1.2 |
80.0 |
1.03 |
1890 |
3 |
35.6 |
108 |
|
സവാള |
1.2 |
0.6 |
456.9 |
0.60 |
- |
11 |
4 |
127 |
|
ബീന്‍സ് |
1.7 |
1.8 |
50 |
0.61 |
132 |
27 |
- |
- |
കാബേജ്/ കോളിഫ്ലവര്‍
- നടീല്‍കാലം ഒക്ടോബര്‍-നവംബര്‍ മാസങ്ങള്‍
- കാബേജ് ഇനങ്ങള്‍ എന്‍.എസ്.-43, എന്‍.എസ്-183
- കോളിഫ്ലവര്‍ ഇനങ്ങള്‍ എന്‍.എസ്.-60, ബസന്ത്
- ഒരു സെന്‍റിന് 2 ഗ്രാം വിത്ത് അല്ലെങ്കില്‍ 100 തൈകള്‍
- വിത്ത് മുളപ്പിച്ച് 21 ദിവസം പ്രായമായ തൈകള്‍ നടാം.
- ഇടയകലം 2 അടി നല്‍കണം
- തൈകള്‍ നട്ട് 2 മാസത്തോടുകൂടി വിളവെടുപ്പിനു പാകമാകും
- ഒരു സെന്ററില്‍ നിന്നും 80 മുതല്‍ 100 കിലോഗ്രാം വിളവ്‌ പ്രതീക്ഷിക്കാം.
കാരറ്റ്/ബീറ്റ്റൂട്ട്
- ഒക്ടോബര്‍ മുതല്‍ ഫെബ്രുവരി വരെയുള്ള കാലയളവില്‍ കൃഷിചെയ്യാം.
- കാരറ്റ് ഇനം – സൂപ്പര്‍ കുറോട
- ബീറ്റ്റൂട്ട് ഇനം – മധുര്‍
- വിത്ത് നേരിട്ട് പാകി നടേണ്ടതാണ്.
- ഒരു സെന്‍റിന് 3 ഗ്രാം വിത്ത് വേണ്ടിവരും
- വിത്ത് മുളച്ച ശേഷം കൂടുതലുള്ള തൈകള്‍ പിഴുതുമാറ്റി 10-20 സെ.മീ. ഇടയകലം നിലനിര്‍ത്തണം.
- ഒരു സെന്‍റിന് 80 കിലോഗ്രാം ജൈവവളം അടിവളമായി നല്‍കണം.
- ഒരു സെന്ററില്‍ നിന്ന് 50 കിലോഗ്രാം വിളവ്‌ പ്രതീക്ഷിക്കാം.
സവാള
- ഒക്ടോബര്‍ മുതല്‍ മാര്‍ച്ച്‌ വരെയുള്ള കാലയളവില്‍ കൃഷിചെയ്യാം.
- അഗ്രിഫൗണ്ട് ഡാര്‍ക്ക് റെഡ്, അര്‍ക്ക കല്യാണ്‍ എന്നിവ സമതലങ്ങളില്‍ അനുയോജ്യമായ ഇനങ്ങളാണ്.
- ഒരു സെന്റ്‌ സ്ഥലത്തേക്ക് 3 ഗ്രാം വിത്ത് അല്ലെങ്കില്‍ 1000 തൈകള്‍ വേണ്ടിവരും.
- ചെടികള്‍ തമ്മില്‍ അര അടി ഇടയകലം നല്‍കണം.
- മണല്‍ കലര്‍ന്ന മണ്ണ് കൃഷിക്ക് അനുയോജ്യം.
- ഒന്നര മുതല്‍ 2 മാസം പ്രായമായ തൈകള്‍ പറിച്ചുനടാം.
- പറിച്ചുനട്ട് മൂന്നര മാസം കഴിഞ്ഞ് വിളവെടുക്കാം.
- വിളവെടുപ്പിനു ഒരാഴ്ച മുന്‍പായി നന നിര്‍ത്തണം.
- ഒരു സെന്ററില്‍ നിന്ന് 20-
- 40 കിലോഗ്രാം വിളവ്‌ പ്രതീക്ഷിക്കാം.
പച്ചക്കറികൃഷി മഴമറയില്‍
ഒരു വിളയെ അതിനനുയോജ്യമായ അവസ്ഥയില്‍ കാലാവസ്ഥ വ്യതിയാനങ്ങളെ ചെറുത്ത് കൊണ്ട് സംരക്ഷിച്ചുപോരുന്ന കൃഷിരീതിയാണ് സംരക്ഷിത കൃഷി എന്ന് വളരെ ലളിതമായി നിര്‍വചിക്കാം. കേരളത്തിലെ കര്‍ഷക സമൂഹത്തിന് കയ്യിലൊതുങ്ങാവുന്ന രീതിയില്‍ നിര്‍മ്മിക്കാവുന്ന സ്വാഭാവിക വായുസഞ്ചാരമുള്ള സംരക്ഷിതഗൃഹമാണ് മറമഴ. മഴയില്‍നിന്നും സംരക്ഷണം നല്‍കുക എന്നതാണ് മഴമറയുടെ പ്രധാന ഉദ്ദേശം.
- ചട്ടക്കൂടിനായി മുള, കവുങ്ങ്, കാറ്റാടി, മറ്റ് മരങ്ങള്‍, ഇരുമ്പ് പൈപ്പ് എന്നിവയില്‍ ഏതെങ്കിലും ഉപയോഗിക്കാവുന്നതാണ്. മേല്‍ക്കൂരക്കായി പരമാവധി സൂര്യപ്രകാശം കടത്തിവിടുന്നതും സുതാര്യവുമായ 200 മൈക്രോണ്‍ കനമുള്ള യു.വി സ്ടബിലൈസ്ട് പോളിത്തീന്‍ ഷീറ്റുകള്‍ ഉപയോഗിക്കാം.
- പന്തലാകൃതിയിലുള്ള (ഗാബിള്‍ ടൈപ്പ്) ഷെഡ്‌കളാണ് അനുയോജ്യമായത്.
- സൂര്യപ്രകാശം പരമാവധി ലഭിക്കുന്ന തുറസ്സായ സ്ഥലം വേണം തിരഞ്ഞെടുക്കാന്‍.
- ജലസേചന ജലനിര്‍ഗമന സൗകര്യങ്ങള്‍ ഉറപ്പാക്കണം.
- തുള്ളി നനയ്ക്കും ജലസേചനത്തിനൊപ്പമുള്ള വളപ്രയോഗത്തിലുമുള്ള സംവിധാനങ്ങള്‍ ഘടിപ്പിക്കുന്നത്, കൂലി ചെലവ് കുറയ്ക്കുകയും, വളക്ഷമത കൂട്ടുകയും ചെയ്യും.
- ഒരു മഴമറയ്ക്കുള്ളില്‍ 4-5 വിളകള്‍ വരെ ഒരേസമയം കൃഷി ചെയ്യാവുന്നതാണ്.
- മഴക്കാലത്തേക്ക് അനുയോജ്യമായ വിളകള്‍ തക്കാളി, മുളക്, ചീര, കാബേജ്, കോളിഫ്ലവര്‍, വെണ്ട, പാവല്‍, വഴുതിന തുടങ്ങിയവയാണ്.
- വേനല്‍ക്കാലത്ത് അനുയോജ്യമായത് വെണ്ട, സലാഡ് വെള്ളരി, പാവല്‍, വഴുതന, ചീര എന്നിവയാണ്.
- ശീതകാല പച്ചക്കറികളായ കാബേജ്, കോളിഫ്ലവര്‍, പാലക്ക്, ബീറ്റ്റൂട്ട്, സവാള എന്നിവ ഓഫ് സീസണില്‍ മഴമറയില്‍ ചെറിയതോതില്‍ ഉത്പാദിപ്പിക്കാവുന്നതാണ്.
- 20 മീറ്റര്‍ നീളവും 5 മീറ്റര്‍ വീതിയുമുള്ള മുള, കവുങ്ങിന്‍ കാലുകള്‍ എന്നിവ ഉപയോഗിച്ചുള്ള മഴമറയ്ക്ക് ഏകദേശം 20,000 രൂപ ചെലവ് പ്രതീക്ഷിക്കാം. ഇരുമ്പ് പൈപ്പാണ് ഉപയോഗിക്കുന്നതെങ്കില്‍ പൈപ്പിന്‍റെ കനം അനുസരിച്ച് 40,000 രൂപ ചെലവ് പ്രതീക്ഷിക്കാം.
- ഷെയ്ഡ് നെറ്റ് കൂടി ഉള്‍പ്പെടുത്തി തണല്‍ നിയന്ത്രിക്കാമെങ്കില്‍ ചെറുകിട തൈ ഉത്പാദന യൂണിറ്റായി ഇത് ഉപയോഗപ്പെടുത്താം.
- ചുരുക്കിപ്പറഞ്ഞാല്‍, വീട്ടമ്മമാര്‍ക്ക് കൈകാര്യം ചെയ്യാവുന്നത്ര ലളിതവും മെച്ചപ്പെട്ട വിപണന സാധ്യത ഉറപ്പാക്കാനും വര്‍ഷം മുഴുവന്‍ കൃഷി സാധ്യമാക്കാനും മഴമറകൊണ്ട് സാധ്യമാകുന്നു.
മട്ടുപ്പാവിലെ പച്ചക്കറി കൃഷി
കൃഷിക്ക് സ്ഥലം പരിമിതമായ നഗരപ്രദേശങ്ങളിലും, പൂര്‍ണ്ണമായി സൂര്യപ്രകാശം ലഭിക്കുന്ന ഇടം ഇല്ലാത്ത സാഹചര്യത്തിലും മട്ടുപ്പാവിലെ പച്ചക്കറി കൃഷി അവലംബിക്കാം.
മണ്ണ്, മണല്‍, ചാണകപ്പൊടി അല്ലെങ്കില്‍ കമ്പോസ്റ്റ്, എന്നിവ ചേര്‍ത്തെടുത്ത മിശ്രിതമാണ് കൃഷിക്ക് ഉപയോഗിക്കേണ്ടത്. ഈ മിശ്രിതം ചാക്കിലോ, ചട്ടിയിലോ, പ്ലാസ്റ്റിക്‌ ബാഗുകളിലോ നിറച്ച് കൃഷിക്കായി ഉപയോഗിക്കാം. ടെറസ്സില്‍ ബാഗുകള്‍/ചാക്കുകള്‍ നിരത്തുമ്പോള്‍ വെള്ളം ഇറ്റ് വീണ് ചെളി കെട്ടാതിരിക്കാന്‍ ശ്രദ്ധിക്കണം. ഇതിനായി ചാക്കുകള്‍ ഇഷ്ടികയുടെ മുകളില്‍ കയറ്റി വയ്ക്കാവുന്നതാണ്. അല്ലെങ്കില്‍ ചകിരിതോടുകള്‍ കമഴ്ത്തിവെച്ച് അതിന്‍റെ മുകളില്‍ കയറ്റി വെയ്ക്കാം. മട്ടുപ്പാവിലെ മഴവെള്ളത്തിന്‍റെ ഒഴുക്ക് തടസ്സപ്പെടാതിരിക്കാനും ഇത് ഉപകരിക്കും.
രാവിലെയും വൈകുന്നേരവും നിശ്ചിത അളവില്‍ വെള്ളമൊഴിച്ച് കൊടുക്കാം. ചെടികളുടെ പ്രായം, കാലാവസ്ഥ എന്നിവ അനുസരിച്ച് വെള്ളത്തിന്‍റെ അളവ് നിശ്ചയിക്കണം. വെള്ളത്തിന്‍റെ അളവ് കൂടിയാല്‍ ചാക്കില്‍ നിന്ന് ഇറ്റ് വീണ് മാട്ടുപ്പാവില്‍ വെള്ളം കെട്ടിനില്‍ക്കാനുള്ള സാധ്യത കൂടുതലാണ്.
മട്ടുപ്പാവിലെ കൃഷിയില്‍ കീടശല്യം പൊതുവേ കുറവായിരിക്കും. ധാരാളം ജൈവവളങ്ങളും, കീടങ്ങളെ അകറ്റുന്നതിനായി ജൈവകീടനാശിനികളും, ജൈവകുമിള്‍നാശിനിയായ സ്യൂഡോമോണാസും, ഇടവിട്ടുള്ള ജൈവലായനി പ്രയോഗവും ചിട്ടയായി അനുവര്‍ത്തിച്ചാല്‍ മട്ടുപ്പാവില്‍ നിന്നും സുരക്ഷിതമായ പച്ചക്കറി ലഭ്യമാക്കുവാന്‍ സാധിക്കുന്നതാണ്.
ജൈവപരിപാലനം – പൊതുതത്വങ്ങള്‍
v കീടരോഗപ്രതിരോധ ശേഷിയുള്ള ഇനങ്ങള്‍ കൃഷിയ്ക്കായി തിരഞ്ഞെടുക്കുക.
v ഓരോ സീസണിലും യോജിച്ച ഇനങ്ങള്‍ മാത്രം കൃഷി ചെയ്യുക.
v പരിചരണം കുറവ് ആവശ്യമുള്ള വിളകള്‍ തിരഞ്ഞെടുക്കുക.
v മണ്ണിലെ ജൈവാംശം നിലനിര്‍ത്തുന്നതിനായി പരമാവധി ജൈവവളം ഉപയോഗിക്കുക.
v മണ്ണിന്‍റെ പുളിരസം കുറയ്ക്കുന്നതിനും രോഗകാരിയായ സൂക്ഷ്മജീവികളെ നശിപ്പിക്കുന്നതിനും മണ്ണില്‍ കുമ്മായം ചേര്‍ത്ത് കൊടുക്കേണ്ടതാണ്.
v ഒരേ വിളതന്നെ ആവര്‍ത്തിച്ച് കൃഷി ചെയ്യുന്നതിന് പകരം വിവിധ വിളകള്‍ മാറി മാറി കൃഷി ചെയ്യണം.
v രോഗം ബാധിച്ച ചെടിയുടെ ഭാഗങ്ങള്‍ മൊസൈക്ക് അഥവാ നരപ്പുരോഗം, വാട്ടരോഗം എന്നിവ ബാധിച്ച ചെടികള്‍ എന്നിവ പിഴുത് നശിപ്പിച്ച് കളയുക.
v ചെടിയില്‍ പുഴുക്കള്‍, പ്രാണികളുടെ മുട്ടകള്‍, സമാധികള്‍ എന്നിവ കാണുകയാണെങ്കില്‍ അവ എടുത്ത് നശിപ്പിച്ച് കളയണം.
v നീരൂറ്റിക്കുടിക്കുന്ന പ്രാണികള്‍, കായ്/തണ്ട് തുരപ്പന്‍ പുഴുക്കള്‍, വെള്ളീച്ചകള്‍, ഇലപ്പേനുകള്‍, മീലിമുട്ടകള്‍ തുടങ്ങിയവയെ അകറ്റി നിര്‍ത്തുന്നതിനായി 2% വീര്യമുള്ള വേപ്പെണ്ണ സോപ്പ് എമല്‍ഷന്‍, വേപ്പിന്‍കുരു സത്ത്, പുകയില കഷായം, ഗോമൂത്രം, കാ‍ന്താരി മുളക് മിശ്രിതം, രൂക്ഷഗന്ധമുള്ള ഇലച്ചാറുകള്‍, വെര്‍ട്ടിസീലിയം എന്ന ജൈവ കീടനാശിനി ഇവയിലേതും ഉപയോഗിക്കാം. ഇടവിട്ട്‌ തളിച്ച് കൊടുക്കാന്‍ ശ്രദ്ധിക്കണം.
v ചീയല്‍ രോഗം, ഇലപ്പുള്ളി രോഗം, മറ്റ് പൂപ്പല്‍ രോഗം, ഇലകരിച്ചില്‍ എന്നിവ തടയുന്നതിനായി രോഗബാധിതമായ ഭാഗങ്ങള്‍ മുറിച്ചു മാറ്റിയശേഷം 2-3% വീര്യമുള്ള സ്യൂഡോമോണാസ് തളിച്ച് കൊടുക്കാം. രോഗപ്രതിരോധശേഷി വര്‍ദ്ധിപ്പിക്കുന്നതിനായി രോഗലക്ഷണം കാണുന്നതിനുമുമ്പേ ഇടവിട്ട്‌ തളിക്കുന്നതിനും ഫലപ്രദമാണ്.
ജൈവവളങ്ങള്‍
കാലിവളം, കമ്പോസ്റ്റ്, മണ്ണിരക്കമ്പോസ്റ്റ്, ചകിരിചോര്‍ കമ്പോസ്റ്റ്, പച്ചിലവളങ്ങള്‍, എല്ലുപൊടി, മത്സ്യവളം, കോഴിവളം, ചാരം, പിണ്ണാക്കുകള്‍, ഭക്ഷ്യസംസ്കരണശാലകളിലെ അവശിഷ്ടങ്ങള്‍, അറവുശാലകളില്‍ നിന്നുള്ള അവശിഷ്ടങ്ങള്‍, മനുഷ്യന്‍റെയും മറ്റു ജന്തുജാലങ്ങളുടെയും വിസര്‍ജ്യങ്ങള്‍, അസോള തുടങ്ങിയവയാണ് ചില പ്രധാന ജൈവവളങ്ങള്‍.
കാലിവളം
കൃഷിക്ക് ഏറ്റവും കൂടുതല്‍ ഉപയോഗിക്കുന്ന ഗുണമേന്മയേറിയ ഒരു ജൈവവസ്തുവാണ് കാലിവളം. ചാണകത്തിന്‍റെയും ഗോമൂത്രത്തിന്‍റെയും വൈക്കോലിന്‍റെയും തീറ്റപ്പുല്ലിന്‍റെയും ഒരു മിശ്രിതമാണിത്.
ബയോഗ്യാസ് സ്ലറി
ബയോഗ്യാസ് ഉത്പാദിപ്പിച്ച ശേഷം പ്ലാന്‍റില്‍ നിന്നും പുറത്തുവരുന്ന അവശിഷ്ടം അഥവാ സ്ലറി രോഗാണുമുക്തവും ഗുണമേന്മയുള്ളതുമായ ജൈവവളമാണ്. ബയോഗ്യാസ് സ്ലറിയില്‍ സാധാരണ ചാണകത്തേക്കാള്‍ ഹ്യൂമസ് വളരെ കൂടുതലാണ്.
ഇതില്‍ പാക്യജനകം, ഭാവഹം, ക്ഷാരം എന്നിവ ഏകദേശം 1.8:2, 0:1.2 എന്ന അനുപാതത്തില്‍ അടങ്ങിയിട്ടുണ്ട്.
ബയോഗ്യാസ് സ്ലറിയുടെ ഗുണങ്ങള്‍
വളരെ കൂടുതല്‍ അളവില്‍ ജൈവാംശം അടങ്ങിയിരിക്കുന്നു. ജീവാണുക്കള്‍ ഇതില്‍ കൂടുതലായി കാണപ്പെടുന്നു. ബയോഗ്യാസ് സ്ലറി ഒട്ടും ദുര്‍ഗന്ധം ഉണ്ടാക്കുന്നില്ല. വായുവിന്‍റെ അഭാവത്തിലുള്ള പ്രവര്‍ത്തനം മൂലം കളകളുടെ വിത്തുകളും, മറ്റ് രോഗാണുക്കളും നശിക്കുന്നു. സ്ലറി വിത്തുകളില്‍ പുരട്ടികൊടുത്താല്‍ മെച്ചപ്പെട്ട ബീജാങ്കുരണം സാധ്യമാകും.
മണ്ണിരക്കമ്പോസ്റ്റ്
സാധാരണ കമ്പോസ്റ്റുണ്ടാക്കുന്നതിനു ചുരുങ്ങിയത് 5-6 മാസം ആവശ്യമാണ്. എന്നാല്‍ 45-60 ദിവസം കൊണ്ട് മണ്ണിരയുടെ സഹായത്തോടെ പോഷകസമൃദ്ധമായ കമ്പോസ്റ്റ് ഉണ്ടാക്കുവാന്‍ സാധിക്കും. മണ്ണിരയെ ഉപയോഗിച്ച് ഉണ്ടാക്കുന്ന കമ്പോസ്റ്റിനെയാണ് മണ്ണിരക്കമ്പോസ്റ്റെന്ന് പറയുന്നത്. നാടന്‍ മണ്ണിരകളെ അപേക്ഷിച്ച് ചപ്പുചവറുകളെ കമ്പോസ്റ്റാക്കി മാറ്റാന്‍ കൂടുതല്‍ കഴിവുള്ളത് ആഫ്രിക്കന്‍ മണ്ണിരകള്‍ക്കാണ്. വീടിനുള്ളില്‍ത്തന്നെ ഒരു വീഞ്ഞപ്പെട്ടിയിലോ അടിവിസ്താരമുള്ള പ്ലാസ്റ്റിക്‌ പാത്രത്തിലോ കമ്പോസ്റ്റ് ഉണ്ടാക്കാന്‍ കഴിയും. ഒന്നര അടി നീളവും വീതിയും പൊക്കവുമുള്ള വീഞ്ഞപ്പെട്ടിയാണ്. ഉപയോഗിക്കുന്നതെങ്കില്‍ അതിന്‍റെ അടിവശത്ത് പ്ലാസ്റ്റിക്‌ ഷീറ്റ് വിരിച്ചു ചെറിയ സുഷിരങ്ങള്‍ ഇട്ട് കൊടുക്കണം. വെള്ളം വാര്‍ന്നു പോകുന്നതിനും വീഞ്ഞപ്പെട്ടി ചീത്തയാകാതിരിക്കാനുമാണ് ഇങ്ങനെ ചെയ്യുന്നത്. ഏകദേശം 4” കനത്തില്‍ ചരലും ഇതിനുമീതെ 4” കനത്തില്‍ ചകിരിയും നിരത്തി നല്ലവണ്ണം നനച്ചതിനുശേഷം 100 മുതല്‍ 250 വിരകളെ വരെ നിക്ഷേപിക്കാം. അടുക്കളയില്‍ നിന്നുള്ള പച്ചക്കറിയുടെയും മറ്റ് വസ്തുക്കളുടെയും അവശിഷ്ടങ്ങള്‍ ദിവസംതോറും ഇതിനുമേലെ നിരത്തണം. ഉണങ്ങിയ ഇലകളോ കടലാസ് കഷണങ്ങളോ ഇടയ്ക്കിടുന്നത് വിരകള്‍ക്കാവശ്യമായ വായു ലഭിക്കുന്നതിനും അധികമുള്ള ഈര്‍പ്പം വലിച്ചെടുക്കുന്നതിനും സഹായിക്കുന്നു. പച്ചക്കറി അവശിഷ്ടങ്ങളില്‍ ജലാംശം ഉള്ളതുകൊണ്ട് പ്രത്യേകിച്ച് വെള്ളം തളിക്കേണ്ടതില്ല. എന്നാല്‍ അല്പം ചാണകം ചേര്‍ക്കുന്നത് കമ്പോസ്റ്റ് നിര്‍മ്മാണത്തെ ത്വരിതപ്പെടുത്തും. എരിവും എണ്ണമയവുമുള്ള അവശിഷ്ടങ്ങള്‍ നല്ലതല്ല. പെട്ടി നിറഞ്ഞുകഴിഞ്ഞാല്‍ കമ്പിവല വെച്ചതിനുശേഷം ചാക്ക് കഷണം കൊണ്ട് മൂടണം. കമ്പിവല വെക്കുന്നത് കൊണ്ട് എലിശല്യം ഉണ്ടാകുകയില്ല.
ഇഷ്ടികയുടെയോ കല്ലിന്‍റെയോ മുകളില്‍ വീഞ്ഞപ്പെട്ടി വെക്കാം. കല്ലിന് ചുറ്റും മഞ്ഞള്‍പ്പൊടിയും ഉപ്പുംചേര്‍ത്ത മിശ്രിതം തൂവിക്കൊടുക്കുന്നത് ഉറുമ്പുശല്യം ഒഴിവാക്കാന്‍ സഹായിക്കും. ആഴ്ചയില്‍ ഒരിക്കല്‍ കമ്പോസ്റ്റ് ഇളക്കിക്കൊടുക്കണം. ആറാഴ്ചയ്ക്കകം നല്ല കറുത്ത നിറമുള്ള കമ്പോസ്റ്റ് തയ്യാറാകും. വിരകളെ മുകള്‍ഭാഗത്തുനിന്നും താഴേക്ക് മാറ്റുന്നതിനായി വീഞ്ഞപ്പെട്ടി ഇളംവെയിലത്ത് വെക്കണം. മീതെയുള്ള കമ്പോസ്റ്റ് മാറ്റിയതിനുശേഷം, ഈ പെട്ടിയും അതിലെ വിരകളെയും വീണ്ടും കമ്പോസ്റ്റ് നിര്‍മ്മാണത്തിനായി ഉപയോഗിക്കാം.
വെര്‍മിവാഷ്
മണ്ണിരക്കമ്പോസ്റ്റിലൂടെ വെള്ളമോ ചാണക വെള്ളമോ സാവധാനം ഒഴിച്ച് ഒരു നിശ്ചിത സമയത്തിനുശേഷം (ഏകദേശം 24 മണിക്കൂര്‍) ശേഖരിക്കുന്ന ദ്രവരൂപത്തിലുള്ള ജൈവവളമാണ് വെര്‍മിവാഷ്. ഇത് നേരിട്ട് മണ്ണില്‍ ഒഴിച്ചുകൊടുക്കുകയോ വെള്ളം ചേര്‍ത്ത് നേര്‍പ്പിച്ച് ഇലകളിലൂടെ തളിച്ചുകൊടുക്കുകയോ ചെയ്യാം.
ചകിരിച്ചോര്‍ കമ്പോസ്റ്റ്
ഒരു ടണ്‍ ചകിരിച്ചോര്‍ കമ്പോസ്റ്റാക്കുന്നതിന് 5 കിലോഗ്രാം യൂറിയയും 1.5 കിലോഗ്രാം കൂണ്‍വിത്തും ആവശ്യമാണ്. കമ്പോസ്റ്റുണ്ടാക്കുന്നതിനായി 5 മീറ്റര്‍ നീളവും 3 മീറ്റര്‍ വീതിയുമുള്ള തണലുള്ള നിരപ്പായ ഒരു സ്ഥലം തിരഞ്ഞെടുക്കുക. അവിടെ 100 കി.ഗ്രാം ചകിരിച്ചോര്‍ 2 സെന്റിമീറ്റര്‍ കനത്തില്‍ നിരത്തുക. അതിനുമുകളില്‍ ചിപ്പികൂണ്‍ എല്ലായിടത്തും വീഴുന്ന രീതിയില്‍ വിതറുക. അതിനുമുകളില്‍ വീണ്ടും 100 കി.ഗ്രാം ചകിരിച്ചോര്‍ നിരത്തിയ ശേഷം 1 കി.ഗ്രാം യൂറിയ വിതറുക. ലഭ്യമായ ഘടകവസ്തുക്കള്‍ തീരുന്നതുവരെ ഈ പ്രക്രിയ തുടരുക. ഈര്‍പ്പം ഏകദേശം 60 ശതമാനമാക്കി നിലനിര്‍ത്തുന്നതിനാവശ്യമായ വെള്ളം തളിച്ചുകൊടുക്കണം. കൂന ചണച്ചാക്ക് കൊണ്ട് മൂടിയിടുന്നത് ഈര്‍പ്പം നിലനിര്‍ത്താന്‍ സഹായിക്കും. 60-90 ദിവസം കൊണ്ട് ചകിരിച്ചോര്‍ പൊടിഞ്ഞ് കറുത്തനിറത്തിലുള്ള കമ്പോസ്റ്റായി മാറും.
പച്ചിലവളങ്ങള്‍
ചാണകം, ചാരം എന്നിവയോടൊപ്പം പച്ചിലവളങ്ങളും കൃഷിയിടങ്ങളില്‍ ഉപയോഗിക്കാം. കൃഷിയിടങ്ങളില്‍ പച്ചിലവളച്ചെടി വളര്‍ത്തി അവിടെത്തന്നെ ഉഴുതുചേര്‍ക്കുന്ന രീതിയും അവ കൃഷിസ്ഥലത്തിന്‍റെ വരമ്പുകളിലോ മറ്റു പുറമ്പോക്ക് സ്ഥലങ്ങളിലോ കൃഷിചെയ്ത് അവയുടെ ഇല ശേഖരിച്ച് മണ്ണില്‍ ചേര്‍ക്കുന്ന രീതിയും നിലവിലുണ്ട്. രണ്ടു രീതിയിലും ഗുണം ഒന്നുതന്നെ. വളം നല്‍കേണ്ട സ്ഥലത്തുതന്നെ നട്ടുവളര്‍ത്താന്‍ പറ്റിയ ചെടികളാണ് ചണമ്പ്, ഡേയ്ഞ്ച, ഡിസ്ബേനിയ, തുവര, കൊഴിഞ്ഞില്‍, വന്‍പയര്‍ തുടങ്ങിയവ.
എല്ലുപൊടി
ഫോസ്ഫറസ് കൂടുതല്‍ അടങ്ങിയിട്ടുള്ള ഒരു ജൈവവളമാണ് എല്ലുപൊടി. എല്ലുപൊടിയില്‍ 22 ശതമാനം ഫോസ്ഫറസുണ്ട്. നൈട്രജന്‍, ഫോസ്ഫറസ് എന്നിവയ്ക്ക് പുറമേ കാത്സ്യവും അടങ്ങിയിട്ടുള്ളതുകൊണ്ട് അമ്ലസ്വഭാവമുള്ള കേരളത്തിലെ മണ്ണിലേക്ക് ഏറ്റവും യോജിച്ച ഒരു ജൈവ-ഭാവഹ വളമാണ് എല്ലുപൊടി എന്നുപറയാം.
മത്സ്യവളം
ഭക്ഷ്യയോഗ്യമായതും അല്ലാത്തതുമായ മത്സ്യങ്ങള്‍ ഉണക്കിപൊടിച്ചതാണ് മത്സ്യവളം. മണ്ണില്‍ പെട്ടെന്ന് അഴുകിച്ചേരും എന്നതുകൊണ്ട് എല്ലാ വിളകള്‍ക്കും ഇത് നല്ലതാണ്. നൈട്രജന്‍ 4.1 ശതമാനം, ഫോസ്ഫറസ് 3.9 ശതമാനം, പൊട്ടാസിയം 0.3 – 1.5 ശതമാനം എന്നിങ്ങനെയാണ്.
കോഴിവളം
പ്രകൃതിയിലുള്ള ജൈവവളങ്ങളില്‍ വച്ചേറ്റവും ഗുണമേന്മ ഏറിയതാണ് കോഴിവളം. കോഴിവളങ്ങളില്‍ കോഴിയുടെ കാഷ്ടത്തിനുപുറമേ മൂത്രാശയ വിസര്‍ജ്ജ്യവും അടങ്ങിയിരിക്കുന്നു. ഇതില്‍ 1.2 – 1.5 ശതമാനം നൈട്രജനും, 1.4 – 1.8 ശതമാനം ഫോസ്ഫറസ്സും, 0.8 – 0.9 ശതമാനം പൊട്ടാസ്യവും ഉണ്ട്.
ആട്ടിന്‍കാഷ്ടം
ധാരാളം നൈട്രജന്‍ (0.8-1.6%) അടങ്ങിയിട്ടുള്ളവയാണ് ആടിന്‍റെ കാഷ്ടവും മൂത്രവും. കൂടാതെ 0.3-0.3% ശതമാനം വീതം ഫോസ്ഫറസ്സും പൊട്ടാസ്യവും അടങ്ങിയിരിക്കുന്നു. പ്രത്യേക ഘടന മൂലം കാലിവളം പോലെ പെട്ടെന്ന് മണ്ണില്‍ ചേര്‍ന്നുകിട്ടുകയില്ല. അതുകൊണ്ട് ഉണക്കിപ്പൊടിച്ചോ, കമ്പോസ്റ്റാക്കിയോ ഉപയോഗിക്കുന്നതാണ് കൂടുതല്‍ മെച്ചം.
സംസ്കരണശാലകളിലെ അവശിഷ്ടങ്ങള്‍
പഴം-പച്ചക്കറി സംസ്കരണശാലകളില്‍ നിന്ന് ലഭിക്കുന്ന അവശിഷ്ടങ്ങള്‍ കമ്പോസ്റ്റുണ്ടാക്കാന്‍ ഉപയോഗിക്കാവുന്നതാണ്. നെല്ലുകുത്ത് മില്ലുകളില്‍ നിന്നും ലഭിക്കുന്ന ഉമിയും തവിടും നല്ലൊരു ജൈവവളമാണ്.
ചാരം
വിളകള്‍ക്ക് പൊട്ടാസ്യം എന്ന മൂലകം നല്‍കുന്നതിനായി പഴയകാലം മുതല്‍ ഉപയോഗിച്ചുവരുന്ന ഒരു ജൈവവളമാണ് ചാരം. ഇതില്‍ 0.5-2 ശതമാനം വരെ നൈട്രജനും, 1.6-4.2 ശതമാനം ഫോസ്ഫറസും 2.3-12 ശതമാനം വരെ പൊട്ടാസ്യവും ഉണ്ട്.
പിണ്ണാക്കുകള്‍
ഭക്ഷ്യയോഗ്യമായതും അല്ലാത്തതുമായ എല്ലാ പിണ്ണാക്കുകളും നല്ല ജൈവവളങ്ങളാണ്. മറ്റ് ജൈവവളങ്ങളെ അപേക്ഷിച്ച് കൂടുതല്‍ പോഷകമൂലകങ്ങള്‍ അടങ്ങിയിരിക്കുന്നതിനാല്‍ ഇത് ഒരു സാന്ദ്രീകൃത ജൈവവളമാണ്. കാര്‍ബണ്‍-നൈട്രജന്‍ അനുപാതം വളരെ കുറവായതിനാല്‍ മറ്റ് ജൈവവളങ്ങളെക്കാള്‍ വേഗത്തില്‍ വിഘടനം സംഭവിച്ച് ഗുണം എളുപ്പം ലഭ്യമാക്കുന്നു.
ജൈവവളക്കൂട്ടുകള്‍
പുളിപ്പിച്ച് നേര്‍പ്പിച്ച പിണ്ണാക്ക് ലായനി
വേപ്പിന്‍പിണ്ണാക്ക് - 1 കി.ഗ്രാം
കപ്പലണ്ടി പിണ്ണാക്ക് - 1 കി.ഗ്രാം
പച്ചചാണകം - 1 കി.ഗ്രാം
ഗോമൂത്രം - 1 ലിറ്റര്‍
വെള്ളം - 10 ലിറ്റര്‍
മേല്‍പ്പറഞ്ഞ ഒരു പ്ലാസ്റ്റിക്‌ ഡ്രമ്മിനകത്ത് ഇട്ട് നന്നായി ഇളക്കി പുളിപ്പിക്കുവാനായി മൂടിവെക്കുക. ദിവസവും ഇളക്കിക്കൊടുക്കേണ്ടതാണ്. മൂന്നാം ദിവസം മുതല്‍ ഉപയോഗിച്ചുതുടങ്ങാം. ഏഴു ദിവസത്തിനകം ഉപയോഗിച്ച് തീര്‍ക്കുകയോ പുതിയ മിശ്രിതം ചേര്‍ക്കുകയോ ചെയ്യണം. പുഴു വരാതിരിക്കാനായി ഒരുപിടി കരിനൊച്ചിയുടെ ഇല ഇടുന്നത് നന്നായിരിക്കും. ഒരു ഭാഗം ലായനി 7 ഭാഗം വെള്ളം ചേര്‍ത്ത് ചുവട്ടില്‍ ഒഴിച്ചുകൊടുക്കുകയോ അരിച്ചതിനുശേഷം ഇലയില്‍ തളിച്ചുകൊടുക്കുകയോ ചെയ്യാം.
മീന്‍ അമിനോ അമ്ലം
ആവശ്യമായ സാധനങ്ങള്‍
ചെറുമീന്‍ അല്ലെങ്കില്‍ മീന്‍ വേസ്റ്റ് - 1 കി.ഗ്രാം
വേസ്റ്റ് ശര്‍ക്കര പൊടി - 1 കി.ഗ്രാം
മീന്‍, ശര്‍ക്കര പൊടി ഇവ അടുക്കുകളായി ഒരു പാത്രത്തില്‍ നിരത്തുക. പാത്രം മൂടിവെക്കുക. തുടക്കത്തില്‍ മീന്‍മണം ഉണ്ടാകുമെങ്കിലും 10-15 ദിവസം കഴിയുമ്പോഴേക്കും ഇത് കുറഞ്ഞ് വരും. 21 ദിവസം കഴിഞ്ഞ് സത്ത് അരിച്ചെടുത്ത് മുറുക്കി അടക്കാവുന്ന കുപ്പികളിലോ പാത്രങ്ങളിലോ 2-3 മാസംവരെ സൂക്ഷിച്ചുവെക്കാം. 2-5 മില്ലി ഒരു ലിറ്റര്‍ വെള്ളത്തില്‍ എന്ന തോതില്‍ ഇലകളില്‍ തളിച്ചുകൊടുക്കാം.
മുട്ട അമിനോ അമ്ലം
മുട്ട - 10 എണ്ണം
നാരങ്ങാനീര് - 30-40 നാരങ്ങയുടെത്
ശര്‍ക്കര - 100 ഗ്രാം
ഒരു പാത്രത്തില്‍ മുട്ട നിരത്തിയതിന്ശേഷം നാരങ്ങാനീര് ഒഴിക്കുക. മുട്ടകള്‍ മുങ്ങിക്കിടക്കുന്ന വിധത്തില്‍ നാരങ്ങാനീര് ഒഴിക്കണം. ഇത് ഇളകാതെ വെക്കണം. 20-30 മിനിട്ടുകള്‍ കഴിയുമ്പോഴേക്കും രാസപ്രവര്‍ത്തനം നടക്കുന്നത് കാണാം. 10 ദിവസത്തിനു ശേഷം കലക്കി ഇളക്കിയശേഷം 100 ഗ്രാം ശര്‍ക്കര ഉരുക്കിയത് തണുപ്പിച്ച് ഒഴിക്കുക. വീണ്ടും 10 ദിവസം സൂക്ഷിക്കുക. അതിനുശേഷം ഊറ്റി ഉപയോഗിക്കാം. 2-5 മില്ലി 1 ലിറ്റര്‍ വെള്ളത്തില്‍ എന്ന തോതില്‍ ഇലകളില്‍ തളിച്ചുകൊടുക്കുകയോ ചെടിയുടെ കടഭാഗത്ത് ഒഴിച്ചുകൊടുക്കുകയോ ആവാം.
അമൃതപാനി
- പച്ചചാണകം - 1 കിലോ
- ഗോമൂത്രം - 1 ലിറ്റര്‍
- ശര്‍ക്കര - 250 ഗ്രാം
- വെള്ളം - 10 ലിറ്റര്‍
- പയര്‍വര്‍ഗ്ഗപൊടി - 250 ഗ്രാം
മേല്‍പ്പറഞ്ഞ ചേരുവകള്‍ ഒരു പ്ലാസ്റ്റിക്‌ ബക്കറ്റില്‍ നന്നായി യോജിപ്പിച്ച് കോട്ടണ് തുണികൊണ്ട് മൂടി സൂര്യപ്രകാശമില്ലാത്ത സ്ഥലത്ത് 24 മണിക്കൂര്‍ സൂക്ഷിക്കുക. ഇത് 1 ലിറ്റര്‍ ലായനിയില്‍ 10 ലിറ്റര്‍ വെള്ളം ചേര്‍ത്ത് എല്ലാ വിളകള്‍ക്കും തളിച്ചുകൊടുക്കാം.
ജീവാമൃതം
ചാണകം - 20 ഗ്രാം
ഗോമൂത്രം - 20 ലിറ്റര്‍
ശര്‍ക്കര - 2 കി.ഗ്രാം
വെള്ളം - 20 ലിറ്റര്‍
വളക്കൂറുള്ള / വനത്തില്‍ നിന്നുള്ള മേല്‍മണ്ണ്‍ - 1 കി.ഗ്രാം
മേല്‍പ്പറഞ്ഞ ചേരുവകള്‍ ഒരു പ്ലാസ്റ്റിക്‌/മണ്‍/സിമന്‍റ് പാത്രത്തില്‍ നന്നായി മിക്സ് ചെയ്ത് വെക്കുക. 24 മണിക്കൂറിനുശേഷം ലായനി റെഡിയാകും. നേരിയ തുണി അല്ലെങ്കില്‍ അരിപ്പ ഉപയോഗിച്ച് ഈ ലായനി അരിച്ചെടുക്കുക. തയ്യാറാക്കിയ ലായനി ദിവസവും രാവിലെയും വൈകുന്നേരവും ഇളക്കി 3-4 ദിവസം വരെ സൂക്ഷിക്കാവുന്നതാണ്.
1:10 അനുപാതത്തില്‍ വെള്ളം ചേര്‍ത്ത് ഇത് ഉപയോഗിക്കാവുന്നതാണ്.
പഞ്ചഗവ്യം
പച്ചചാണകം - 5 കിലോ
ഉരുക്കിയ നെയ്യ് - 1 കിലോ
പാല്‍ - 2 ലിറ്റര്‍
ഗോമൂത്രം - 5 ലിറ്റര്‍
തൈര് - 2 ലിറ്റര്‍
പച്ചചാണകവും ഉരുക്കിയ നെയ്യും മണ്‍പാത്രങ്ങളിലോ പ്ലാസ്റ്റിക്‌ വീപ്പയിലോ ചേര്‍ത്ത് നന്നായി കുഴച്ചശേഷം തുണികൊണ്ട് മൂടിക്കെട്ടി തണലില്‍ വെക്കുക. ദിവസം 3 പ്രാവശ്യം വീതം 5 ദിവസം നന്നായി നനക്കുക. ആറാം ദിവസം പാല്‍, ഗോമൂത്രം, തൈര് ഇവ ചേര്‍ത്ത് നന്നായി ഇളക്കുക. ദിവസം 3 തവണ വീതം 15 ദിവസം നന്നായി ഇളക്കി തുണികൊണ്ട് മൂടി തണലില്‍ സൂക്ഷിക്കുക. പഴം, ശര്‍ക്കര, കള്ള് എന്നിവ 500 ഗ്രാം വീതം ചേര്‍ക്കുന്നത് ഗുണനിലവാരം കൂട്ടും. 6 മാസം വരെ പഞ്ചഗവ്യം സൂക്ഷിച്ചുവെക്കാം.
1:10 അനുപാതത്തില്‍ വെള്ളവുമായി ചേര്‍ത്ത് നന്നായി ഇളക്കിയതിനുശേഷം ചെടിയുടെ ചുവട്ടില്‍ ഒഴിച്ചുകൊടുക്കുക. 1:50 അനുപാതത്തില്‍ വെള്ളവുമായി ചേര്‍ത്ത് നന്നായി ഇളക്കിയശേഷം ചെടികളുടെ ഇലയില്‍ തളിക്കാം.
ഇ.എം സൊലൂഷന്‍
മഞ്ഞ നിറമുള്ള പഴങ്ങള്‍ (ഏതെങ്കിലും മൂന്നിനം) 1 കിലോ വീതം (ഉദാ: പപ്പായ, പഴുത്ത മത്തങ്ങ, വാഴപ്പഴം)
ശര്‍ക്കര - 1 കിലോ
നാടന്‍ മുട്ട - 1
മന്കലം - 1
മേല്‍പ്പറഞ്ഞ പഴങ്ങള്‍ ചെറുകഷണങ്ങളാക്കിയോ അരച്ചോ, മറ്റ് ചേരുവകളും ചേര്‍ത്ത് മങ്കലത്തില്‍ ¾ ഭാഗം നിറക്കുക. കോട്ടന്‍ തുണി ഉപയോഗിച്ച് മന്കലം നന്നായി മൂടിക്കെട്ടി 10 ദിവസം വെക്കുക. അതിനുശേഷം മുകളില്‍ വന്ന വെള്ളപ്പാട എടുത്ത് മാറ്റിയതിനുശേഷം നന്നായി ഇളക്കി 20 ദിവസം സൂക്ഷിക്കുക. 2 ലിറ്റര്‍ മിശ്രിതം 50 ലിറ്റര്‍ വെള്ളവുമായി യോജിപ്പിച്ച് 1 ഏക്കര്‍ സ്ഥലത്ത് ഉപയോഗിക്കാവുന്നതാണ്.
ജൈവരോഗ കീടനിയന്ത്രണത്തിനുള്ള ജീവാണുക്കള്‍
ജൈവകൃഷിക്ക് പ്രാധാന്യം നല്‍കി വരുന്നതില്‍ നമ്മുടെ രാജ്യവും സംസ്ഥാനവും മുന്നില്‍ തന്നെയുണ്ട്. നല്ല മണ്ണും നല്ല വിത്തും ഒപ്പം ജൈവസാങ്കേതിക വിദ്യകളും ഉപയോഗിച്ചുകൊണ്ടുള്ള കൃഷിക്കാണ് മുന്‍ഗണന നല്‍കുന്നത്. അവയില്‍ മുഖ്യരാണ് സ്യുഡോമോണാസ് ഫ്ലൂറസന്‍സ്, ബാസില്ലസ് തുറിഞ്ചിയന്‍സ് എന്നീ ബാക്ടീരിയകളും, ട്രൈക്കോടെര്‍മ, വെര്‍ട്ടിസീലിയം, മെറ്റാറൈസിയ, ബ്യുവേറിയ, ഫ്യൂസേറിയം എന്നീ കുമിളുകളും ന്യൂക്ലിയര്‍ പോളി ഹൈഡ്രോസിസ് എന്ന വൈറസും മറ്റും.
സ്യൂഡോമോണാസ് ഫ്ലൂറസെന്‍സ്
പൊടിരൂപത്തിലും ദ്രവരൂപത്തിലും ഇവ ലഭ്യമാണ്. സ്യൂഡോമോണാസ് ഫ്ലൂറസെന്‍സ് എന്ന ബാക്ടീരിയയെ സര്‍വ്വരോഗ സംഹാരി എന്ന് വിശേഷിപ്പിക്കുന്നു. കുമിള്‍, ബാക്ടീരിയ, ഇലതീനിപ്പുഴുക്കള്‍, നിമാവിരകള്‍ എന്നിവക്കെതിരെയും സ്വയം വളര്‍ച്ചയെ ത്വരിതപ്പെടുത്തുന്ന ഹോര്‍മോണുകളും, എന്‍സൈമുകളും മറ്റും ഉല്‍പ്പാദിപ്പിക്കാനുള്ള കഴിവ് സ്യൂഡോമോണാസിനുണ്ട്. കൂടാതെ ആന്‍റിബയോട്ടിക്കുകള്‍ ഉല്‍പ്പാദിപ്പിക്കുകയും ചില രാസവസ്തുക്കളുടെ ഉല്‍പ്പാദനത്താല്‍ ഇരുമ്പിന്‍റെ ലഭ്യത കുറക്കുകയും അവയുടെ നശീകരണത്തിന് കാരണമാവുകയും ചെയ്യുന്നു. നാല് രീതിയില്‍ അവ ഉപയോഗിക്കാം.
വിത്തില്‍ പുരട്ടാന്‍:- ഒരു കിലോഗ്രാം വിത്തിന് 10 ഗ്രാം എന്ന തോതില്‍ കൂട്ടിക്കലര്‍ത്തി അരമണിക്കൂര്‍ വെച്ചശേഷം നടണം.
വേരില്‍ മുക്കാന്‍:- 250 ഗ്രാം സ്യൂഡോമോണാസ് 750 മില്ലി ലിറ്റര്‍ വെള്ളത്തില്‍ ചേര്‍ത്ത ലായനിയില്‍ 20 മിനിറ്റ് മുക്കിവെച്ച ശേഷം നടാം.
മണ്ണില്‍ പ്രയോഗിക്കാന്‍:- ഒരു കിലോഗ്രാം സ്യൂഡോമോണാസ് 20 കിലോഗ്രാം മണല്‍ ചേര്‍ത്ത് മണ്ണില്‍ ഇട്ടുകൊടുക്കാം. ഒരേക്കര്‍ സ്ഥലത്തേക്ക് ഒരു കിലോഗ്രാം പൊടി മതിയാകും. ഇവ പ്രയോഗിക്കുന്നതിന് ഒരാഴ്ച മുമ്പ് മണ്ണില്‍ കുമ്മായം ചേര്‍ത്തിരിക്കണം. പി.എച്ച് 6.5 – 7.5 ഇടയ്ക്കായിരിക്കണം.
ചെടികളില്‍ തളിക്കാന്‍:- 10-20 ഗ്രാം പൊടി ഒരു ലിറ്റര്‍ വെള്ളത്തില്‍ കലക്കി തളിച്ചാല്‍ മതിയാകും. ഒരേക്കര്‍ സ്ഥലത്തിന് 200 ലിറ്റര്‍ ലായനി വേണ്ടിവരും.
പോട്ടിംഗ് മിശ്രിതം:- മണ്ണ്, മണല്‍, ചാണകപ്പൊടി 1:1:1 എന്ന അനുപാതത്തില്‍ ചേര്‍ത്തുണ്ടാക്കിയ പോട്ടിംഗ് മിശ്രിതം ഒരു കിലോഗ്രാമില്‍ 2 ഗ്രാം എന്ന തോതില്‍ സ്യൂഡോമോണാസ് 2-5 മില്ലി ലിറ്റര്‍ ഒരു ലിറ്റര്‍ വെള്ളത്തില്‍ കലക്കി തളിക്കാം. ചെടികളില്‍ തളിക്കുന്നതിനും മണ്ണില്‍ കലക്കി ഒഴിക്കുന്നതിനും ദ്രവരൂപത്തിലുള്ള സ്യൂഡോമോണാസ് ഉപയോഗിക്കുന്നതാണ് നല്ലത്. ഇവ കൂടുതല്‍ നാള്‍ സൂക്ഷിച്ചുവെക്കാനും സാധിക്കും. നെല്ല് തുടങ്ങി എല്ലാ വിളകള്‍ക്കും സ്യൂഡോമോണാസ് പ്രയോഗിക്കാവുന്നതാണ്.
ബാസില്ലസ് തുറിഞ്ചിയന്‍സ്
ഇവ സ്വാഭാവികമായി മണ്ണില്‍ കാണപ്പെടുന്നതും കീടങ്ങള്‍ക്ക് രോഗം ഉണ്ടാക്കുന്നതുമായ ഒരു ബാക്ടീരിയയാണ്. തളിക്കുമ്പോള്‍ ഈ ബാക്ടീരിയ കീടങ്ങളുടെ പുഴുക്കളുടെ അന്നനാളത്തില്‍ കടക്കുകയും ഇവ ഉല്‍പ്പാദിപ്പിക്കുന്ന വിഷവസ്തുക്കള്‍ കീടങ്ങളുടെ ദഹന സംവിധാനത്തെ സ്തംഭിപ്പിക്കുകയും ചെയ്യുന്നു. ഇപ്രകാരം കീടങ്ങള്‍ ഭക്ഷണം എടുക്കാതെ നശിച്ചുപോകുന്നു. ബി.റ്റി. ഉപയോഗിക്കുമ്പോള്‍ ചെടിയുടെ എല്ലാഭാഗത്തും വീഴത്തക്കവണ്ണം വേണം തളിക്കാന്‍. മുട്ടകള്‍ വിരിഞ്ഞ് പുഴുക്കള്‍ പുറത്തുവരുന്ന സമയത്തോ, പുഴുക്കളുടെ വളര്‍ച്ചയുടെ ആരംഭത്തിലോ ഇവ തളിക്കുന്നത് വളരെ ഫലപ്രദമാണ്. നമ്മുടെ കാലാവസ്ഥയില്‍ വൈകുന്നേരങ്ങളില്‍ തളിക്കുന്നതാണ് നല്ലത്.
കുമിളുകള്‍
കീടങ്ങള്‍ക്ക് പലതരം കുമിള്‍ രോഗങ്ങളും ഉണ്ടാകാറുണ്ട്. ട്രൈക്കൊടെര്‍മ, ബ്യുവേറിയ, മെറ്റാറൈസിയം, വെര്‍ട്ടിസീലിയം, ഫ്യൂസേറിയം, പെനിസീലിയം, ആസ്പര്‍ജില്ലസ് തുടങ്ങിയ ജനുസ്സുകളില്‍പ്പെട്ട പലതരം കുമിളുകള്‍ കീടങ്ങളെ ആക്രമിക്കുന്നു. കീടങ്ങളുടെ ശരീരത്തില്‍ വീഴുന്ന വിത്തുകള്‍ അനുകൂല സാഹചര്യത്തില്‍ മുളച്ച് കീടങ്ങളുടെ തൊലി തുളച്ച് അകത്തുകയറുന്നു. ശരീരത്തിന്‍റെ ഉള്‍ഭാഗത്ത് പടര്‍ന്ന് കീടങ്ങളെ നശിപ്പിക്കുന്നു. ചത്ത കീടങ്ങളുടെ ശരീരോപരിതലത്തില്‍ കുമിളുകള്‍ വളര്‍ന്നു നില്‍ക്കുന്നത്കാണാം.
ബ്യുവേറിയ ബാസിയാന (വെളുത്ത കുമിള്‍)
പച്ചക്കറി വിളകളിലെ ഇലതീനി പുഴുക്കള്‍ക്കെതിരെ ഫലപ്രദം. 10-15 ഗ്രാം ഒരു ലിറ്റര്‍ വെള്ളത്തില്‍ കലക്കി ചെടികളില്‍ തളിക്കാവുന്നതാണ്.
മെറ്റാറൈസിയം അനിസപ്ലിയെ (പച്ചനിറത്തിലുള്ള കുമിള്‍)
ചിതലിനെതിരെയും, വേരുതീനി പുഴുക്കള്‍ക്കെതിരെയും പ്രയോഗിക്കാവുന്നതാണ്. ഈ കുമിള്‍ ഡിസ്ട്രസ്സില്‍ എ. ബി എന്നീ രണ്ടുതരം വിഷം ഉത്പാദിപ്പിക്കുന്നു. 10-15 ഗ്രാം ഒരു ലിറ്റര്‍ വെള്ളത്തില്‍ കലക്കി തളിച്ചാല്‍ മതിയാകും. ഈ പച്ചക്കുമിള്‍ ഉപയോഗിച്ച് തെങ്ങിന്‍റെ കീടമായ കൊമ്പന്‍ചെല്ലിയുടെ പുഴുക്കളെ എളുപ്പത്തില്‍ നശിപ്പിക്കാന്‍ കഴിയും. ചെല്ലിയുടെ പുഴുക്കള്‍ വളരുന്ന ചാണകക്കുഴികളില്‍ ഈ കുമിളിനെ തളിച്ചുകൊടുത്താല്‍ 10-15 ദിവസത്തിനകം പുഴുക്കള്‍ ചത്തുപോകുന്നു.
വെര്‍ട്ടിസീലിയം ലക്കാനി
നീരൂറ്റിക്കുടിക്കുന്ന പ്രാണികള്‍ക്കും പ്രത്യേകിച്ച് മീലിമുട്ടക്കുമെതിരെ ഫലപ്രദം. 10-15 ഗ്രാം ഒരു ലിറ്റര്‍ വെള്ളത്തില്‍ കലക്കി ചെടികളില്‍ തളിച്ചാല്‍ മതിയാകും. ബാര്‍സോപ്പ്‌ അരിഞ്ഞത് 5 ഗ്രാം ഒരു ലിറ്റര്‍ ചെറുചൂടുവെള്ളത്തില്‍ ലയിപ്പിച്ചശേഷം മീലിമുട്ടയുടെ ആക്രമണമുള്ള ചെടികളില്‍ തളിക്കണം.
ട്രൈക്കൊടെര്‍മ
ചെടികള്‍ക്ക് രോഗമുണ്ടാകുന്ന പല രോഗാണുക്കളുടെയും ജൈവീക നിയന്ത്രണത്തിനായി ഇവയെ നശിപ്പിക്കുന്ന സൂക്ഷ്മാണുക്കളെ ഉപയോഗിക്കാം. ഇവയില്‍ മുഖ്യനാണ് ട്രൈക്കൊടെര്‍മ എന്ന കുമിള്‍. ഇവയുടെ വംശവര്‍ധനവ്‌ നടത്തി മണ്ണില്‍ ചേര്‍ക്കുന്നതിന് കേരള കാര്‍ഷിക സര്‍വ്വകലാശാല ഒരു നൂതന മാര്‍ഗ്ഗം കണ്ടെത്തിയിട്ടുണ്ട്. ഇതിനായി വേപ്പിന്‍പിണ്ണാക്കും ചാണകവും ഉപയോഗിച്ചുള്ള ഒരു കൂട്ടാണ് വേണ്ടത്.
ഉണങ്ങിയ ചാണകവും (90 കിലോഗ്രാം) വേപ്പിന്‍പിണ്ണാക്കും (10 കിലോഗ്രാം) പൊടിച്ച് ഒരു പരുപരുത്ത മിശ്രിതം ഉണ്ടാക്കുക. ഇത് ചെറുതായി നനക്കണം. കവറില്‍ കിട്ടുന്ന ട്രൈക്കൊടെര്‍മയുടെ മിശ്രിതം 1-2 കിലോഗ്രാം, വേപ്പിന്‍പിണ്ണാക്ക് – ചാണക മിശ്രിതവുമായി കലര്‍ത്തി നന്നായി ഇളക്കിയ ശേഷം ദ്വാരമുള്ള പോളിത്തീന്‍ ഷീറ്റോ പത്രക്കടലാസ്സോ ഉപയോഗിച്ച് മൂടി, തണലത്ത് 4 മുതല്‍ 5 ദിവസം വരെ വംശവര്‍ധനവിനായി വെയ്ക്കുക. വീണ്ടും നന്നായി ഇളക്കി മൂന്നു ദിവസം കൂടി ഇവ വര്‍ധിപ്പിക്കാന്‍ വെക്കുക. ഇപ്പോള്‍ ഇത് മണ്ണില്‍ ചേര്‍ക്കുവാന്‍ തയ്യാറായി കഴിഞ്ഞു. ചാണകപ്പൊടി മാത്രം ഉപയോഗിക്കാമെങ്കിലും വേപ്പിന്‍പിണ്ണാക്ക് കൂടുതല്‍ ഫലപ്രദമാണെന്ന് കണ്ടിട്ടുള്ളതിനാല്‍ ഇവ 1:10 എന്ന അനുപാതത്തില്‍ ഉപയോഗിക്കുന്നതാണ് നല്ലത്. ചാണകമാണ് ഉപയോഗിക്കുന്നതെങ്കില്‍ 5 ദിവസത്തിലൊരിക്കല്‍ ഇളക്കി കൊടുക്കണം. പതിനഞ്ചു ദിവസം കൊണ്ട് ഇവ തയ്യാറാകും. ഇങ്ങനെ തയ്യാറാക്കിയ ട്രൈക്കൊടെര്‍മ – വേപ്പിന്‍ പിണ്ണാക്ക് – ചാണക മിശ്രിതം തവാരണകളിലും മുഖ്യ കൃഷിയിടങ്ങളിലും ആവശ്യാനുസരണം ഉപയോഗിക്കാം. ഫൈറ്റോഫ്തോറ, പിത്തിയം എന്നീ കുമിളുകള്‍ക്കെതിരേ ഏറെ ഫലപ്രദം.
ഫ്യൂസേറിയം പാലിഡോറോസിയം
പയറിലും മറ്റും കാണുന്ന കറുത്ത മുഞ്ഞക്കെതിരെയും കുളവാഴ നിയന്ത്രണത്തിനും ഫലപ്രദം.
വൈറസുകള്‍
ഏകദേശം 450 വൈറസുകളെ കീടങ്ങളില്‍ നിന്ന് വേര്‍തിരിച്ചിട്ടുണ്ട്. ഇവയില്‍ കൂടുതലും ശലഭങ്ങള്‍, കടന്നലുകള്‍, ഈച്ചകള്‍ എന്നിവയുടെ പുഴുദശയില്‍ രോഗം വരുത്തുന്നവയാണ്.
എന്‍.പി.വി. (ന്യൂക്ലിയര്‍ പോളി ഹൈഡ്രോസിസ് വൈറസുകള്‍)
വൈറസുകളുടെ കൂട്ടത്തില്‍ ഏറ്റവും പ്രധാനപ്പെട്ട ഒന്നാണ് എന്‍.പി.വി. ഇവിടെ കുറെ സൂക്ഷ്മാണുക്കള്‍ ഒരു മാംസ്യത്തിന്‍റെ ആവരണം കൊണ്ട് പൊതിയപ്പെട്ടതായി കാണുന്നു. കീടത്തിന്‍റെ ആഹാരത്തില്‍ കൂടെ ഉള്ളില്‍ ചെല്ലുന്ന ഈ സൂക്ഷ്മാണുക്കള്‍ പലതരം കോശങ്ങളെ ആക്രമിക്കുകയും കീടത്തിന്‍റെ തൊലി തുടങ്ങിയ ശരീരഭാഗങ്ങളില്‍ ധാരാളമായി പെരുകുകയും ചെയ്യുന്നു. അപ്രകാരം ഈ ഭാഗങ്ങളെല്ലാം അഴുകുകയും പുഴുക്കള്‍ ചത്ത്‌ അളിഞ്ഞ് പോവുകയും ചെയ്യുന്നു. ഇങ്ങനെ ചത്ത കീടങ്ങളുടെ ശരീരത്തില്‍ സ്പര്‍ശിച്ചാല്‍ തൊലി പൊട്ടി ലക്ഷക്കണക്കിന്‌ സൂക്ഷ്മാണുക്കള്‍ വെളിയില്‍ വരുന്നു. ഈ സൂക്ഷ്മാണുക്കള്‍ കലര്‍ന്ന ചെടിയുടെ ഭാഗങ്ങള്‍ ഭക്ഷിക്കുന്ന അതെ വര്‍ഗ്ഗത്തിലുള്ള മറ്റ് കീടങ്ങള്‍ക്കും രോഗം ബാധിക്കുന്നു.
തക്കാളി, പരുത്തി എന്നീ വിളകളുടെ ഒരു പ്രധാന കീടമായ ഹീലിയോത്തിസ് എന്ന കായ്തുരപ്പന്‍ പുഴു, കാബേജ് ഇനത്തില്‍പ്പെട്ട പച്ചക്കറികളുടെ ഒരു ശത്രുവായ ട്രൈക്കോപുസിയ എന്ന പുഴു, വാഴയുടെ ഇല തിന്നു നശിപ്പിക്കുന്ന സ്പോഡോപ്റ്റിറ തുടങ്ങിയ അനേകം കീടങ്ങളെ ഫലപ്രദമായി നിയന്ത്രിക്കുവാന്‍ കഴിവുള്ള എന്‍.പി.വി. ഇനത്തില്‍പ്പെട്ട വൈറസുകള്‍ ഇന്ന് ലഭ്യമാണ്. അവയെ ധാരാളമായി ഉപയോഗിച്ചുവരുന്നു. ഓരോ കീടത്തിനെയും ആക്രമിക്കുന്ന വൈറസുകള്‍ വെവ്വേറെ ഇനങ്ങളാണ്.
ജൈവ കീടനാശിനികള്‍
ബോര്‍ഡോ മിശ്രിതം
തുരിശ് - 1 കി.ഗ്രാം
നീറ്റുകക്ക - 1 കി.ഗ്രാം
വെള്ളം - 100 ലിറ്റര്‍
തുരിശ് നന്നായി പൊടിച്ച് കിഴികെട്ടി 50 ലിറ്റര്‍ വെള്ളത്തില്‍ ലയിപ്പിച്ചെടുക്കുക. കക്കാ നീറ്റിയെടുത്ത് 50 ലിറ്റര്‍ വെള്ളത്തില്‍ വേറെ ലയിപ്പിച്ചെടുക്കണം. എന്നിട്ട് തുരിശ് ലായനി കക്കാ ലായനിയിലേക്ക് ഒഴിച്ച് ഇളക്കി കൊണ്ടിരിക്കണം. ഇവ തയ്യാറാക്കാനായി ചെമ്പ്. മണ്‍പാത്രം, പ്ലാസ്റ്റിക്‌, മരം എന്നിവ കൊണ്ടുള്ള പാത്രം ഉപയോഗിക്കുക. ബോര്‍ഡോ മിശ്രിതം തയ്യാറാക്കിയാല്‍ കഴിവതും അന്നുതന്നെ ഉപയോഗിക്കണം.
ബോര്‍ഡോ മിശ്രിതത്തിന്‍റെ കൂട്ട് ശരിയാണോയെന്ന് നോക്കാനായി തേച്ചുമിനുക്കിയ ഇരുമ്പ് കത്തിയോ, ബ്ലെയ്ഡോ രണ്ടു മിനിറ്റ് നേരം മുക്കിപിടിക്കണം. കത്തിമുനയില്‍ ചെമ്പിന്‍റെ അംശം കാണുന്നുവെങ്കില്‍ കക്കാ ലായനി ചേര്‍ത്ത് നിര്‍വീര്യമാക്കണം. ഇപ്രകാരം തയ്യാര്‍ ചെയ്ത ബോര്‍ഡോ മിശ്രിതത്തിന് നല്ല നീലനിറമായിരിക്കും.
മഴക്കാലത്ത് തളിക്കുമ്പോള്‍ ഒലിച്ച് നഷ്ടപ്പെടാതിരിക്കാന്‍ വജ്രപ്പശ ചേര്‍ത്ത് ഉപയോഗിക്കണം. ഇതിനായി 100 ലിറ്റര്‍ വെള്ളത്തില്‍നിന്നും 10 ലിറ്റര്‍ വെള്ളം മാറ്റി ഒരു മണ്‍പാത്രത്തില്‍ ഒരു മണ്‍പാത്രത്തില്‍ തിളപ്പിക്കണം. ഇതില്‍ 500 ഗ്രാം അലക്കുകാരം ലയിപ്പിച്ച് ലായനി കറുപ്പുനിറം ആകുന്നതുവരെ ചൂടാക്കണം. എന്നിട്ട് ഒരു കിലോഗ്രാം വജ്രപ്പശ (അര്‍പ്പൂസ്) പൊടിച്ച് ചേര്‍ക്കണം. കുറഞ്ഞ രീതിയില്‍ 5 മിനിറ്റ് നേരം കുമിളകള്‍ വരുന്നതുവരെ ചൂടാക്കണം. ലായനി തണുപ്പിച്ച് ചെറിയ ചൂടില്‍ ബോര്‍ഡോ മിശ്രിതത്തില്‍ ചേര്‍ത്ത് ഉപയോഗിക്കണം.
വേപ്പെണ്ണ – വെളുത്തുള്ളി മിശ്രിതം
രണ്ടുശതമാനം വീര്യത്തില്‍ 10 ലിറ്റര്‍ വേപ്പെണ്ണ വെളുത്തുള്ളി മിശ്രിതം ഉണ്ടാക്കുന്നതിന് 200 മില്ലി ലിറ്റര്‍ വേപ്പെണ്ണ, 200 ഗ്രാം വെളുത്തുള്ളി, 60 ഗ്രാം ബാര്‍സോപ്പ്‌ എന്നിവ വേണ്ടിവരും. ബാര്‍സോപ്പ്‌ ചീകി എടുത്ത് അര ലിറ്റര്‍ ഇളംചൂടുവെള്ളത്തില്‍ നല്ലതുപോലെ ലയിപ്പിച്ച് 200 മില്ലി ലിറ്റര്‍ വേപ്പെണ്ണയുമായി ചേര്‍ത്ത് ഇളക്കി പതപ്പിക്കണം. വെളുത്തുള്ളി നല്ലതുപോലെ അരച്ച് 300 മില്ലി ലിറ്റര്‍ വെള്ളവുമായി ചേര്‍ത്ത്, അരിച്ച്‌ വേപ്പെണ്ണ എമല്‍ഷനുമായി ചേര്‍ക്കുക. ഇത് 9 ലിറ്റര്‍ വെള്ളം ചേര്‍ത്ത് നേര്‍പ്പിച്ച് 10 ലിറ്റര്‍ ലായനി ഉണ്ടാക്കാം. നീരൂറ്റിക്കുടിക്കുന്ന പ്രാണികള്‍ക്കെതിരേ ഫലപ്രദം.
വേപ്പിന്‍കുരു ലായനി
വേപ്പിന്‍കുരു തൊണ്ട് പൊടിച്ച് എടുക്കണം. 3 മുതല്‍ 5 ശതമാനം വീര്യത്തിലാണ് സാധാരണ ഉപയോഗിക്കുന്നത്. 0.1 ശതമാനം വീര്യത്തില്‍ തളിക്കാന്‍ 30-50 ഗ്രാം വേപ്പിന്‍കുരു പൊടിച്ച് ഒരു ലിറ്റര്‍ വെള്ളത്തില്‍ ലയിപ്പിക്കണം. വേപ്പിന്‍കുരു പൊടിച്ചത് ഒരു തുണിയില്‍ കെട്ടി വെള്ളത്തില്‍ 12 മണിക്കൂര്‍ മുക്കിവെക്കണം. തുണിയില്‍നിന്ന് സത്ത് മുഴുവന്‍ പിഴിഞ്ഞെടുക്കണം. ഇല, കായ് എന്നിവ കാര്‍ന്നുതിന്നുന്ന പുഴുക്കള്‍, പച്ചത്തുള്ളന്‍ എന്നിവക്കെതിരെ ഇത് ഫലപ്രദമാണ്.
വേപ്പിന്‍ പിണ്ണാക്ക്
നല്ല ജൈവവളമെന്നതിലുപരി ധാരാളം ഗുണങ്ങളുള്ള ഒരു കീടനാശിനി കൂടിയാണ് വേപ്പിന്‍ പിണ്ണാക്ക്. മണ്ണിലെ കൃമി കീടങ്ങളെ, പ്രത്യേകിച്ചും നിമാവിരകളെ നിയന്ത്രിക്കാന്‍ വേപ്പിന്‍ പിണ്ണാക്കിന് കഴിയും. ഇത് വെള്ളത്തില്‍ കലക്കി ഒരു ദിവസം വെച്ചതിനുശേഷം അരിച്ചെടുത്ത ലായനി ചെടികളില്‍ തളിക്കാന്‍ ഉപയോഗിക്കാം.
നിറക്കെണി
ചതുരാകൃതിയിലുള്ള തകരകഷണമോ, ടിന്നോ പെയ്ന്റടിച്ച് ആവണക്കെണ്ണയില്‍ മുക്കി അടുക്കളത്തോട്ടത്തില്‍ അവിടവിടെയായി തൂക്കിയിടുക. വൈറസ് രോഗങ്ങള്‍ പരത്തുന്ന വെള്ളീച്ചയ്ക്കെതിരേ ഇവ പ്രയോഗിക്കാം. ഒരു വീട്ടിലെ തോട്ടത്തിന് 4 എണ്ണം വേണ്ടിവരും. ഇത്തരം കെണികള്‍ കൂടാതെ സുരക്ഷിതമായി പച്ചക്കറികളില്‍ ഉപയോഗിക്കാവുന്ന ജൈവകീടനാശിനികള്‍ ഉണ്ട്. കീടശല്യം അധികമാണെങ്കില്‍ അവയുണ്ടാക്കി തളിക്കുന്നത് സുരക്ഷിതവും ഫലപ്രദവുമാണ്.
പഴക്കെണി
തൊലിയുരിഞ്ഞ പാളയംകോടന്‍ പഴം മൂന്ന് നാല് കഷണങ്ങളാക്കി ചരിച്ച് മുറിച്ചെടുക്കുക. എന്നിട്ട് മുറിപ്പാടില്‍ അല്പം കാര്‍ബോസള്‍ഫാന്‍ 6 എ തരികള്‍ വിതറണം. കാര്‍ബോസള്‍ഫാന്‍ 6 എ തരികള്‍ പിടിപ്പിച്ച പഴത്തിന്‍റെ ഭാഗം മുകളിലാക്കി ഒരു ചിരട്ടയില്‍ വെച്ച് ഉറികെട്ടി പന്തലില്‍ തൂക്കിയിടുക. കായീച്ചക്കെതിരെ ഫലപ്രദം.
തുളസിക്കെണി
ഒരുപിടി തുളസിയില നല്ലതുപോലെ അരച്ച് നീര് കളയാതെ ചിരട്ടക്കുള്ളില്‍ വെക്കുക. തുളസിച്ചാര്‍ ഉണങ്ങിപ്പോകാതിരിക്കാന്‍ കുറച്ചുവെള്ളം ചിരട്ടക്കുള്ളില്‍ ഒഴിക്കുക. ഇതില്‍ 10 ഗ്രാം ശര്‍ക്കര പൊടിച്ച് ഒപ്പം കാര്‍ബോസള്‍ഫാന്‍ 6 എ തരി കൂട്ടി ചിരട്ടയില്‍ ഇട്ട് ഇളക്കുക. കായീച്ചക്കെതിരെ വളരെ ഫലപ്രദമാണ്.
കഞ്ഞിവെള്ളക്കെണി
ഒരു ചിരട്ടയുടെ കാല്‍ഭാഗം തണുത്ത കഞ്ഞിവെള്ളം എടുക്കുക. ഇതില്‍ 10 ഗ്രാം ശര്‍ക്കരയും അരഗ്രാം കാര്‍ബോസള്‍ഫാന്‍ 6 എ തരികളുമിട്ട് നല്ലവണ്ണം ഇളക്കി വെയ്ക്കുക. കായീച്ചക്കെതിരെ ഫലപ്രദം.
ശര്‍ക്കരക്കെണി
ശര്‍ക്കര (10 ഗ്രാം) വെള്ളത്തില്‍ നനച്ച് ചിരട്ടയുടെ ഉള്‍ഭാഗത്ത് തിരുമ്മി പിടിപ്പിക്കുക. ഒപ്പം ഒരു നുള്ള് കാര്‍ബോസള്‍ഫാന്‍ 5 എ തരി ചിരട്ടയ്ക്കുള്ളിലെ ശര്‍ക്കരയുടെ മുകളില്‍ വിതറുക. ചുവന്ന നിറത്തിലുള്ള പുളിയുറുമ്പുകളെ നിയന്ത്രിക്കാന്‍ ഇത് സഹായിക്കും.
നാറ്റപ്പൂച്ചെടി ഇമള്‍ഷന്‍
നാറ്റപ്പൂച്ചെടിയുടെ ഇളംതണ്ടും അലകളും ചതച്ച് നീരെടുക്കുക. 60 ഗ്രാം ബാര്‍സോപ്പ്‌ അരലിറ്റര്‍ ചെറുചൂടുവെള്ളത്തില്‍ ലയിപ്പിച്ചെടുക്കുക. ഈ ലായനി നാറ്റപ്പൂച്ചെടിയുടെ ഒരു ലിറ്റര്‍ ചാറുമായി കൂട്ടി യോജിപ്പിക്കുക. ഇത് പത്തിരട്ടി വെള്ളം ചേര്‍ത്ത് നേര്‍പ്പിച്ച് വേണം തളിക്കേണ്ടത്. പയറിലും മറ്റും പറ്റിക്കൂടുന്ന മുഞ്ഞയ്ക്കെതിരെ വളരെ ഫലപ്രദം.
മണ്ണെണ്ണക്കുഴമ്പ്
ബാര്‍സോപ്പും മണ്ണെണ്ണയുമിട്ടാണ് ഇതിലെ പ്രധാന ചേരുവകള്‍. 500 ഗ്രാം സാധാരണ ബാര്‍സോപ്പ്‌ നേര്‍മയായി അരിഞ്ഞത് നാലര ലിറ്റര്‍ വെള്ളത്തില്‍ ചെറുതായി ചൂടാക്കിക്കൊണ്ട് ലയിപ്പിക്കുക. ലായനി തണുത്ത് കഴിയുമ്പോള്‍ ഇതിലേക്ക് 9 ലിറ്റര്‍ മണ്ണെണ്ണ നന്നായി ഇളക്കിക്കൊണ്ട് ചേര്‍ക്കുക. ഇതില്‍ 15-20 ഗ്രാം വെള്ളം ചേര്‍ത്തിളക്കിയ ശേഷം ചെടികളില്‍ തളിക്കാം. നീരൂറ്റിക്കുടിക്കുന്ന പ്രാണികളെ നിയന്ത്രിക്കാന്‍ ഏറെ ഫലപ്രദമാണിത്.
പുകയില കഷായം
അരകിലോഗ്രാം പുകയിലയോ, പുകയില ഞെട്ടോ ചെറുതായി അരിഞ്ഞത് നാലര ലിറ്റര്‍ വെള്ളത്തില്‍ ഒരു ദിവസം മുക്കിവെയ്ക്കുക. പിന്നീട് പിഴിഞ്ഞെടുത്ത് ചണ്ടി മാറ്റിവെയ്ക്കുക. ഇപ്രകാരം ലഭിച്ച പുകയില ചാറില്‍ 120 ഗ്രാം ബാര്‍സോപ്പ്‌ ചെറുതായി അരിഞ്ഞ് വെള്ളത്തില്‍ ലയിപ്പിച്ചെടുത്ത ലായനി ചേര്‍ത്ത് നന്നായി ഇളക്കുക. ഈ പുകയില കഷായം 6-൭ ഇരട്ടി വെള്ളം ചേര്‍ത്ത് തളിച്ചാല്‍ പയര്‍ പേനുകളെയും, മറ്റ് മൃദുല ശരീരികളായ കീടങ്ങളെയും നിയന്ത്രിക്കാം.
സസ്യജന്യ കീടനാശിനികള്‍
രൂക്ഷഗന്ധമുള്ള ചെടികളുടെ സത്ത് ചേര്‍ത്തുണ്ടാക്കുന്ന ലായനികള്‍ കീടനിയന്ത്രണത്തിന് ഫലപ്രദമാണെന്ന് കണ്ടിട്ടുണ്ട്. ഇക്കൂട്ടത്തില്‍പ്പെട്ട ചില സസ്യങ്ങളും അവയുടെ ഉപയോഗവും ചുവടെ ചേര്‍ക്കുന്നു.
- ചെണ്ടുമല്ലി
മണ്ണില്‍ കാണുന്ന നിമാവിരകള്‍ക്കെതിരെ ശുപാര്‍ശ ചെയ്യുന്ന പൂചെടിയാണ് ചെണ്ടുമല്ലി. കൂടാതെ ചെണ്ടുമല്ലി പച്ചക്കറി വിളകളിലെ കായ്തുരപ്പന്‍ പുഴുക്കളെയും ആകര്‍ഷിക്കുന്നു. തന്മൂലം വിളകള്‍ കീടശല്യത്തില്‍നിന്നും രക്ഷപ്പെടുന്നു.
- കരിനൊച്ചി
ഒരു ഔഷധസസ്യമായ കരിനൊച്ചിയുടെ ഇലസത്ത് പല കീടങ്ങളെയും തുരത്താന്‍ സഹായകമാണ്. ഇതിനായി 50 ഗ്രാം മുതല്‍ 100 ഗ്രാം ഇല ഒരു ലിറ്റര്‍ വെള്ളത്തില്‍ എന്ന വീര്യത്തില്‍ ഉപയോഗിക്കുന്നു.
- ആത്ത
ആത്തയുടെ കുരുവും ഇലയും കീടശല്യത്തിനെ പ്രതിരോധിക്കും. 1 കിലോഗ്രാം ഇല ചതച്ച് ഒരു ലിറ്റര്‍ ഗോമൂത്രവുമായി ചേര്‍ത്ത് ഒരു ദിവസം വയ്ക്കുക. ഇതില്‍ 9 ലിറ്റര്‍ വെള്ളം ചേര്‍ത്ത് അരിച്ചെടുത്ത് ഉപയോഗിക്കാം.
- തുളസി
കയീച്ചക്കെതിരെ ഫലപ്രദമായി തുളസിക്കെണി ഉപയോഗിക്കാം. ഒരുപിടി തുളസിയില ചതച്ച് വെള്ളം ചേര്‍ത്ത് ചിരട്ടയിലെടുക്കുക. ഇതില്‍ ഒരു നുള്ള് രാസകീടനാശിനി ചേര്‍ത്താല്‍ മാത്രമേ ആകര്‍ഷിക്കപ്പെട്ടു വരുന്ന കീടങ്ങളെ നശിപ്പിക്കാന്‍ കഴിയൂ.
- പെരുവലം
പെരുവലത്തിന്‍റെ എല്ലാ ഭാഗവും കീടവികര്‍ഷക ഗുണം കാണിക്കുന്നു. തെങ്ങിലെ കൊമ്പന്‍ചെല്ലിയുടെ പുഴുക്കള്‍ക്കെതിരേ വളക്കുഴിയിലും ചാണകക്കുഴിയിലും പെരുവലം വേരോടെ പിഴുതെടുത്ത് ചേര്‍ക്കുന്നത് നല്ലതാണ്. ഇല ഇടിച്ചു പിഴിഞ്ഞെടുത്ത നീര് 40 മില്ലി ഒരു ലിറ്റര്‍ വെള്ളത്തില്‍ എന്ന തോതില്‍ തളിക്കുന്നത് പച്ചക്കറികളിലെ തണ്ടുതുരപ്പന്‍ പുഴുക്കള്‍ക്കെതിരേ ഫലപ്രദമാണ്.
കപ്പ, പപ്പായ, വേപ്പ്, ഒടുക്, കച്ചോലം, മഞ്ഞള്‍, തുളസി, അരളി, ചെത്തിക്കൊടുവേലി, കമ്മ്യൂണിസ്റ്റ് പച്ച, ആവണക്ക്, കൂവളം, വയമ്പ്, നാറ്റപ്പൂച്ചെടി, കൊങ്ങിണി, കിരിയാത്ത്, ശീമക്കൊന്ന തുടങ്ങി നിരവധി സസ്യങ്ങളില്‍ നിന്നും ഇപ്രകാരമുള്ള ജൈവകീടനാശിനികള്‍ തയ്യാറാക്കാവുന്നതാണ്. ഇവ മനുഷ്യര്‍ക്കോ മറ്റ് ജീവജാലങ്ങള്‍ക്കോ പരിസ്ഥിതിക്കോ ദോഷകരമല്ലതാനും.
പച്ചക്കറികളിലെ അവശിഷ്ട വിഷാംശം നീക്കം ചെയ്യല്‍
പലപ്പോഴും വീട്ടാവശ്യത്തിനുള്ള മുഴുവന്‍ പച്ചക്കറികളും വീട്ടില്‍ നിന്നും ലഭിക്കുക സാധ്യമാകില്ല. ആയതിനാല്‍ വിപണിയില്‍ നിന്ന് പച്ചക്കറികള്‍ വാങ്ങി ഉപയോഗിക്കേണ്ടി വരാം. തിരുവനന്തപുരത്തുള്ള കീടനാശിനി അവശിഷ്ട വിഷാംശ പരിശോധനാ ലബോറട്ടറി വിപണിയില്‍ നിന്നും ശേഖരിച്ച വിവിധയിനം പച്ചക്കറികളില്‍ അപകടകരമായ തോതില്‍ വിഷാംശം കണ്ടെത്തിയിരുന്നു. വിപണിയില്‍ നിന്നും പച്ചക്കറികള്‍ വാങ്ങി ഉപയോഗിക്കുമ്പോള്‍ വാളന്‍പുളി വെള്ളത്തിലോ, വിനാഗിരി ലായനിയിലോ, ഉപ്പ് ലായനിയിലോ 10 മിനിറ്റ് മുക്കിവെച്ച ശേഷം വെള്ളത്തില്‍ പല ആവര്‍ത്തി കഴുകി ഉപയോഗിക്കുക. ലായനി തയ്യാറാക്കുന്നതിനായി 20 ഗ്രാം വാളന്‍പുളി/ 20 ഗ്രാം ഉപ്പ്/ 20 മില്ലി വിനാഗിരി ഇവയില്‍ ഏതെങ്കിലും ഒന്ന്, ഒരു ലിറ്റര്‍ വെള്ളത്തില്‍ എന്ന തോതില്‍ ലയിപ്പിച്ച് എടുക്കാവുന്നതാണ്. ഈ വിധത്തില്‍ കഴുകിയെടുത്ത പച്ചക്കറികള്‍ വെള്ളം വാര്‍ന്നുപോകാന്‍ സുഷിരങ്ങളുള്ള പാത്രത്തില്‍ വെക്കാം. കിഴങ്ങുവര്‍ഗ്ഗ വിളകളില്‍ പുറത്തുപറ്റിയിരിക്കുന്ന മണ്ണിന്‍റെയും മറ്റ് മാലിന്യങ്ങളുടെയും അംശം പൂര്‍ണ്ണമായും നീക്കം ചെയ്യേണ്ടതാണ്.
|
ജൈവ കീട – രോഗനാശിനികള്‍ ലഭിക്കുന്ന സ്ഥാപനങ്ങള്‍ ( തൃശൂര്‍ ജില്ല ) |
|
|
കാര്‍ഷിക സാങ്കേതിക വിജ്ഞാന കേന്ദ്രം, മണ്ണുത്തി |
ഫോണ്‍ : 0487 2371340 |
|
വാഴ ഗവേഷണ കേന്ദ്രം, കണ്ണാറ |
ഫോണ്‍ : 0487 2699087 |
|
ബയോകണ്ട്രോള്‍ ലാബ്, കോളേജ് ഓഫ് ഹോര്‍ട്ടികള്‍ച്ചര്‍, വെള്ളാനിക്കര |
ഫോണ്‍ : 0487 2438740 |
|
സംസ്ഥാന ബയോകണ്ട്രോള്‍ ലാബ്, മണ്ണുത്തി |
ഫോണ്‍ : 0487 2374605 |
|
കേരള കാര്‍ഷിക സര്‍വ്വകലാശാല വിത്ത് ലഭിക്കുന്ന സ്ഥാപനങ്ങള്‍ തൃശൂര്‍ ജില്ല |
|
|
കാര്‍ഷിക സാങ്കേതിക വിജ്ഞാന കേന്ദ്രം, മണ്ണുത്തി |
ഫോണ്‍ : 0887 2371340 |
|
കാര്‍ഷിക ഗവേഷണ കേന്ദ്രം, മണ്ണുത്തി |
ഫോണ്‍ : 0487 2370726 |
|
കോളേജ് ഓഫ് ഹോര്‍ട്ടികള്‍ച്ചര്‍ പച്ചക്കറി വിഭാഗം, വെള്ളാനിക്കര |
ഫോണ്‍ : 0487 2438482 |
|
കൃഷി വിജ്ഞാന കേന്ദ്രം – തൃശ്ശൂര്‍ കെ. എ. യു. (പി.ഒ), വെള്ളാനിക്കര |
ഫോണ്‍ : 0487 2375855 |
കടപ്പാട് : കൃഷി വിജ്ഞാന കേന്ദ്രം – തൃശ്ശൂര്‍, കേരള കാര്‍ഷിക സര്‍വ്വകലാശാല
അവസാനം പരിഷ്കരിച്ചത് : 6/2/2020
